៥ ចំណុចនេះ អាចឲ្យអ្នកមិនស្ទាក់ស្ទើរដំឡើងប្រើ iOS 12

2018-06-28 07:19:03
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បន្តបន្ថែមមុខងារ ស្ទិលរចនា និងបែបបទប្រើប្រាស់ថ្មីៗ រាល់ពេលចេញប្រព័ន្ធប្រតិបត្តិការថ្មីរបស់ខ្លួន។ ជំនាន់ថ្មីនីមួយៗ ចេញមកមានទាំងការពង្រឹងសមត្ថភាព ក៏ដូចជាជួសជុលបញ្ហានានា។ យ៉ាងណាអ្នកប្រើប្រាស់មួយចំនួននៅតែស្ទាក់ស្ទើរ នៅពេលធ្លាប់ឮបញ្ហាកើតឡើងមួយចំនួន នៅពេលអាប់ដេតឡើងប្រើជំនាន់ថ្មីភ្លាមៗ។

ហេតុផលទាំង ៥ អាចជំរុញ ការសម្រេចចិត្ត និងបន្ថយភាពស្ទាក់ស្ទើរបាន។

១) Siri Shortcut

Siri កាន់តែសកម្ម សិក្សាលើទម្លាប់ ឬឥរិយាបថប្រើប្រាស់របស់អ្នក ឧទាហរណ៍ អាចរំលឹកអ្នក បើចូលគេងយឺត សម្រាប់កិច្ចការប្រជុំថ្ងៃបន្ទាប់។ អាចណែនាំបើកមុខងារ Do Not Disturb ពេលអ្នកទៅមើលកុន, Call ទៅម្ដាយនៅថ្ងៃខួបកំណើត ឬផ្ដល់ការកុម្ម៉ង់កាហ្វេពេលព្រឹក អ្នកធ្លាប់ទទួលទាន។

អាចរៀបចំ Shortcuts ខ្លួនឯង តាមរយៈកម្មវិធី Shortcuts សម្រាប់ Siri។ ជាមួយពាក្យបញ្ជា "Good morning" បើកអំពូលភ្លើងនៅចង្ក្រាន, បើកម៉ាស៊ីនឆុងកាហ្វេ និងបើកដំណើរការ Apple Music។ ឬប្រើពាក្យបញ្ជា "Home time" បើកស្ដាប់តន្ត្រីក្នុងរថយន្ត, បើកបង្ហាញទិសដៅ និងផ្ញើសារទៅកាន់ដៃគូ ដឹងពីដំណើររបស់អ្នក។

អ្នកក៏អាចបើកប្រើ Shortcuts ទាំងនេះ ពី Apple Watch ឬ HomePod បានផងដែរ មិនត្រឹមតែ iPhone នោះទេ។

២) Screen Time

មុខងារ Screen Time ថ្មីរបស់ Apple ផ្ដល់វិធីល្អមួយ ដល់ឪពុកម្ដាយ កំណត់ចំនួនពេលវេលា ក្មេងៗចំណាយលើ iPhone ឬ iPad។ ក្នុងនោះក៏អាចដឹង ចំនួននាទី ក្មេងៗចំណាយលើកម្មវិធីនីមួយៗ ប្រចាំថ្ងៃផងដែរ។

ការដឹងពីចំនួនម៉ោង អ្នកចំណាយលើ Facebook ឬ Instagram ប្រហែលអាចផ្លាស់ប្ដូរចិត្តអ្នកពេលក្រោយបាន។

៣) MEMOJI

បើអ្នកចូលចិត្ត Animoji ជាមួយនឹង Memoji នឹងធ្វើឲ្យអ្នកញញឹម អាចបង្កើត Animoji ដោយខ្លួនឯង មានរូបរាង ដូចអ្នក។ តែត្រូវការ iPhone X ព្រោះតម្រូវកាមេរ៉ា TrueDepth។ នេះអាចប្រើជារូបសម្គាល់ខ្លួន ក្នុងពេលប្រើ FaceTime Call បាន។

Apple ក៏បានបន្ថែម រូបរាង Animoji ថ្មីៗ រួមមានខ្មោច និងដាយណូស័រផងដែរ។

៤) ពង្រឹងសមត្ថភាព

សម្រាប់អ្នកប្រើ iPhone ស៊េរីមុនៗ ប្រហែលមិនពេញចិត្ត ពេញថ្លើមនឹង Memoji ថ្មីនោះទេ ព្រោះមិនអាចប្រើបាន តែអាចពេញចិត្ត លើការពង្រឹងសមត្ថភាពប្រព័ន្ធ។ អាចជាការព្រួយបារម្ភធម្មតា ជំនាន់ថ្មីរបស់ iOS អាចធ្វើឲ្យ iPhone យឺត តែ iOS 12 ខុសពីនេះ។

បើកកម្មវិធី ៤០% លឿនជាងមុន, អូសបើកកាមេរ៉ាពីផ្ទាំង Lock screen ៧០% លឿនជាងមុន, បង្ហាញ Keyboard ៥០% លឿនជាងមុន និងមានចំណុចច្រើនទៀត ឆ្លើយតបបានលឿនជាងមុន លើប្រព័ន្ធ។ ការប្ដូរប្រើកម្មវិធី បានលឿនជាងមុន ទាំងនេះ បានសាកល្បងលើ iPhone 6 Plus ជាពិសេស ហើយម៉ូដែលផ្សេងទៀត អាចខុសគ្នាតិច ឬច្រើន តាមនោះ។

៥) Group FaceTime

ជាមួយមុខងារថ្មី Group FaceTime Call អាចជជែកជាសំឡេង ឬវីដេអូ ជាមួយមនុស្សដល់ទៅ ៣១ នាក់។ ពេលនរណាម្នាក់និយាយ នឹងបង្ហាញនៅចំណុចកណ្ដាល តែក៏អាចប្រើ Focus View ជ្រើសរើសនរណាម្នាក់ពេញចិត្ត បង្ហាញនៅកណ្តាលបាន។

មុខងារនេះ មានជម្រើស Filters និង Effect ដូចគ្នាពេលប្រើពីមុន ដោយអាចដំណើរការលើ iPhone, iPad និង អាចឆ្លើយតបលើ Apple Watch។ មុខងារនេះ ក៏មានលើ MacOS ផងដែរ។

មិនទាន់អស់នៅឡើយទេ នៅមានមុខងារសំខាន់ៗជាច្រើន iOS 12 នឹងផ្ដល់ឲ្យ។ ពេលចេញឲ្យទាញយក ជាផ្លូវការ នេះអាចកាត់បន្ថយភាពស្ទាក់ស្ទើរបានខ្លះ៕