គ្រាន់តែបាន Ronaldo ភ្លាម លេចដំណឹង Juventus ចង់លក់ Higuain ភ្លែត ខណៈក្លឹបខ្លះកំពុងអង្រួន
- 2018-07-27 11:13:56
- ចំនួនមតិ 0 | ចំនួនចែករំលែក 0
គ្រាន់តែបាន Ronaldo ភ្លាម លេចដំណឹង Juventus ចង់លក់ Higuain ភ្លែត ខណៈក្លឹបខ្លះកំពុងអង្រួន
ចន្លោះមិនឃើញ
នាយកប្រតិបត្តិក្លឹប Juventus លោក Giuseppe Marotta ក្នុងថ្ងៃនេះ បាននិយាយថា កីឡាករប្រយុទ្ធរបស់ក្លឹប មានចំនួនច្រើន។ លោកថា ក្លឹបកំពុងពិនិត្យស្ថានភាពនៃការផ្ទេររបស់ខ្សែប្រយុទ្ធ Gonzalo Higuain ប៉ុន្តែមកទល់ពេលនេះ មិនទាន់សំណើច្បាស់លាស់ណាមួយពីក្លឹបដទៃឡើយ។
លោក Marotta បាននិយាយប្រាប់ Sky Italia ថា៖ "ខ្ញុំមិនប្រកែកទេថា ឥឡូវយើងមានចំនួនកីឡាករប្រយុទ្ធច្រើន ក្រោយពីផ្ទេរបាន Cristiano Ronaldo មក"។
នាយកប្រតិបត្តិក្លឹបបន្ត៖ "យើងកំពុងពិនិត្យវាយតម្លៃស្ថានភាពរបស់ Higuain។ យ៉ាងនេះក្ដីរហូតមកទល់ពេលនេះ មិនទាន់មានសំណើផ្ទេរជាក់លាក់ណាមួយពី Chelsea ឬ AC Milan ឡើយ"។
សូមបញ្ជាក់ផងដែរថា ការបង្ហើរពាក្យសំដីចង់លក់ Higuain នេះ ធ្វើឡើងតែជាង ២ សប្ដាហ៍ប៉ុណ្ណោះ ក្រោយក្លឹប Juventus ទិញខ្សែប្រយុទ្ធ Ronaldo បានពី Real Madrid។
តាមពិតទៅ កាលពីពេលក្លឹបយក្សអ៊ីតាលីផ្ទេរ Higuain ក៏មិនថោកប៉ុន្មានដែរ។ កាលពីឆ្នាំ ២០១៦ ក្លឹប Juventus បានទិញ ខ្សែប្រយុទ្ធអាហ្សង់ទីនពី Napoliក្នុងតម្លៃដល់ទៅ ៩០ លានអឺរ៉ូ (ជាង ១០៤ លានដុល្លារសហរដ្ឋអាមេរិក)។
ក្នុងរយៈពេល ២ រដូវកាលនៅក្លឹបសេះបង្កង់ Higuain ត្រូវបានមើលឃើញថាបានបង្ហាញទម្រង់លេងល្អក្នុងប្រកួតភាគច្រើន។ កីឡាករស៊ុតចូលបានដល់ទៅ ៥៥ គ្រាប់ ក្នុងការបង្ហាញខ្លួន ១០៥ លើកឲ្យក្លឹប។
កន្លងមកជាពិសេសក្រោយពេល Ronaldo ចូលរួមជាមួយ Juventus មានរបាយការណ៍ និងពាក្យចចាមអារ៉ាមជាច្រើន ដែលថា ក្លឹប Chelsea និង AC Milan បានបង្ហាញចំណាប់អារម្មណ៍ខ្លាំងក្នុងការតាមទិញ Higuain៕