ឡានលំដាប់រាជវង្សជប៉ុន ផលិតដោយ Toyota ចេញតម្លៃលក់ហើយ

2018-06-24 02:56:58
ចំនួនមតិ 0 | ចំនួនចែករំលែក 0

ចន្លោះមិនឃើញ

Toyota Century គឺជារថយន្តជាទីគាប់ចិត្តមួយសម្រាប់រាជវង្សជប៉ុន, មន្ត្រីធំៗ, អ្នកជំនាញ រួមទាំងមេបក្ស Yakuza ទៀតផង។ រថយន្តនេះត្រូវបានគេចាត់ទុកថាជា Rolls-Royce ឬ Bentley របស់ប្រទេសជប៉ុន។

Toyota បានបញ្ចេញរូបរាងថ្មីនៃរថយន្តម៉ូដែលនេះ ហើយពេលនេះក៏បានបង្ហាញចេញតម្លៃលក់ផងដែរ។ Toyota Century ដែលមានផ្លាស់ប្ដូររូបរាងថ្មី និងជាម៉ូដែលផលិតសម្រាប់លក់តែនៅប្រទេសជប៉ុន ត្រូវបានកំណត់លក់ក្នុងតម្លៃចាប់ពីប្រមាណ ១៧៧ ៧១៦ ដុល្លារ ជាតម្លៃមិនទាន់គិតពន្ធ។

រូបរាងខាងក្រៅរបស់ Toyota Century ហាក់ដូចបុរាណបន្តិចមែន ប៉ុន្តែបើកទ្វារចូលដល់ខាងក្នុងគេនឹងឃើញនូវកន្លែងអង្គុយមានពោរពេញដោយផាសុកភាព និងមានបំពាក់នូវចំណុចពិសេសៗជាច្រើន។ មានដូចជាអេក្រង់ទំហំ ១៦ អ៊ីញសម្រាប់កម្សាន្តនៅផ្នែកខាងក្រោយ, ប្រព័ន្ធបញ្ចេញសំឡេងស៊េរីទំនើប, អេក្រង់ទំហំ ៧ អ៊ីញនៅកណ្ដាលនៃកៅអីអង្គុយខាងក្រោយសម្រាប់បញ្ជាមុខងារដូចជាម៉ាស្សា វាំងនន ម៉ាស៊ីនត្រជាក់ និងចម្រៀងជាដើម។

ប្រព័ន្ធសុវត្ថិភាព Toyota Safety Sense ក៏មានបំពាក់លើរថយន្តស៊េរីថ្មីនេះដែរ ដោយមានដូចជា Blind Spot Monitor, Parking Support Alert, Pre-Collision System, Lane Departure Alert, Radar Cruise Control និង Adaptive High Beam។ មុខងារមួយទៀតគឺ HelpNet ពេលដែលពោងសុវត្ថិភាពផ្ទុះ មុខងារនេះនឹងឲ្យដំណឹងដល់ក្រុមហ៊ុនទូរសព្ទ ដើម្បីរាយការណ៍ដល់សមត្ថកិច្ចអំពីគ្រោះថ្នាក់។