ក្រុមការងារ Guinness World Records នឹងវិលមកកម្ពុជាឆាប់ៗនេះ
- 2018-07-18 08:40:29
- ចំនួនមតិ 0 | ចំនួនចែករំលែក 0
ក្រុមការងារ Guinness World Records នឹងវិលមកកម្ពុជាឆាប់ៗនេះ
ចន្លោះមិនឃើញ
ក្រុមការងារបំបែកកំណត់ត្រាឯតទគ្គកម្មពិភពលោក (Guinness World Records)នឹងវិលមកកាន់កម្ពុជាជាថ្មីម្តងទៀតនៅចុងខែសីហា ឆ្នាំ២០១៨ ខាងមុខ ដើម្បីមកវិនិច្ឆ័យផ្ដល់ជូនកំណត់ត្រាដល់ទូក “ង” វែងជាងគេរបស់កម្ពុជា។
លោក ងិន ប៉ាណាល់ អនុប្រធានគណៈកម្មការផលិតទូកវែងជាងគេ បានឱ្យដឹងថា គិតមកដល់ពេលនេះការផលិតទូកវែងជាងគេសម្រេចបាន៩០% ហើយគ្រោងបញ្ចប់ការផលិតនៅចុងខែនេះ។ បន្ទាប់ពីចប់ការផលិតក្រុមការងារនឹងយកទៅបណ្ដែតទឹក និងអុំសាកល្បងសិន មុនការមកដល់របស់ក្រុមការងារបំបែកត្រាពិភពលោកចុះវិនិច្ឆ័យនៅចុងខែសីហា។
“អញ្ចឹងយើងត្រូវតេស្តផ្ទៃក្នុងខ្លួនយើងសិន ដើម្បីឱ្យដឹងថា ទូកអាចអុំបានឬយ៉ាងម៉េច? យើងអាចមានពេលកែកុនចាប់ពីដើមខែក្រោយរហូតដល់ពាក់កណ្ដាលខែសីហា មុនក្រុមការងារបំបែកកំណត់ត្រាចុះមក”។
ទូក “ង” វែងជាងគេនេះ មានប្រវែង៨៥,៥ម៉ែត្រ ទទឹង១,៥៥ម៉ែត្រ ដាក់ចំណុះទូកបាន ១៧៩នាក់។ ក្បាលទូកឆ្លាក់ចេញជាក្បាលនាគ កន្ទុយឆ្លាក់ចេញជាកន្ទុយហង្ស។ លោក ងិន ប៉ាណាល់ ឱ្យដឹងទៀតថា ក្បាច់រចនាផ្កាភ្ញីឆ្លាក់នៅលើទូក “ង” នេះក៏បានឆ្លងយោបល់ពីក្រសួងវប្បធម៌ និងវិចិត្រសិល្បៈផងដែរ។ ការផលិតទូក “ង” គឺជាការបង្ហាញពីប្រវត្តិដ៏យូរលង់ នៃការផលិត និងការប្រើប្រាស់ទូករបស់ខ្មែរតាំងពីសម័យបុរាណ និងជួយលើកតម្កើងកិត្យានុភាពជាតិ ដោយបង្ហាញឲ្យពិភពលោកទាំងមូលបានដឹងកាន់តែច្បាស់ថា កម្ពុជាអាចបង្កើតស្នាដៃដ៏អស្ចារ្យមួយបាន មិនត្រឹមតែកសាងប្រាសាទ ដ៏អស្ចារ្យរបស់មហាវីរក្សត្រជំនាន់មុនទេ ប៉ុន្តែកូនខ្មែរជំនាន់ក្រោយក៏អាចសាងបានភាពអស្ចារ្យរបស់ខ្លួនដោយឡែកបានដែរ។
“សម្រាប់ខ្ញុំ ខ្ញុំគិតថា យើងអាចបំបែកបានព្រោះបានពិភាក្សា និងឯកភាពជាមួយនឹងក្រុមការងារផ្នែកបំបែកកំណត់ត្រា ទាក់ទងនឹងបច្ចេកទេសនៃការធ្វើ ហើយប្រវែងអីបានឯកភាពចុះជាកិច្ចសន្យារួចហើយ។ ដូច្នេះសម្រាប់ខ្ញុំនឹងក្រុមការងារសប្បាយចិត្តមែនទែន ដោយយើងបានរួមចំណែកមួយផ្នែកសម្រាប់ផលិតទូកនេះឡើងជាការបង្កើនកិត្យានុភាពជាតិយើង ហើយបើយើងបកមកវិញថ្ងៃទី១ ដែលថ្ងៃដឹកឈើមកដំបូងយើងក៏មិននឹកស្មានថាអាចផលិតទូកមួយសម្បើមមែនទែន”។
ទូក ង វែងជាងគេនេះ សហភាពសហព័ន្ធយុវជនកម្ពុជាខេត្តព្រៃវែងបានធ្វើក្រុងពាលី កាលពីថ្ងៃទី៨ ខែមេសា ឆ្នាំ២០១៨ ដើម្បីចាប់ផ្ដើមដំណើរការធ្វើ ។ គួរបញ្ជាក់ថា ទូក ង ដែលវែងជាងគេលើពិភពលោកនាពេលបច្ចុប្បន្ន គឺជាទូករបស់ប្រទេសចិន ដែលមានប្រវែង ៧៧,៨ម៉ែត្រ ដោយបានបំបែកឯតទគ្គកម្មកាលពីឆ្នាំ២០១៧៕