នារីជប៉ុនម្នាក់ ស្រលាញ់របាំខ្មែរ ខំហាត់រៀនអស់ពេលជាង២០ឆ្នាំ (វីដេអូ)

2018-07-10 07:19:44
ចំនួនមតិ 0 | ចំនួនចែករំលែក 0

ចន្លោះមិនឃើញ

នារីជនជាតិជប៉ុនម្នាក់ធ្វើឲ្យទស្សនិកជនខ្មែរជាច្រើននាក់រំភើបចិត្តជាខ្លាំង បន្ទាប់ពីបានទស្សនាក្បាច់របាំខ្មែរយ៉ាងរស់រវើក នៅលើឆាកក្នុងពិធីបុណ្យ តាណាបាតា ដែលធ្វើឡើងនៅមជ្ឈមណ្ឌលសហប្រតិបត្តិការកម្ពុជា-ជប៉ុន កាលពីថ្មីៗនេះ។ ក្នុងពិធីនោះ នារីជប៉ុនបានរាំរបាំខ្មែរលក្ខណៈច្នៃប្រឌិតថ្មីចំនួន២បទ គឺបទព្រហ្មគីតិ និងបទឥទ្រ្ទជិត ដោយទទួលបានការសាទរ និងកោតសរសើរពីអ្នកទស្សនាយ៉ាងខ្លាំង។

បើតាមអ្នកស្រី ឱម យុវណ្ណា សាស្ត្រាចារ្យផ្នែករបាំនៅសាលាភូមិន្ទវិចិត្រសិល្បៈ ជាគ្រូរបស់នារីជប៉ុនរូបនេះ ឲ្យដឹងថា កូនសិស្សអ្នកគ្រូមានឈ្មោះថា យ៉ាម៉ាណាកា ហ៊ីតូមិ បានហាត់រៀនផ្នែករបាំខ្មែរ អស់ជាង២០ឆ្នាំមកហើយ។ កញ្ញា យ៉ាម៉ាណាកា ហ៊ីតូមិ ចូលចិត្ត និងស្រលាញ់របាំខ្មែរខ្លាំងណាស់ ម្ល៉ោះហើយរូបនាងឧស្សាហ៍ឡើងចុះកម្ពុជា- ជប៉ុន ដើម្បីសិក្សានិងរៀនផ្នែកនេះឲ្យបានច្រើន។ រយៈពេលហាត់រៀនអស់ច្រើនឆ្នាំមកនេះ កញ្ញា ចេះរបាំខ្មែរបានច្រើន និងថែមទាំងបានចូលប្រឡងនៅសាលាវិចិត្រសិល្បៈដោយទទួលបានលទ្ធផលល្អថែមទៀតផង។

អ្នកគ្រូវ័យ៧០រូបនេះ បន្តថា យ៉ាម៉ាណាកា ហ៊ីតូមិ អាចនិយាយភាសាខ្មែរបានតិចតួច តែជាមនុស្សស្រលាញ់សិល្បៈរបាំខ្មែរណាស់ ព្រោះសូម្បីនៅប្រទេសជប៉ុន ក៏រូបនាងខំប្រឹងបង្កើតសមាគមរបាំខ្មែរមួយផងដែរ ដោយរ៉ាប់រងម្នាក់ឯង ហើយតែងបញ្ជូនសិស្សឲ្យមកហាត់រៀនមួយឆ្នាំម្ដងនៅកម្ពុជា ដើម្បីសិក្សាស្វែងយល់ស៊ីជម្រៅពីរបាំបុរាណខ្មែរទៀតផង។

កញ្ញា យ៉ាម៉ាណាកា ហ៊ីតូមិ កំពុងហាត់របាំជាមួយអ្នកគ្រូ ឱម យុវណ្ណា

ចំពោះរបាំដែលកញ្ញា យ៉ាម៉ាណាកា បង្ហាញជូនទស្សនិកជនទស្សនា នៅមជ្ឈមណ្ឌលសហប្រតិបត្តិការកម្ពុជា-ជប៉ុន កាលពីថ្មីៗនោះ បានចំណាយពេលហាត់រៀនជាងមួយខែ យ៉ាងយកចិត្តទុកដាក់បំផុត ដោយមានការចូលរួមស្មូតដោយលោកគ្រូ យ៉ាន់ បូរិន និងបំបែកក្បាច់ដោយអ្នកគ្រូ វណ្ណា។ ក្រៅពីនេះ យ៉ាម៉ាណាកា ធ្លាប់បានបង្ហាញសមត្ថភាពតាមកម្មវិធីជាច្រើនដូចជា ពិធីបុណ្យប្រពៃណីផ្សេងៗទាក់ទងនឹងប្រទេសជប៉ុននៅក្នុងប្រទេសកម្ពុជា សិក្ខាសាលា និងកម្មវិធីមួយចំនួន នៅតាមសាលាជាច្រើន៕

ទស្សនាកញ្ញា យ៉ាម៉ាណាកា ហ៊ីតូមិ រាំរបាំខ្មែរ នៅលើឆាកក្នុងពិធីបុណ្យ តាណាបាតា៖