Smart ថែមទុនបម្រុង ៨០លានដុល្លារពង្រីកបណ្តាញ 4G និង 4.5G តាមជនបទ

2018-07-23 06:32:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយផ្តោតលើការពង្រីកប្រព័ន្ធ 4G និង 4.5G នៅទូទាំង ២៥ខេត្ត-ក្រុងទូទាំងប្រទេសឆ្នាំនេះ Smart ថែមទុនបម្រុងដល់ទៅ ៨០ លានដុល្លារពង្រីកបណ្តាញទូរសព្ទចល័តច្រើនខេត្តនៅកម្ពុជា។

រហូតមកទល់បច្ចុប្បន្ននេះ ក្នុងចំណោមស្ថានីយ៍មូលដ្ឋានចំនួន ២ ៥០០ កន្លែង របស់ Smart មានជាង ៩០ ភាគរយហើយ ដែលមានបំពាក់ប្រព័ន្ធ 4G ខណៈដែលស្ថានីយ៍មូលដ្ឋាន ១០០ ភាគរយសុទ្ធតែបំពាក់ដោយប្រព័ន្ធ 3G ។

ក្នុងនោះកាលពីពេលថ្មីៗនេះ ក្រសួងប្រៃសណីយ៍ និងទូរគមនាគមន៍កម្ពុជា និងក្រុមហ៊ុន Smart Axiata ប្រារព្ធពិធីបើកការដ្ឋានសាងសង់ហេដ្ឋារចនាសម្ព័ន្ធបណ្តាញទូរសព្ទចល័ត នៃមូលនិធិកាតព្វកិច្ចសេវាសកលទូរគមនាគមន៍ ៣១ កន្លែងនៅក្នុងពិធីដែលរៀបចំនៅខេត្តកំពង់ឆ្នាំង ដែលជាស្ថានីយ៍ទី ៦ក្នុងចំណោម ១០ខេត្ត ។

ឯកឧត្ដម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជា និងជាប្រធានក្រុមប្រឹក្សាភិបាលមូលនិធិកាតព្វកិច្ចសេវាសកលទូរគមនាគមន៍ បានថ្លែងអំណរគុណដល់ក្រុមហ៊ុន Smart ដែលបានចូលរួមបំពេញកាតព្វកិច្ច បង់វិភាគទានមូលនិធិកាតព្វកិច្ចសេវាសកលទូរគមនាគមន៍ ដែលនឹងជួយធ្វើឲ្យសេវាគ្របដណ្ដប់រលកអាកាសប្រព័ន្ធទូរសព្ទឲ្យកាន់តែប្រសើរនៅតាមជនបទ។

មូលនិធិកសាងសមត្ថភាព ការស្រាវជ្រាវ និងអភិវឌ្ឍន៍ (CBRDF) ត្រូវបានបង្កើតឡើងនៅឆ្នាំ ២០១៧។ មូលនិធិទាំងនេះ មានគោលបំណងជំរុញការអភិវឌ្ឍហេដ្ឋារចនាសម្ព័ន្ធ សេវាកម្ម និង ការអភិវឌ្ឍធនធានមនុស្សនៅទូទាំងប្រទេស។ នៅក្នុងឆ្នាំ ២០១៧ ក្រុមហ៊ុន Smart បានប្តេជ្ញាអនុវត្ត គម្រោងជាមួយក្រសួងប្រៃសណីយ៍ និងទូរគមនាគមន៍ ដោយប្រើប្រាស់ប្រាក់វិភាគទានរបស់ខ្លួន ជាង ៦ លានដុល្លាអាមេរិក ដែលបានបញ្ចូលក្នុងមូលនិធិទាំងពីរនេះ។

សម្រាប់ព័ត៌មានបន្ថែម និងព័ត៌មានថ្មីៗពីក្រុមហ៊ុន Smart Axiata សូមចូលទៅកាន់ទំព័រហ្វេសប៊ុករបស់ Smart តាមរយៈ www.facebook.com/SmartAxiata ឬចូលទៅកាន់គេហទំព័រ www.smart.com.kh ។

អត្ថបទ៖ ថា ម៉ាលីដា

ពាក្យទាក់ទង