Lee Tae Hoon ៖ ពាន AFF U-15 យើងត្រៀមខ្លួនរួចហើយក្នុងការជួបក្រុមខ្លាំង

2018-07-17 04:33:40
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Lee Tae Hoon គ្រូបង្វឹកក្រុមបាល់ទាត់ U-15 កម្ពុជាជឿជាក់ទៅលើកូនក្រុមរបស់ខ្លួនអាចធ្វើបានល្អបន្ទាប់ពីធ្វើការហ្វឹកហាត់យ៉ាងខ្លាំង ក្នុងការត្រៀមជួបក្រុមខ្លាំងៗ សម្រាប់ព្រឹត្តិការណ៍ AFF U-15 Championship 2018 ដែលគ្រោងរៀបចំឡើងនៅប្រទេសឥណ្ឌូណេស៊ីចន្លោះពីថ្ងៃទី២៧ ខែកក្កដា ដល់ថ្ងៃទី១១ ខែសីហា ឆ្នាំ២០១៨។

លោក Lee Tae Hoon

អតីតគ្រូបង្វឹកក្រុមជម្រើសជាតិកម្ពុជារូបនេះបានឲ្យដឹងថា កូនក្រុមរបស់លោកបានធ្វើការហ្វឹកហាត់យ៉ាងខ្លាំងក្នុងការត្រៀមខ្លួនសម្រាប់ព្រឹត្តិការណ៍ខាងលើ។ លោកមិនទាន់ហ៊ានសន្យាថា អាចឆ្លងផុតវគ្គជម្រុះតាមពូលឬយ៉ាងណានោះទេ។ ប៉ុន្តែនឹងព្យាយាមធ្វើឲ្យបានល្អបំផុតតាមដែលអាចធ្វើទៅបាន។

ក្នុងការស្ថិតនៅជាមួយពូលដែលមានក្រុមខ្លាំងៗដូច្នេះ វាជារឿងល្អមួយក្នុងការទទួលបានបទពិសោធ និងជាជំហានអភិវឌ្ឍន៍កម្រិតនៃការលេងរបស់យុវជន U-15 កម្ពុជា។ ក្រុម U-15 កម្ពុជាស្ថិតនៅពូល A ជាមួយម្ចាស់ផ្ទះ ឥណ្ឌូណេស៊ី វៀតណាម ទីម័រខាងកើត ហ្វីលីពីន និងមីយ៉ាន់ម៉ា។

ក្រុម U-15 កម្ពុជាបានចេញដំណើរទៅប្រទេសម៉ាឡេស៊ីកាលពីព្រឹកមិញនេះ ដើម្បីត្រៀមការប្រកួតមិត្តភាពចំនួន២ប្រកួតគឺថ្ងៃទី២០ ប៉ះជម្រើសជាតិ U-16 របស់ម៉ាឡេស៊ី និង ថ្ងៃទី២៣ ប៉ះក្រុម U19 របស់ក្លឹប UITM ។ បន្ទាប់មកបន្តបោះជុំរុំហ្វឹកហាត់នៅទីនោះរហូតដល់ថ្ងៃទី២៧ ទើបចេញដំណើរទៅប្រទេសឥណ្ឌូណេស៊ីតែម្ដង៕