កីឡាករ៣រូបមិនសមអត់ឈ្មោះដណ្ដើមពាន FIFA Best Men’s Player Award

2018-07-25 08:39:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពានកីឡាករបាល់ទាត់ឆ្នើមប្រចាំឆ្នាំ ឬ FIFA World Player of the Year award បានបង្កើតឡើងតាំងពីឆ្នាំ១៩៩១ ដល់២០០៩ ហើយបានចូលគ្នាតែមួយជាមួយ Ballon d’Or បង្កើតបានជា FIFA Ballon d’Or award នៅឆ្នាំ២០១០។

ក្រោយរួមគ្នា៦ឆ្នាំ ពានផ្ទាល់ខ្លួនដ៏សំខាន់នេះបានផ្ដាច់ចេញវិញនៅឆ្នាំ២០១៦រហូតដល់បច្ចុប្បន្ននេះ។ Cristiano Ronaldo ជាកីឡាករម្នាក់គត់តែងឈ្នះពាននេះចាប់តាំងពីការបំបែកពី Ballon d’Or នៅឆ្នាំ២០១៦ និង២០១៧។

ឆ្នាំ២០១៨ នេះ FIFA បានបង្ហាញបេក្ខភាព១០នាក់ចុងក្រោយរួចហើយ ដែលមានសិទ្ធដណ្ដើមពាននេះមានដូចជា Cristiano Ronaldo, Kevin De Bruyne, Antoine Griezmann, Eden Hazard, Harry Kane, Kylian Mbappe, Lionel Messi, Luka Modric, Mohamed Salah និង Raphael Varane។

Neymar គឺជាកីឡាករទទួលការចាប់អារម្មណ៍ខ្លាំងក្រោយគ្មានឈ្មោះប៉ុន្តែកុំភ្លេចថាខ្សែប្រយុទ្ធរូបនេះចំណាយពេលភាគច្រើនព្យាបាលរបួសប៉ុណ្ណោះកាលពីរដូវកាលមុន។ អ្វីដែលគួរឲ្យភ្ញាក់ផ្អើលពិតប្រាកដនោះគឺអវត្តមានកីឡាករ៣រូបខាងក្រោម ដែលលេងល្អទាំងនៅក្លឹប និង World Cup តែគ្មានឈ្មោះប្រជែងពាននឹងគេ។

#៣ Ivan Rakitic

Ivan Rakitic គឺជាខ្សែបម្រើល្អបំផុតមួយរូបនៅលើពិភពលោកនាពេលបច្ចុប្បន្ន។ កីឡាកររូបនេះលេងបាន៧១ប្រកួតកាលពីរដូវកាលមុនច្រើនជាងកីឡាករណាទាំងអស់។ គេក៏ជាកម្លាំងសំខាន់ជួយ Barcelona ឈ្នះ La Liga និង Copa del Rey ផងដែរ ថែមទាំងជួយក្រូអាតឡើងដល់វគ្គផ្ដាច់ព្រ័ត្រ World Cup តែភ្លាត់ចាញ់បារាំង។

#២ N’Golo Kante

N’Golo Kante ប្រហែលជាមិនសូវមាននរណាចាប់អារម្មណ៍ទេដោយសារគេមិនមែនជាខ្សែប្រយុទ្ធសុទ្ធបញ្ចូលទី ប៉ុន្តែកីឡាករស្បែកខ្មៅរូបនេះបំពេញតួនាទីយ៉ាងល្អនៅតំបន់បម្រើការពារ ពិសេសការតាមបិទកីឡាករសំខាន់ៗរបស់គូប្រជែងដូចជា Messi កាលលេងប៉ះអាហ្សង់ទីន និងកីឡាករ Lukaku របស់ប៊ែលហ្សិក។ អាចនិយាយបានថាជោគជ័យរបស់បារាំងគឺជាការរួមចំណែកធំរបស់ Kante។

#១ Paul Pogba

មិនខុសពី N’Golo Kante ប៉ុន្មានទេ Paul Pogba ក៏ជាកម្លាំងសំខាន់នៅតំបន់ការពារក្នុងដំណើរឆ្ពោះទៅជើងឯករបស់បារាំងដែរ។ Pogba ជាដៃគូល្អឥតខ្ចោះរបស់ Kante នៅ World Cup ថែមទាំងជាអ្នកស៊ុតបញ្ចូលទី១គ្រាប់នៅវគ្គផ្ដាច់ព្រ័ត្រថែមទៀតផង។ តែគួរឲ្យស្ដាយកីឡាករមកពី Manchester United គ្មានឈ្មោះសូម្បីបញ្ជី១០នាក់ចុងក្រោយសម្រាប់ពាន FIFA World Player of the Year award៕