រញ្ជួយដីនៅជប៉ុន បណ្តាលឲ្យស្លាប់ និងរបួសជាង២០០នាក់ (មានវីដេអូ)

2018-06-18 08:22:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ហេតុការណ៍រញ្ជួយដីដ៏ខ្លាំងក្លាមួយ បានកើតឡើងនៅក្នុងទីក្រុង Osaka ប្រទេសជប៉ុន កាលពីវេលាម៉ោង ៨ព្រឹក ម៉ោងនៅជប៉ុន ត្រូវនឹងម៉ោង ៦ព្រឹកនៅកម្ពុជា នាថ្ងៃច័ន្ទ ទី១៨ ខែមិថុនា ឆ្នាំ២០១៨នេះ ដោយបានសម្លាប់មនុស្សយ៉ាងហោចណាស់ ៣នាក់ ដោយក្នុងនោះរួមមានក្មេងម្នាក់ និងបណ្តាលឲ្យមនុស្សជាង ២០០នាក់ផ្សេងទៀតរងរបួស។

ជាមួយគ្នានេះ អាកាសយានដ្ឋាននៅក្នុងតំបន់ខាងលើ ត្រូវបានបិទអស់រយៈពេលជាច្រើនម៉ោង , ខ្សែរថភ្លើងទទួលការរំខាន និង រោងចក្របានបញ្ឈប់ផលិតកម្ម។

ទោះបីជាយ៉ាងណាក៏ដោយ ការរញ្ជួយដីកម្រិត ៦,១រ៉ិចទ័រខាងលើ មិនបានបង្កឲ្យមានរលកយក្សស៊ូណាមីកើតឡើងឡើយ ខណៈរោងចក្រនុយក្លេអ៊ែរនៅក្នុងតំបន់នេះ នៅតែបន្តដំណើរការធម្មតា។

គួរបញ្ជាក់ថា ប្រទេសជប៉ុនស្ថិតនៅក្នុងតំបន់ដែលងាយរងគ្រោះ ដោយការរញ្ជួយដីបំផុតមួយនៅលើពិភពលោក ដែលមានទំហំចាប់ពី ៦,០រ៉ិចទ័រ ឬ ច្រើនជាងនេះ៕