ឃើញចង់រៀនហ្មង! វិទ្យាល័យនៅកំពង់ឆ្នាំង ប្រើប្រព័ន្ធបច្ចេកវិទ្យាទំនើបៗ

2018-07-02 06:45:00
ចំនួនមតិ 0 | ចំនួនចែករំលែក 0

ចន្លោះមិនឃើញ

វិទ្យាល័យហ៊ុនសែនទួលខ្ពស់ ជាវិទ្យាល័យទើបនិងសម្ពោធដាក់ឲ្យប្រើប្រាស់កាលពីថ្ងៃទី ២៩ ខែមិថុនា ឆ្នាំ ២០១៨ ដែលស្ថិតនៅភូមិរកាទង ឃុំទួលខ្ពស់ ស្រុកទឹកផុស ខេត្តកំពង់ឆ្នាំងមានបំពាក់បច្ចេកវិទ្យា និងសម្ភារៈសិក្សាយ៉ាងសំបូរបែប។

កម្មវិធីសិក្សាពីចម្ងាយសម្រាប់វិទ្យាល័យ ហ៊ុន សែន ទួលខ្ពស់ ស្រុកទឹកផុស ខេត្តកំពង់ឆ្នាំងនេះ ជាផ្នែកមួយនៃគម្រោងការតភ្ជាប់ប្រព័ន្ធឌីជីថលនៅសាលានានា (Digital Connectivity for School) ចំនួនបី ទីតាំង៖

១.ស្ថិតនៅវិទ្យាល័យហ៊ុន សែនកំពង់លែង ស្រុកកំពង់លែង ខេត្តកំពង់ឆ្នាំង
២.ស្ថិតនៅវិទ្យាល័យហ៊ុន សែនទួលខ្ពស់ ស្រុកទឹកផុស ខេត្តកំពង់ឆ្នាំង និង
៣.ស្ថិតនៅវិទ្យាល័យអ៊ីវ៉ាស្រង់ ស្រុកគងពិសី ខេត្តកំពង់ស្ពឺ។

សមិទ្ធផលដែលត្រូវសម្ពោធដាក់ឲ្យប្រើប្រាស់រួមមាន៖ អគារសិក្សា ១ខ្នង ៣ជាន់ មាន ១៨ បន្ទប់ អគារសម្រាប់រៀនកាត់ដេរ អគាររៀនពីចម្ងាយតាមប្រព័ន្ធអេឡិចត្រូនិក និងព័ត៌មានវិទ្យា អគារទីចាត់ការ និងបណ្ណាល័យ បង្គន់អនាម័យ តុកៅអីសិស្ស តុកៅអីគ្រូ ម៉ាស៊ីនដេរ ឧបករណ៍ប្រព័ន្ធការពាររន្ទះ ដងទង់ជាតិ កង្ហារ សម្ភារៈបរិក្ខារ សម្ភារៈសម្រាប់កិច្ចការរដ្ឋបាល ព្រមទាំងតភ្ជាប់ប្រព័ន្ធអគ្គិសនីសម្រាប់ប្រើប្រាស់ ដោយបានចំណាយថវិកាសរុបអស់ ៦៦៤,១១៧ដុល្លារអាមេរិក ក្នុងនោះក៏មានការចូលរួមឧបត្ថម្ភពីបណ្ដាសប្បុរសជននានាផងដែរ។

ថ្នាក់រៀនមានបំពាក់កុំព្យូទ័រ និងប្រព័ន្ធអេឡិចត្រូនិក

#កម្មវិធីសិក្សាពីចម្ងាយនេះនឹងផ្ដល់នូវអត្ថប្រយោជន៍យ៉ាងច្រើនដូចជា៖

ផ្ដល់ភាពងាយស្រួលជូនលោកគ្រូ អ្នកគ្រូ និងសិស្សានុសិស្សក្នុងការសិក្សាមេរៀនថ្មីៗបានទាន់ពេលវេលា។
ងាយស្រួលក្នុងការធ្វើបច្ចុប្បន្នភាពមេរៀន និងផ្សព្វផ្សាយ។
តាមរយៈប្រព័ន្ធអ៊ីនធឺណិតសិស្សអាចសិក្សាស្រាវជ្រាវមេរៀនដោយខ្លួនឯង។
សិស្សមិនចាំបាច់មកសិក្សានៅទីប្រជុំជន ស្រុក ខេត្ត ក្រុង (កាត់បន្ថយចំណាយជូនអាណាព្យាបាលសិស្សានុសិស្ស)។

បរិវេណសាលាដែលមានឧបករណ៍ប្រព័ន្ធការពាររន្ទះ

អគារសិក្សាថ្មីរបស់វិទ្យាល័យហ៊ុន សែន ទួលខ្ពស់នេះ មានបំពាក់បន្ថែមនូវសម្ភារៈនិងបរិក្ខារទំនើបជាជំនួយរបស់សាជីវកម្មទូរគមនាគមន៍កូរ៉េ (Korea Telecoms) សហការផ្ដល់នូវជំនួយបច្ចេកទេសតភ្ជាប់បណ្ដាញអ៊ីនធឺណិតនិងឌីជីថលសម្រាប់សាលាជាមួយសហគ្រាសរដ្ឋទូរគមនាគមន៍ (Telecom Cambodia) ក្នុងការផ្ដល់លទ្ធភាពសិក្សាពីចម្ងាយជូនសិស្សានុសិស្ស នៅក្នុងខេត្តកំពង់ឆ្នាំងឲ្យបានទទួលការបណ្ដុះបណ្ដាលពីលោកគ្រូ អ្នកគ្រូនៅឯទីក្រុងភ្នំពេញផងដែរ។

ក្រៅពីនេះ ក៏បានដាក់ឲ្យដំណើរការប្រព័ន្ធ Wi-Fi សាធារណៈ ដោយបានការអញ្ជើញចូលរួមដ៏ខ្ពង់ខ្ពស់ពីរដ្ឋមន្ត្រីក្រសួងប្រៃសណីយ៍ និងទូរគមនាគមន៍ឯកឧត្ដម ត្រាំ អ៊ីវតឹក ក្នុងពិធីសម្ពោធដាក់ឲ្យប្រើប្រាស់ជាផ្លូវការនោះ៕