ការផ្ទេរកីឡាករ៥រូបដែលអ្នកចាត់ការនៅ Premier League មើលខុស

2018-07-30 03:52:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ការដោះដូរកីឡាករគឺជារឿងសំខាន់សម្រាប់អ្នកចាត់ការទូទៅនៃក្លឹបនីមួយៗត្រូវធ្វើដើម្បីរកប្រាក់ចំណេញឲ្យក្លឹប និងដើម្បីពង្រឹងការលេងរបស់ក្រុមផង។

ការផ្ទេរកីឡាករមិនមែនសុទ្ធតែត្រឹមត្រូវទាំងអស់ទេ គឺការទិញដូរខ្លះជាការសម្រេចចិត្តខុសរបស់អ្នកចាត់ការ ដូចជា រឿងចាយច្រើនលើកីឡាករខុស ទិញមកលេងមិនចុះសម្រុងជាមួយមិត្តរួមក្រុម រហូតពេលខ្លះអ្នកចាត់ការខ្លួនឯងត្រូវបណ្ដេញចេញព្រោះរឿងទិញដូរនេះក៏មាន។ ខាងក្រោមគឺកីឡាករ៥រូប ដែលអ្នកចាត់ការនៅ Premier League ទិញមកលេងមិនកើត៖

#៥ Leicester City (រដូវកាល២០១៦-១៧)

ក្រោយឈ្នះជើងឯក Premier League កក្រើកពិភពបាល់ទាត់ Leicester City បានចាយលុយមួយប្រាវរហូត ៨២,៤៤លានផោន ទិញកីឡាករនៅរដូវកាលបន្ទាប់ ពិសេសគឺការទិញខ្សែប្រយុទ្ធ Islam Slimani (២០លានផោន) ពី Sporting CP ដើម្បីពង្រឹងតំបន់ប្រយុទ្ធតែយ៉ាងណា កីឡាករនេះលេងមិនល្អសោះធ្វើឲ្យក្រុមបានត្រឹមបញ្ចប់លេខ១៣ ហើយលោក Claudio Ranieri ត្រូវបណ្ដេញចេញ។

#៤ Liverpool (រដូវកាល២០១៤-១៥)

ក្រោយបរាជ័យមិនអាចក្លាយជាជើងឯក Premier League ក្រុម Liverpool បានបាត់បង់ Luis Suarez ទៅលើ Barcelona ហើយលោក Brendan Rogers បានទិញយក Mario Balotelli ដើម្បីជំនួសខ្សែប្រយុទ្ធសញ្ជាតិអ៊ុយរ៉ាហ្គាយរូបនេះ ប៉ុន្តែខុសពីការរំពឹងទុក Balotelli ស៊ុតបញ្ចូលទីបាន១គ្រាប់ប៉ុណ្ណោះនៅលីគ។

#៣ Arsenal (២០១១-១២)

នៅឆ្នាំ២០១១ គឺជាពេលវេលាដែល Arsenal លក់កីឡាករសំខាន់ៗមួយចំនួនកំពុងឡើងជើងដូចជា Cesc Fabregas ទៅ Barcelona ក្នុងតម្លៃ៣០លានផោន ហើយ Samir Nasri ទៅ Manchester City ក្នុងតម្លៃ២៥លានផោន។ ក្រុមរហស្សនាមថាកាំភ្លើងធំបាននាំយក Mikel Arteta ពី Everton ដើម្បីពង្រឹងតំបន់បម្រើក្រោយបាត់បង់កីឡាករ២រូប ប៉ុន្តែកីឡាករសញ្ជាតិអេស្ប៉ាញរូបនេះមិនជោគជ័យប៉ុន្មានទេនៅទីនោះដោយ៥ឆ្នាំស៊ុតបញ្ចូលទីបាន១៤គ្រាប់ប៉ុណ្ណោះ។

#២ Chelsea (២០១៧-១៨)

ក្រោមការដឹកនាំរបស់លោក Antonio Conte ក្រុម Chelsea បានចាយលុយរហូត ៧០លានផោនបំបែកកំណត់ត្រារបស់ក្លឹបដើម្បីទិញយកខ្សែប្រយុទ្ធ Alvaro Morata មកកាន់ទឹកដី Stamford Bridge ប៉ុន្តែខុសពីការរំពឹងទុក កីឡាកររូបនេះធ្វើមិនបានល្អសោះនៅទឹកដីអង់គ្លេសរហូតជម្រើសដំបូងធ្លាក់ទៅលើ Olivier Giroud ជាកីឡាកដែលក្លឹបយកពី Arsenal ទៅវិញ។

#១ Tottenham Hotspurs (២០១៣-១៤)

បន្ទាប់ពី Gareth Bale ឈានដល់កម្រិតកំពូលហើយចាកចេញទៅ Real Madrid ក្នុងតម្លៃ ៨៥លានផោនបាត់ទៅអ្នកចាត់ការ Spurs ជំនាន់នោះគឺលោក Andre Vilas-Boas បាននាំយកខ្សែប្រយុទ្ធ Roberto Soldado ទៅជំនួសនៅតំបន់ប្រយុទ្ធតែកីឡាកររូបនេះបានកម្រិតខុសគ្នាឆ្ងាយពី Bale ដោយលេង៣ឆ្នាំរកបាន៧គ្រាប់ប៉ុណ្ណោះឲ្យក្រុមរហស្សនាមថាមាន់ខ្នាយមាស៕