សហព័ន្ធ E-Sports កម្ពុជារីករាយចូលរួមត្បាញក្រមាបំបែកកំណត់ត្រាពិភពលោក

2018-06-20 09:24:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្តម ជា ច័ន្ទបរិបូណ៌ អនុប្រធានសហព័ន្ធកីឡាអេឡិចត្រូនិកកម្ពុជាបានដឹកនាំក្រុមការងារ និងកីឡាករចូលចូលរួមសកម្មភាពតម្បាញក្រមាវែងបំផុតដើម្បីបង្កើតកំណត់ត្រាពិភពលោកនៅវាលព្រះមេរុខាងមុខសារមន្ទីរជាតិកាលពីព្រឹកមិញ។

លោក លន់ សាមឌី (ឆ្វេង) ឯកឧត្តម ជា ច័ន្ទបរិបូណ៌ (កណ្តាល) និង លោន វ៉ាន់ សំបូរ (ស្តាំ)

ស្របពេលដែលសកម្មភាពតម្បាញក្រមាដើម្បីបង្កើតកំណត់ត្រាប្រវែង១០០០ម៉ែត្រកាន់តែមានសកម្មភាពផុលផុសពីថ្នាក់ដឹកនាំតាមស្ថាប័ន ក្រសួង មន្ត្រីរាជការ ឥស្សរជនល្បី និងពលរដ្ឋទូទៅបានកើតមានជាច្រើនខែហើយនោះ សហព័ន្ធកីឡាអេឡិចត្រូនិកកម្ពុជាក៏បានចូលរួមកាលពីព្រឹកមិញនេះដែលមានឯកឧត្តម ជា ច័ន្ទបរិបូណ៌ អនុប្រធានសហព័ន្ធ លោក លន់ សាមឌី អគ្គលេខាធិការ សមាជិក និងកីឡាករប្រហែលជា៣០នាក់។

ឯកឧត្តម ជា ច័ន្ទបរិបូណ៌បានឲ្យដឹងថា នេះជាសកម្មភាពដ៏ល្អ និងកម្រមួយដែលកម្ពុជាបង្កើតគំនិតត្បាញក្រមាដើម្បីបង្កើតកំណត់ត្រាពិភពលោក។ «ដូច្នេះក្នុងនាមសហព័ន្ធ E-Sports កម្ពុជាក៏បានចូលរួមចំណែកក្នុងសកម្មភាពនេះ។ កីឡា E-Sports កម្ពុជាកំពុងរីកចម្រើន យើងក៏ត្រូវចូលរួមសកម្មភាពក្នុងសង្គមដែរ ដូចជាត្បាញក្រមានេះជាដើម។ យើងអាចចូលរួមបាន ពលរដ្ឋខ្មែរក៏អាចចូលរួមបាន»។

មហាជនយ៉ាងតិច ២ ០០០ នាក់ ក្នុង១ថ្ងៃ បានមកទស្សនា និងចូលរួមគាំទ្រកម្មវិធីបំបែកឯតទគ្គកម្មក្រមាវែងជាងគេលើពិភពលោក នៅឯវាលព្រះ មេរុ ជិតព្រះបរមរាជវាំង។ នេះបើតាមការឲ្យដឹងពី លោក ផល ពិសាល ក្រុមការងារស្ម័គ្រចិត្តកម្មវិធីនេះ។

ឯកឧត្តម ជា ច័ន្ទបរិបូណ៌

លោក ពិសាល ក្រុមការងារស្ម័គ្រចិត្តកម្មវិធីត្បាញក្រមាវែងបំផុត ១ ០០០ម៉ែត្រ ដើម្បីបំបែកឯតទគ្គកម្មពិភពលោក និងជាប្រធានការិយាល័យស្រាវជ្រាវ សិក្សាធិការ និងស្នាដៃ នៃសមាគមសាលាត្រាជូ បានឲ្យដឹងថា អ្នកដែលចង់មកកាន់កម្មវិធីខាងលើនេះ អាចមកទស្សនាពីម៉ោង ៩ព្រឹក-៩យប់ រៀងរាល់ថ្ងៃ។ ចំពោះសាធារណៈជនចង់ចូលរួមត្បាញក្រមាវែងបំផុតនេះ គឺចាប់ពីម៉ោង ១០ ព្រឹក រហូតដល់ម៉ោង ១២ ថ្ងៃត្រង់ និង ចាប់ពីម៉ោង ៤ រសៀល រហូតដល់ម៉ោង ៧យប់៕