មូលហេតុ៣យ៉ាងដែល Tiki-Taka ហាក់ដល់ថ្ងៃអវសាន

2018-07-04 08:53:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បរាជ័យរបស់អេស្ប៉ាញក្រោមថ្វីជើងរុស្ស៊ីមិនត្រឹមទម្លាក់ពួកគេចេញពី World Cup នោះទេ តែក៏ជាសញ្ញាមួយដែលបង្ហាញថាប្រព័ន្ធលេងបែប Tiki-Taka លែងគំរាមកំហែងដល់ក្រុមបាល់ទាត់នៅលើពិភពលោកដូចមុនទៀតហើយ។

គេនៅចាំមិនភ្លេចនៅពេល Tiki-Taka ដែលអេស្ប៉ាញនិយមប្រើ បានគ្រប់គ្រងពិភពបាល់ទាត់កាលពីប៉ុន្មានឆ្នាំមុន ដោយពួកគេបានឈ្នះពានធំ៣ជាប់ៗគ្នាគឺ Euro ២០០៨, World Cup ២០១០ និង Euro ២០១២។ កាលណោះគឺជាយុគសម័យមាសរបស់ អេស្ប៉ាញដែលគ្មានគូប្រជែងអាចបំបែកប្រព័ន្ធលេងរបស់ក្រុមជើងខ្លាំងអឺរ៉ុបមួយនេះបានដោយងាយឡើយ។

យ៉ាងណា Tiki-Taka របស់អេស្ប៉ាញហាក់អស់ប្រសិទ្ធិភាពហើយនាពេលបច្ចុប្បន្នដោយសារមូលហេតុសំខាន់៣យ៉ាងគឺ៖

១. ការបាត់បង់កីឡាករឆ្នើម

មិនមែនគ្រប់កីឡាករទាំងអស់សុទ្ធតែចេះលេងប្រព័ន្ធ Tiki-Taka បានទេ ចាំបាច់ពួកគេត្រូវមានទេពកោសល្យ និងយល់ច្បាស់ពីរបៀបលេងទើបអាចស៊ីចង្វាក់គ្នា។ Xavi Hernandez និង Andres Iniesta គឺជាខ្សែបម្រើ២រូបដែលពូកែលេង Tiki-Taka ខ្លាំងបំផុត ខណៈ Cesc Fabregas និង Xabi Alonso ក៏ដូចគ្នា ប៉ុន្តែអេស្ប៉ាញឆ្នាំ២០១៨នេះបាត់បង់កីឡាករសំខាន់ទាំងនេះស្ទើរតែទាំងស្រុងសល់តែ Iniesta ១ប៉ុណ្ណោះដែលមានវ័យកាន់តែចាស់ថែមទៀត។

២. យុទ្ធសាស្ត្រការពាររបស់គូប្រជែង

ក្រុមគូប្រជែងដែលប៉ះជាមួយអេស្ប៉ាញនៅពេលនេះអាចសម្របខ្លួនបានហើយជាមួយក្បាច់ Tiki-Taka ដោយក្រុមទាំងនោះអាចការពារបានល្អជាងមុន និងទប់ទល់ពេលអេស្ប៉ាញវាយសម្រុកម្ដងៗខុសពីប៉ុន្មានឆ្នាំមុនដែលវាហាក់ថ្មីៗសម្រាប់ពួកគេ។ ព័រទុយហ្គាល់, ម៉ារ៉ុក និងរុស្ស៊ី សុទ្ធតែលេងបានល្អជាមួយស្ដេច Tiki-Taka ព្រោះតែការបានសិក្សាពីប្រព័ន្ធ លេងនេះ សូម្បីតែអ៊ីរ៉ង់ដែលជាក្រុមមកពីអាស៊ីក៏អេស្ប៉ាញយកឈ្នះបានត្រឹម១-០ យ៉ាងតានតឹងបំផុត។

៣. អវសានរបស់កំពូលខ្សែប្រយុទ្ធឆ្នើម

ទោះ Tiki-Taka ល្អប៉ុនណាក៏ដោយ តែបើសិនជាខ្សែប្រយុទ្ធមិនមុតស្រួច ក៏វាគ្មានប្រសិទ្ធិភាពដែរ។ នៅសម័យដែលអេស្ប៉ាញឈានដល់កម្រិតកំពូលពួកគេមានខ្សែប្រយុទ្ធដ៏គ្រោះថ្នាក់បំផុត២រូបដែលយល់ច្បាស់ពី Tiki-Taka គឺ David Villa និង Fernando Torres ស្របពេលបច្ចុប្បន្នខ្សែប្រយុទ្ធអេស្ប៉ាញដូចជា Diego Costa និង Aspas ជាដើមមិនទាន់ល្អគ្រប់គ្រាន់នៅឡើយសម្រាប់ការលេងរបៀប Tiki-Taka៕