៥ក្បាច់ ត្រៀមមុនប្រឡងបាក់ឌុបជាង១ខែ ពីសិស្សឆ្នើមនិទ្ទេសA លំដាប់ពិន្ទុ១០០ពេញ(វីដេអូ)

2018-06-26 03:56:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងរយៈពេលនេះ សិស្សានុសិស្សថ្នាក់ទី១២ ទូទាំងប្រទេសកំពុងសម្រុកខិតខំប្រឹងប្រែងរៀនយ៉ាងខ្លាំងទៅតាមវិធីសាស្ត្ររៀងខ្លួនៗ ដើម្បីត្រៀមការប្រឡងមធ្យមសិក្សាទុតិយភូមិឆ្នាំ២០១៨។ ចុះក្រឡេកមកមើលអតីតសិស្សឆ្នើមនិទ្ទេសA លំដាប់ពិន្ទុ១០០ពេញ ស គីមស៊ា វិញ តើក្នុងអំឡុងពេលនេះឆ្នាំ២០១៧ រូបគេផ្ដោតលើអ្វីខ្លះទើបក្លាយជាសិស្សឆ្នើមបែបនេះ?

សិស្សឆ្នើម ស គីមស៊ា

**១. ទុកការប្រឡងឆមាសទី២ដូចជាការប្រឡងថ្នាក់ជាតិ**

គីមស៊ាលើកឡើងថា ការប្រឡងឆមាសត្រូវខំប្រឹងឲ្យខ្លាំងដូចគ្នា កុំធ្វើការបើកចាក់ កុំលួចចម្លង មានន័យថាយកការប្រឡងនេះ ទុកជាការវាស់ស្ទង់សមត្ថភាពខ្លួនឯង ថាតើយើងអាចធ្វើបានកម្រិតណា ដើម្បីត្រៀមខ្លួនក្នុងការប្រឡងថ្នាក់ជាតិ។

២. អនុវត្តទៅលើការធ្វើវិញ្ញាសាផ្សេងៗ

មកទល់នឹងពេលនេះ គីមសា ប្រាប់ថាមេរៀនផ្សេងៗគឺរៀនចប់អស់ហើយ។ ដូច្នេះគួរតែធ្វើការអនុវត្តទៅលើវិញ្ញាសាផ្សេងៗ ដូចជា៖ គណិត រូប គីមី ជីវៈ និងវិញ្ញាសាសរសេរផ្សេងទៀត ដើម្បី កំណត់ពេលវេលា ថាតើរយៈពេលដែលក្រសួងឲ្យមក ៩០នាទី ឬ ១៥០នាទី តើយើងអាចធ្វើទាន់ជាមួយវិញ្ញាសាទាំងអស់នោះដែរឬក៏អត់? ក្រៅពីនោះគួរសាកល្បង ធ្វើវិញ្ញាសាផ្សេងទៀត ក្រៅពីវិញ្ញាសាឆ្នាំចាស់ ដែលជាស្តង់ដាប្រឡងដូចគ្នា ដើម្បីឲ្យដឹងថា តើមេរៀនណាដែលយើងមិនទាន់ចេះ ហើយមេរៀនណាដែលយើងត្រូវការពង្រឹងបន្ថែមទៀត។

៣. គួរតែចំណាយពេលសិក្សាដោយខ្លួនឯងជាជាងសម្រុករៀនគួរតែម្យ៉ាង

គីមស៊ា និយាយថា ភាគច្រើនបំផុតឲ្យតែមកដល់ពេលនេះហើយ គឺម្នាក់ៗសម្រុកទៅរៀនគួរសឹងតែមិនអាចរកកន្លែងអង្គុយបាន។ គីមស៊ា បន្តថា៖ «គួរតែចំណាយពេលធ្វើការសិក្សាដោយខ្លួនឯង មានន័យថា យើងទៅរៀនគួរដូចគ្នា ទៅយកវិញ្ញាសាដូចគ្នា តែគួររកពេលវេលាណាមួយវាស់ស្ទង់សមត្ថភាពខ្លួនឯង។» យុវជនពូកែសំនួនវោហារនេះ ជំរុញលើកទឹកចិត្តឲ្យសិស្សានុសិស្សទាំងឡាយ គិតត្រង់ចំណុចនេះសាឡើងវិញ ជាក់ស្ដែងដូចជារូបគេផ្ទាល់ធ្លាប់បានចំណាយពេលរៀនគួរតាំងពីព្រឹកទល់ល្ងាច តែអ្វីដែលទទួលបានហាក់មិនដូចអ្វីដែលគេចង់បានឡើយ។ ដូចនេះ អ្វីដែលត្រូវធ្វើនោះ គឺត្រូវសិក្សាឲ្យស្គាល់ពីខ្លួនឯង ថាតើយើងរៀនរបៀបម៉េចទើបមានប្រសិទ្ធភាព?

សិស្សកំពុងរៀនគួរ

៤. កុំព្យាយាមទន្ទេញវិញ្ញាសាចាស់ៗ

យុវជនវ័យ១៨ឆ្នាំរូបនេះ បន្តថា ការទន្ទេញវិញ្ញាសាទោះបីជាយើងជាអ្នកពូកែទន្ទេញយ៉ាងណា ទោះបីចេញវិញ្ញាសានោះចេញភ្លាម ក៏យើងពិបាកប្រឡងដែរ ព្រោះមិនមែនចេះពីក្នុងខ្លួន។ ជាការប្រសើរ គួរព្យាយាមយល់ពីលំហាត់ ក៏ដូចជាវិញ្ញាសាទាំងអស់នោះវិញ។ ការសិក្សាទៅលើវិញ្ញាសាចាស់ៗ គឺត្រឹមត្រូវហើយ ប៉ុន្តែមិនមែនទន្ទេញយកលេខ យកអី មកមើលនោះទេ។ អ្វីដែលសំខាន់នោះ ត្រូវយកមកមើលថាប្រភេទវិញ្ញាសាណាដែលគេចេញប្រឡងឆ្នាំហ្នឹង? តើកម្រិតវិញ្ញាសាប៉ុណ្ណា? តើយើងអាចធ្វើបានឬអត់? តើលំហាត់ប្រភេទណាទៀតដែលយើងមិនទាន់ធ្វើបាន? ដូច្នេះមានន័យថា ការទិញវិញ្ញាសានៅតាមតូប តាមផ្សារទាំងអស់នោះ គឺដើម្បីយកមកសិក្សាពីវិញ្ញាសាទាំងនោះ ចំណែកឯកាទិញយកទន្ទេញ គឺអត់ត្រូវស្តង់ដារជាមួយការប្រឡងនោះទេ។

៥. ចង់បាននិទ្ទេសល្អត្រូវកុំមើលរំលងមុខវិជ្ជាផ្នែកអក្សរ

នៅត្រង់ចំណុចនេះ អាចសិស្សមួយចំនួនផ្ដោតទៅលើមុខវិជ្ជាវិទ្យាសាស្ត្រច្រើន រហូតពេលខ្លះ មិនបានរំឭកមេរៀនដទៃទៀត ដូចជា ភូមិ ប្រវត្តិជាដើម។ ដូច្នេះមុខវិជ្ជាទាំងអស់នេះ បើសិនជាសល់ពេលពីការដោះស្រាយលំហាត់ ឬគណនា គួរចំណាយពេលខ្លះ ដើម្បីមើលទៅលើមេរៀនទាំងនោះខ្លះ ទើបអាចធ្វើការប្រឡងបានពិន្ទុច្រើនដូចគ្នា៕

សូមទស្សនាក្នុងវីដេអូសម្ភាសពិសេសខាងក្រោមនេះ៖

ចុចអាន៖

អត្ថបទ៖ វឌ្ឍនៈ