គ្រូបង្វឹក៣អាចនឹងជំនួស Sampaoli នៅអាហ្សង់ទីន

2018-07-02 03:40:05
ចំនួនមតិ 0 | ចំនួនចែករំលែក 0

ចន្លោះមិនឃើញ

អនាគត Jorge Sampaoli ជាមួយក្រុមជម្រើសជាតិអាហ្សង់ទីនមិនស្ថិតស្ថេរនោះទេក្រោយលោកដឹកនាំក្រុមមិនបានល្អនៅ World Cup ថែមទាំងធ្លាក់ចេញពីកម្មវិធីកាលពីពេលថ្មីៗក្រោមស្នាដៃបារាំង។

ទោះមិនទាន់មានព័ត៌មានផ្លូវការណាមួយពីការចែកផ្លូវគ្នារបស់គ្រូបង្វឹកវ័យ៥៨ឆ្នាំជាមួយអាហ្សង់ទីន ក៏ដោយក៏តំណែងរបស់លោកទំនងជាមិនអាចរក្សាបានតទៅទៀតទេគឺអាចនឹងត្រូវអាហ្សង់ទីន បញ្ឈប់ ឬចាកចេញដោយខ្លួនឯងនាពេលដ៏ខ្លីខាងមុខ។

បើមានការចាកចេញមែននោះ មនុស្សសំខាន់៣រូបអាចជាជម្រើសឈានមុខគេទៅដឹកនាំអាហ្សង់ទីន៖

#១ Alejandro Sabella

Sabella ធ្លាប់នាំអាហ្សង់ទីនឡើងដល់វគ្គផ្ដាច់ព្រ័ត្រ World Cup ឆ្នាំ២០១៤ តែត្រូវចាញ់អាល្លឺម៉ង់ ១-០ នៅវគ្គផ្ដាច់ព្រ័ត្រ។ ទោះដឹកនាំក្រុមបានល្អតែគ្រូបង្វឹកវ័យ៦៣បានលាឈប់ ក្រោយមិនអាចជួយអាហ្សង់ទីនលើកពានបានសម្រេច។ យ៉ាងណារយៈពេល៤ឆ្នាំកន្លងផុតទៅ Sabella អាចជាជម្រើសកោះហៅមកវិញស្របពេលដែលក្រុមកំពុងជួបវិបត្តិអ្នកដឹកនាំ។

#២ Diego Simeone

Simeone គឺជាបុគ្គលឆ្នើមមួយរូបក្នុងកីឡាករបាល់ទាត់ដែលបច្ចុប្បន្នកំពុងដឹកនាំនៅ Atletico Madrid។ អតីតខ្សែការពាររូបនេះលេងបានជាង១០០ប្រកួតឲ្យអាហ្សង់ទីនរាប់ទាំងនៅព្រឹត្តិការណ៍ World Cup ៣ដងក្នុងឆ្នាំ ១៩៩៤, ១៩៩៨ និង ២០០២។ នៅ Copa América វិញលោកធ្លាប់ឈ្នះពាន២ដង ក្នុងឆ្នាំ ១៩៩១ និង ១៩៩៣ និងបានមេដាយប្រាក់អូឡាំពិកក្នុងឆ្នាំ១៩៩៦។ ភាពជោគជ័យទាំងនៅជាកីឡាករ និងគ្រូ បង្វឹកធ្វើឲ្យ Simeone អាចជាអ្នកបន្ទាប់ទៅដឹកនាំនៅអាហ្សង់ទីន។

#Marcelo Gallardo

Marcelo Daniel Gallardo គឺជាអតីតខ្សែបម្រើប្រយុទ្ធជម្រើសជាតិអាហ្សង់ទីន និងបច្ចុប្បន្នជាអ្នកចាត់ការទូទៅក្រុមធំក្នុងស្រុកគឺ River Plate។ ក្នុងវ័យទើប៤២ឆ្នាំ Gallardo ទើបប្រឡូកក្នុងការដឹកនាំបាន២ក្លឹបប៉ុណ្ណោះគឺ River Plate នេះ និង Nacional របស់អ៊ុយរ៉ាហ្គាយ។ យ៉ាងណាកាលនៅជាកីឡាករលោកធ្លាប់លេងឲ្យក្លឹបអាជីពជាច្រើនទាំងនៅអឺរ៉ុប, ទ្វីបអាមេរិកខាងជើង និងអាមេរិកខាងត្បូងផ្ទាល់៕

ប្រភព៖ Wikipedia | FIFA អត្ថបទ៖ វិរ័ត្ន