កូនខ្មែរម្នាក់ចាយរាប់ពាន់ដុល្លារ ចូលព្រៃស្ទើគ្រប់ទិសទីនៅកម្ពុជា ក្រោមហេតុផលអស្ចារ្យបំផុត
- 2018-07-19 06:52:39
- ចំនួនមតិ 0 | ចំនួនចែករំលែក 0
កូនខ្មែរម្នាក់ចាយរាប់ពាន់ដុល្លារ ចូលព្រៃស្ទើគ្រប់ទិសទីនៅកម្ពុជា ក្រោមហេតុផលអស្ចារ្យបំផុត
ចន្លោះមិនឃើញ
ស៊ុយ សេងលីម ជាកូនខ្មែរមួយរូបទៀតហើយ សុខចិត្តចំណាយលុយផ្ទាល់ខ្លួនរាប់ពាន់ដុល្លារ និងប្រឈមការលំបាកគ្រប់បែបយ៉ាង ដើម្បីចុះស្រាវជ្រាវសត្វស្លាបនានាដែលមានវត្តមាននៅប្រទេសកម្ពុជា ដើម្បីយកមកផ្សព្វផ្សាយឲ្យពលរដ្ឋបានស្គាល់ហើយបណ្ដុះចិត្តឲ្យចេះស្រលាញ់ ឈប់ហូបសាច់ព្រៃ និងអភិរក្សសត្វដែលនៅសេសសល់ទាំងប៉ុន្មានឲ្យគង់វង្សតទៅមុខទៀត។
១. មូលហេតុជំរុញឲ្យចុះស្រាវជ្រាវ និងបង្កើតគម្រោង
ផ្ដល់បទសម្ភាសន៍មកកាន់ Sabay បុរសវ័យ៣៧ឆ្នាំរូបនេះប្រាប់ថា មូលហេតុដែលនាំឲ្យលោកហ៊ានលះបង់ទាំងកម្លាំងកាយ និងលុយដោយមិនស្ដាយស្រណោះចុះស្រាវជ្រាវសត្វស្លាប ដោយសារតែកាលពីក្មេងលោកធ្លាប់ឃើញសត្វស្លាប ក៏ដូចជាសត្វព្រៃនៅកម្ពុជារស់នៅដោយសុខសាន្តពេញដឹកពេញដី។ ចំណែកឯព្រៃឈើក៏នៅច្រើនជាជម្រករស់នៅដ៏ត្រជាក់ត្រជុំដល់ម្រឹគីម្រឹគាទាំងឡាយ តែក្រោយៗមកទៀត សត្វស្លាបក៏ដូចជាសត្វព្រៃដទៃទៀត ចាប់ផ្ដើមបាត់បង់បន្តិចម្ដងៗដោយសារមនុស្សចេះតែបរបាញ់យកមកជួញដូរ និងធ្វើជាអាហារ។ ក្នុងនាមជាអ្នកស្រលាញ់សត្វម្នាក់ លោកមិនអាចឈរមើលការបន្តបាត់បង់សត្វស្លាបបន្តទៀតបានទេ ទើបនៅខែមីនា ឆ្នាំ២០១២ លោក ស៊ុយ សេងលីម បានបង្កើតគម្រោងមួយមានឈ្មោះថា «គម្រោងការអប់រំ និងការអភិរក្សសត្វស្លាបកម្ពុជា» ដែលលោកផ្ទាល់ជាស្ថាបនិកម្នាក់ឯងប៉ុណ្ណោះពុំមានការចូលរួមពីក្រសួង ឬស្ថាប័នណាមួយឡើយ។
២. ការចុះស្រាវជ្រាវ និងការចំណាយ
ចាប់តាំងពីចាប់ផ្ដើមគម្រោងអ្នកស្រលាញ់សត្វព្រៃរូបនេះ ប្រាប់ថាបានចុះស្រាវជ្រាវម្នាក់ឯងស្ទើរគ្រប់ទិសទីក្នុងព្រៃសំខាន់ៗនៅកម្ពុជា នៅសល់តែតំបន់មួយចំនួនប៉ុណ្ណោះដែលលោកមិនទាន់បានទៅដល់ និងមានគម្រោងទៅឲ្យបានមានដូចជា៖ ឧទ្យានជាតិវីរៈជ័យ សៀមប៉ាង តំបន់ព្រៃខេត្តឧត្ដរមានជ័យ ត្រពាំងថ្មនៅបន្ទាយមានជ័យជាដើម។ ក្នុងការចុះស្រាវជ្រាវដើម្បីផ្ដិតយករូបភាពក្នុងមួយជើងៗលោកត្រូវចំណាយថវិកាប្រមាណ១៥០ដុល្លារ ហើយគិតចាប់ពីឆ្នាំ២០១២មកដល់ពេលនេះ លោកបានធ្វើដំណើរ១០០លើកមកហើយ។ លុះក្រោយៗមកទៀតក៏មានមិត្តភក្ដិរបស់លោកពីរបីនាក់ស្ម័គ្រចិត្តចុះព្រៃទៅជាមួយលោកដែរ។
៣. ឧបសគ្គ និងផលលំបាក
ឧបសគ្គធំជាងគេនោះ គឺរឿងថវិកា ត្រូវប្រើលុយផ្ទាល់ខ្លួនសុទ្ធសាធពុំមានការឧបត្ថម្ភ ឬចូលរួមពីស្ថាប័នណាមួយឡើយ។ មិនមែនជារឿងងាយស្រួលឡើយក្នុងការស្រាវជ្រាវពីប្រភេទសត្វស្លាបនេះ សេងលីម ត្រូវរកឯកសារស្រាវជ្រាវជាច្រើនជាភាសាអង់គ្លេស តែនេះមិនមែនជាបញ្ហាចោទឡើយចំពោះភាសាបរទេស ព្រោះលោកបានបញ្ចប់ការសិក្សាថ្នាក់បរិញ្ញាបត្រមក ពីសាកលវិទ្យាល័យបញ្ញាសាស្ត្រកម្ពុជា។ គួបផ្សំនឹងការណែនាំ សាកសួរ បន្ថែមពីអ្នកស្រាវជ្រាវជីវិតសត្វព្រៃពីជនជាតិបារាំង២រូប ដែលជាបុគ្គលដ៏សំខាន់ជួយជំរុញឲ្យការស្រាវជ្រាវរបស់លោកប្រព្រឹត្តិទៅដោយរលូន។
ក្រៅពីការលំបាកក្នុងការស្រាវជ្រាវឯកសារហើយនោះ សេងលីម ត្រូវប្រឈមបញ្ហាអាកាសធាតុ ពេលចុះព្រៃ និងឧបសគ្គរាប់មិនអស់ជាច្រើនទៀត។ លើសពីនេះទៀតត្រូវឃ្លាតឆ្ងាយពីគ្រួសារប្រពន្ធកូនជាទីស្រលាញ់។ តែបញ្ហាទាំងនេះមិនអាចចាត់ទុកជាផលលំបាកសម្រាប់លោកឡើយ តែផ្ទុយមកវិញវាជាអារម្មណ៍រំភើបរីករាយនឹងប្រឈម ចំពោះមនុស្សដែលស្រលាញ់ធម្មជាតិដូចជារូបលោក។
៤. អារម្មណ៍ពិតពេលចុះព្រៃ
ប្រាប់ដោយអារម្មណ៍ទាំងរំភើប ស៊ុយ សេងលីម និយាយថា នៅក្នុងប្រទេសកម្ពុជាមានសល់សត្វស្លាបក៏ដូចជាសត្វព្រៃជាច្រើនប្រភេទទៀត ដែលគ្រប់គ្នាអាចមិនដឹង ហើយគិតថាប្រហែលជាបាត់បង់ ឬផុតពូជអស់ហើយ។ ពិបាកក្នុងការប្រាប់ថារំភើបប៉ុណ្ណា អ្នកអភិរក្សសត្វស្លាបកម្ពុជារូបនេះ បន្តថា លោកបានឃើញទិដ្ឋភាពព្រៃឈើ រុក្ខជាតិដ៏ស្រស់បំព្រង និងឃើញសត្វស្លាបស្អាតៗ រូបរាងខុសប្លែកគ្នា រំលេចពណ៌ដ៏ឆើតឆាយកំពុងរស់នៅដោយសុខសាន្តនៅលើដែនដីកម្ពុជាយើង។
ចំពោះសម្ភារៈឧបករណ៍ក្នុងការចុះស្រាវជ្រាវម្ដងៗមានដូចជា៖ Len 400mm Camera Canon ឧបករណ៍ចាក់សំឡេងសត្វ តង់សម្រាប់បោះគេង អង្រឹង និងស្បៀងអាហារមួយចំនួន។ ដើម្បីថតបានរូបភាពដ៏ល្អមួយលោកត្រូវប្រើពេលវេលាយូរ និងការអត់ធ្មត់ខ្លាំងបំផុត ពេលខ្លះសឹងតែមួយថ្ងៃថតបានសត្វតែមួយប្រភេទប៉ុណ្ណោះ។ ចំពោះចិត្តរបស់លោកគ្រប់ប្រភេទសត្វទាំងអស់សុទ្ធតែអស្ចារ្យ និងស្អាតបំផុត ក្នុងការចុះស្រាវជ្រាវរយៈពេល៦ឆ្នាំមកនេះលោកបានឃើញវត្តមានសត្វកម្រស្ទើផុតពូជមាននៅកម្ពុជាដូចជា៖ ត្រយ៉ងយក្ស សត្វខ្សឹប ត្មាត( ត្មាតភ្លើង ត្មាតផេះ ត្មាតត្នោត) ត្រយ៉ងចង្កំកស ក្ងោក ក្រៀល ជាដើម។ អ្វីដែលរឹតតែអស្ចារ្យនោះគឺមានសត្វបំលាស់ទី (Spoon-billed Sandpiper) មកពីបណ្ដាប្រទេសនានាលើពិភពលោកមករស់នៅក្នុងព្រៃកម្ពុជា។
៥. សមិទ្ធផលដែលទទួលបាន និងគោលដៅបន្ត
រយៈពេល៦ឆ្នាំ ចុះព្រៃចុះវាលដងស្ទឹង ដងអូរ ដែនកោះ ដែនសមុទ្រកន្លងមក ស៊ុយ សេងលីម បានស្រាវជ្រាវ និងថតបានសត្វស្លាបជាង៤០០ប្រភេទហើយ ក្នុងចំណោមសត្វស្លាបជាង៦០០ប្រភេទដែលកំពុងមានវត្តមាននៅកម្ពុជា។ ក្រៅពីសត្វស្លាប សេងលីម ក៏បានផ្ដិតយករូបភាពសត្វប្រភេទផ្សេងទៀតទាំងប្រភេទសត្វល្មូន សត្វជើងបួនជាច្រើនទៀត។ ជាពិសេសលោកបានកៀងគរមនុស្សជាច្រើនផ្សេងទៀតឲ្យចាប់អារម្មណ៍ការចុះស្រាវជ្រាវ និងថតជីវិតសត្វព្រៃដូចជារូបលោកដែរ។
សមិទ្ធផលដែលលោកទទួលបានមិនមែនជាប្រាក់ចំណេញ តែមានតម្លៃជាងលុយទៅទៀតនោះ គឺបានឃើញនូវទិដ្ឋភាពដ៏អស្ចារ្យក្នុងព្រៃកម្ពុជា ហើយនាំយកអ្វីដែលលោកស្រាវជ្រាវបានមកធ្វើបទបង្ហាញតាមសាលា តាមសហគមន៍ តាមរយៈការតាំងពិព័រណ៍ផ្សេងៗ ដើម្បីឲ្យជនរួមជាតិខ្មែរបានដឹងថា កម្ពុជានៅសល់សត្វព្រៃច្រើនប្រភេទទៀត ដែលយើងគួរតែរួមគ្នាការពារចាប់ពីពេលនេះទៅ អ្វីដែលយើងនៅមានកុំឲ្យបាត់បង់បន្តទៀត។
អ្នកស្រាវជ្រាវជីវិតសត្វព្រៃមានដើមកំណើតមកពីខេត្តកណ្ដាលរូបនេះ ក៏ប្រាប់ទៀតថា លោកមានគម្រោងបោះពុម្ពសៀវភៅអំពីប្រភេទសត្វស្លាបនៅកម្ពុជា មានសរសេរលម្អិតទាំងភាសាខ្មែរ និងអង់គ្លេសចែកជូនដោយឥតគិតថ្លៃនៅតាមសាលា សហគមន៍ អង្គការនានាក្នុងប្រទេសកម្ពុជា ហើយនេះជាគោលបំណងធំបំផុតក្នុងជីវិតលោក៕
សូមទស្សនាការរៀបរាប់បទពិសោធន៍ចូលព្រៃរបស់លោក ស៊ុយ សេងលីម៖