ឃើញរូបសំរាមទាំងនេះហើយ អ្នកនឹងសង្វេគដល់ទីក្រុងភ្នំពេញ

2018-06-28 09:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

"ឃើញរូបទាំង៧សន្លឹកខាងក្រោមនេះហើយអ្នកនឹងសង្វេគដល់ទីក្រុងភ្នំពេញ តើភ្នំពេញនឹងទៅជាយ៉ាងណាបើសំរាមទាំងនេះចេញតែកើនឡើង"

រូបជាច្រើនសន្លឹកខាងក្រោមនេះបង្ហាញពីសំរាម និងគ្រឿងចក្រកំពុងកាយប្រមូលកាកសំណល់នានាចេញនៅប្រឡាយបឹងត្របែកកាលពីព្រឹកថ្ងៃទី២៨ ខែមិថុនា ឆ្នាំ២០១៨នេះ។ កាកសំណល់ដែលគ្រឿងចក្ររបស់មន្ទីរសាធារណការរាជធានីភ្នំពេញកំពុងកាយប្រមូលនោះភាគច្រើនគឺជាកាកសំណល់ធ្វើពីផ្លាស្ទិក។

កាកសំណល់កំពុងកកផ្ទះនៅប្រឡាយបឹងត្របែក

បើតាមការប្រកាសក្នុងប្រព័ន្ធ Facebook ផ្លូវការរបស់របស់រដ្ឋបាលរាជធានីភ្នំពេញ កាលពីថ្ងៃទី២៦ ខែមិថុនា បានបញ្ជាក់ថា មន្ទីរសាធារណការរបស់រាជធានីភ្នំពេញនឹងចល័តគ្រឿងចក្រដើម្បីចុះទៅសម្អាតសំរាមកាយចេញពីប្រឡាយបឹងត្របែកចេញនៅថ្ងៃនេះ។

បើតាមការចុះផ្សាយរបស់សារព័ត៌មានខ្លីខ្លីកាលពីខែចុងឧសភាដែលស្រង់សំដីប្រធានគ្រប់គ្រងទីលានចាក់សំរាមដង្កោ ក្នុងរាជធានីភ្នំពេញលោក កែវ ចាន់ណារិទ្ធ បានបញ្ជាក់ថា សំរាមនៅរាជធានីភ្នំពេញ បានកើនឡើងជាមធ្យមក្នុងមួយឆ្នាំ ៦ម៉ឺនតោន ស្មើប្រមាណ ១២%។ ក្នុងនោះ នៅដើមឆ្នាំ ២០១៨នេះ សំរាមបានកើនឡើងរហូតដល់ ២៥០០តោន ក្នុង១ថ្ងៃ។ កាលពីឆ្នាំ២០១៧ ក្នុង១ថ្ងៃៗ សំរាមដឹកចេញពីរាជធានីភ្នំពេញ ទៅចាក់នៅទីលានចាក់សំរាមដង្កោ មានជិត ២ពាន់តោន។

បើទោះជាមានច្បាប់ហាមឃាត់ពិន័យជាប្រាក់ពី១ម៉ឺន ដល់ ១០ម៉ឺនរៀល និងបង្កើតកិច្ចសហការរវាងស្ថាប័នរដ្ឋ និងឯកជនចូលរួមបង្កើតជាយុទ្ធនាសម្អាត និងផ្សព្វផ្សាយពីផលប៉ះពាល់ពីសំរាមយ៉ាងណាក៏ដោយ ក៏បញ្ហាសំរាមនេះនៅតែជាបញ្ហាឈឺក្បាលមួយរបស់អាជ្ញាធរនៅមិនទាន់ដោះស្រាយឲ្យបានល្អប្រសើរនៅឡើយ។

បញ្ហាកកសន្ទះសំរាមនៅតាមបណ្ដាញប្រព័ន្ធលូបង្ហូរទឹកនេះអាចដោះស្រាយបានលុះត្រាណាមានការចូលរួមសហការពីអាជ្ញាធរពាក់ព័ន្ធ ក្រុមហ៊ុនប្រមូលសំរាម និងការចូលរួមពីប្រជាពលរដ្ឋទាំងអស់គ្នា ដោយត្រូវវេចខ្ចប់ និងទុកដាក់សំរាមឲ្យបានល្អ និងប្រមូលទាន់ពេលវេលា ទើបបញ្ហាទាំងនេះលែងកើតឡើង៕

ពាក្យស្លោកគួរចងចាំ "សំរាមមិនមែនធ្លាក់ពីលើមេឃនោះទេ" "សំរាមមិនធ្លាក់ដល់ដី ភ្នំពេញកាន់តែប្រពៃ"

អត្ថបទ៖ លន ហ្សាឌីណា