គ្មានការបណ្តេញគ្រូបង្វឹកចេញទេ ក្រោយអាហ្សង់ទីនចាញ់ក្រូអាតធ្ងន់ក
- 2018-06-23 10:19:00
- ចំនួនមតិ 0 | ចំនួនចែករំលែក 0
គ្មានការបណ្តេញគ្រូបង្វឹកចេញទេ ក្រោយអាហ្សង់ទីនចាញ់ក្រូអាតធ្ងន់ក
ចន្លោះមិនឃើញ
បើទោះជា Jorge Sampaoli ដឹកនាំអាហ្សង់ទីនចាញ់ក្រោមថ្វីជើងក្រូអាតយ៉ាងធ្ងន់ធ្ងរ ប៉ុន្តែ អតីតគ្រូបង្វឹកឈីលីនឹងមិនត្រូវបានបណ្ដេញចេញពីតួនាទីនៅ World Cup ២០១៨ នេះឡើយ។
សហព័ន្ធកីឡាបាល់ទាត់អាហ្សង់ទីន (Argentina FA ឬ AFA) បានបញ្ជាក់បន្ទាប់ពីចប់ប្រកួតជុំទី២ថា គ្មាននរណាម្នាក់នឹងត្រូវចាកចេញពីតំណែងទេ។ នេះបើតាម Independent ទើបបានចុះផ្សាយ។
Marcaបានដកស្រង់ពីបណ្ដាញសារព័ត៌មាន TYC ដោយបានរាយការណ៍ថា កីឡាករអាហ្សង់ទីនមានកិច្ចប្រជុំបន្ទាន់មួយ នៅព្រឹកថ្ងៃសុក្របន្ទាប់ពីចាញ់ក្រូអាត ៣-០ ហើយបានសម្រេចថា ពួកគេនឹងមិនត្រូវការលោក Sampaoli ដឹកនាំក្រុមលេងទល់នឹងនីហ្សេរីយ៉ាទៀតទេ ដោយជំនួសមកវិញដោយលោក Jorge Burruchaga គ្រូបច្ចេកទេស ដែលជាជំនួយការលោកSampaoli។ ប៉ុន្តែ បើតាមសហព័ន្ធ គ្មានឡើយការផ្តាស់ប្តូរគ្រូបង្វឹក។
Sergio Aguero បានប្រតិកម្មទៅនឹងពាក្យសំដីរបស់អតីតគ្រូបង្វឹក Sevilla និង ឈីលី ដែលបានបន្ទោសកូនក្រុមថាមិនចេះលេងបាល់ជាមួយ Messi។ Aguero និយាយថា "គាត់អាចនិយាយអ្វីដែលគាត់ចង់"។
ភាពតានតឹងផ្ទៃក្នុងរបស់អាហ្សង់ទីន បានកើតឡើងស្របពេលដែលក្រុមមកពីអាមេរិកឡាទីនមួយនេះមានឱកាសកាន់តែស្តួចស្តើងក្នុងការឡើងទៅវគ្គ១៦ក្រុម។
សារព័ត៌មាន Indpendent របស់អង់គ្លេសបានរាយការណ៍ថាវិបត្តិនៃការរៀបចំរបស់គ្រូបង្វឹក Sampaoli នៅត្រង់ប្រើប្រព័ន្ធការពារ៣ នាក់ លេងទល់នឹងក្រូអាត។ ប្រព័ន្ធនេះ Sampaoli ជោគជ័យច្រើននៅពេលដឹកនាំឈីលី ប៉ុន្តែ បែរជាបរាជ័យធំបំផុតក្នុងប្រវត្តិសាស្ត្ររបស់ក្រុមជម្រើសជាតិអាហ្សង់ទីន។
ម្យ៉ាងទៀត Messi លេងនៅតំបន់បម្រើកណ្ដាលដែលខ្លួនមិនសូវថ្នឹកជាមួយ ហើយ បានត្រឹមរង់ចាំបាល់វែងពី Nicolas Otamendi ស្របពេលដែល Aguero ក៏មិនមែនជាប្រភេទខ្សែប្រយុទ្ធតំបន់កណ្ដាល ដែលពិបាកលេងបាល់ one-twos ជាមួយ Messi។ ជាហេតុធ្វើឲ្យអាហ្សង់ទីនពិបាកបណ្តើរបាល់ចូលទៅក្នុងប្រអប់គ្រោះថ្នាក់របស់ក្រូអាត។
ជារួមនៅពេលនេះ បើទោះជា Jorge Sampaoli អាចដឹកនាំអាហ្សង់ទីនឡើងទៅវគ្គ១៦ក្រុម ប៉ុន្តែ វិបត្តិអាហ្សង់ទីនទំនងជាពិបាកដោះស្រាយដដែល ពីព្រោះកីឡាករទាំងអស់ហាក់អស់ជំនឿលើគ្រូបង្វឹក៕