ព័ត៌មានក្ដៅគគុកជុំវិញ Ronaldo ផ្លាស់ទៅ Juventus

2018-07-04 04:18:43
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីព័រទុយហ្គាល់ធ្លាក់ចេញពីព្រឹត្តិការណ៍ World Cup នៅប៉ុន្មានថ្ងៃបន្ទាប់បានលេចព័ត៌មានក្ដៅគគុកពាក់ព័ន្ធនឹង Juventus ដាក់តម្លៃទិញយក Cristiano Ronaldo ពី Real Madrid។

ជុំវិញរឿងការដោះដូររវាង Ronaldo និង Juventus លេចចេញពីសារព័ត៌មានផ្សេងនៅក្នុងប្រទេសអេស្ប៉ាញនិងអ៊ីតាលី។ ជំហានដំបូងសារព័ត៌មាន Tuttosport របស់អ៊ីតាលីរាយការណ៍ថា សេះបង្កង់ Juventus បានឈានដល់ព្រមព្រៀងជាមួយម្ចាស់ពាន Ballon d'Or ក្នុងកុងត្រាដល់ឆ្នាំ២០២២ និងផ្ដល់ប្រាក់បៀវត្សរ៍ ៣០លានអឺរ៉ូក្នុង១ឆ្នាំ។

ដកស្រង់ពីកាសែតអេស្ប៉ាញ Marca ម្ចាស់ជើងឯក Serie A ខាងលើហ៊ានដាក់សំណើទៅ Real Madrid ដល់១០០លានអឺរ៉ូ ទិញ Ronaldo ដែលមានវ័យ៣៣ឆ្នាំទៅហើយ។ តាមប្រភព ត្បិតតែតម្លៃផ្ដាច់កុងត្រារបស់កីឡាករសញ្ជាតិព័រទុយហ្គាល់មានដល់១ ០០០លានអឺរ៉ូ តែគេគិតថា Real អាចទទួលសំណើ១០០លានអឺរ៉ូព្រោះក្លឹបមិនចង់ទុកកីឡាករដែលអស់អារម្មណ៍លេងជាមួយគ្នានោះទេ។

គោលបំណងរបស់ Juventus ចង់យក Ronaldo មកធ្វើខ្សែប្រយុទ្ធចំតួ និងលក់ Gonzalo Higuai ពេលទីផ្សាររដូវក្ដៅបើក។ សរុបសេចក្ដីអ្វីៗពេលនេះមិនទាន់ផ្លូវការឡើយ ព្រោះទាំងក្លឹបនិង Ronaldo ខ្លួនឯងផ្ទាល់មិនទាន់ចេញមកបញ្ជាក់ពីរឿងនេះទេ។ ចាប់តាំងពី CR7 ផ្លាស់មកទឹកដីអេស្ប៉ាញតាំងពីឆ្នាំ២០០៩ នេះជាព័ត៌មានកក្រើកបំផុតជុំវិញការចាកចេញរបស់គេ៕