ហេតុផល៣ ដែល Liverpool អាចស្គាល់ជាតិពាន Premier League លើកដំបូង

2018-07-31 03:16:45
ចំនួនមតិ 0 | ចំនួនចែករំលែក 0

ចន្លោះមិនឃើញ

Liverpool ធ្លាប់ជាក្រុមខ្លាំងនៅបាល់ទាត់អង់គ្លេសកាលពីទសវត្សឆ្នាំ៧០ និង៨០ ដោយឈ្នះជើងឯកលីគកំពូលអង់គ្លេសរហូត១៨ដង និងជើងឯកទ្វីបអឺរ៉ុបចំនួន៤ដងក្នុងយុគសម័យដែលមានកីឡាករល្បីៗដូចជា Kenny Dalglish, Ian Rush, Steve Grobbelaar, Alec Lindsay, Alan Hansen និង John Barnes ក្រោមការដឹកនាំរបស់វីរបុរសលោក Bill Shankly, Bob Paisley, និង Joe Fagan ជាដើម។

យ៉ាងណាចាប់តាំងពីក្របខ័ណ្ឌកំពូលអង់គ្លេសប្ដូរឈ្មោះទៅជា Premier League មករយៈពេល២៨ឆ្នាំហើយដែលក្រុមរហស្សនាមថាហង្សក្រហមមិនធ្លាប់ឈ្នះជើងឯកម្ដងណាសោះពោលបានត្រឹមរងជើងឯកប៉ុណ្ណោះ។ លើកចុងក្រោយដែល Liverpool សឹងតែក្លាយជាជើងឯកលីគកំពូលគឺនៅរដូវកាល ២០១៣/១៤ តែបែរជាភ្លាត់អស់ឱកាសទៅវិញបន្ទាប់ពីចាញ់ Chelsea និងស្មើ Crystal នៅ៣ប្រកួតចុងក្រោយ។

យ៉ាងណានៅរដូវកាលថ្មីក្រុមមានមូលដ្ឋានឈ្មោះ Anfield បានពង្រឹងសមត្ថភាពរបស់ខ្លួនយ៉ាងខ្លាំងក្រោមការដឹកនាំរបស់លោក Jurgen Klopp ដោយចាយលុយជាង១០០លានផោនហើយលើការដោះដូរកីឡាករ។ អ្នកចាត់ការសញ្ជាតិអាល្លឺម៉ង់បាននិយាយថាលោកមានគ្រប់កីឡាករដែលចង់បានអស់ហើយទល់ពេលនេះ ហើយវាក៏ដល់ពេលដែរ សម្រាប់ Liverpool ក្នុងការចាប់ផ្ដើមឈ្នះពានរង្វាន់។ ខាងក្រោមគឺជាមូលហេតុសំខាន់៣យ៉ាងដែលក្រុមនេះអាចឈ្នះ Premier League នៅរដូវកាលថ្មី៖

#៣ ការមកដល់របស់អ្នកចាំទី Alisson Becker

Jurgen Klopp គឺជាអ្នកចាត់ការ Liverpool ដំបូងដែលហ៊ានចាយលុយច្រើនបំផុតទិញអ្នកចាំទី ដោយបានចាយ៦៧លានផោន បំបែកកំណត់ត្រាពិភពលោកទិញយក Alisson Becker ពី Roma។ ក្រុមមួយនេះតែងរងការរិះគន់ថាមានប្រព័ន្ធការពារអន់ ពិសេសគឺអ្នកចាំទីចាប់តាំងពី Reina ចាកចេញទៅ។ នៅវគ្គផ្ដាច់ព្រ័ត្រ Champions League ២០១៨ ក្រុម Liverpool បានបាត់បង់ពានដោយសារកំហុស២លើកជាប់គ្នារបស់អ្នកចាំទី Lorius Karius ធ្វើឲ្យពួកគេចាញ់ Real Madrid ៣ទល់នឹង១ ដូច្នេះការទិញយកអ្នកចាំទីដៃទីមួយក្រុមជម្រើសជាតិប្រេស៊ីលគឺពិតជាគ្រឿងលើកទឹកចិត្តយ៉ាងសំខាន់ដល់ក្រុមសម្រាប់ការប្រជែងជើងឯកលីគកំពូល។

#២ កំណត់ត្រាល្អទល់នឹងក្រុមខ្លាំង

Liverpool ប្រហែលជាស្មើ និងចាញ់ច្រើនទល់នឹងក្រុមខ្សោយ ឬមធ្យម តែការប៉ះក្រុមខ្លាំងវិញពួកគេតែងធ្វើបានយ៉ាងល្អ។ ចាប់តាំងពី Klopp ទៅដល់ Anfield ក្រុម Liverpool មានលទ្ធផលវិជ្ជមានច្រើនពេលប៉ះក្រុមខ្លាំងៗដូចជា Arsenal, Manchester United, Spurs, Manchester City និង Chelsea ជាដើម។ កាលពីរដូវកាលមុនក្រុមនេះបានក្លាយជាក្រុមដំបូងដែលបញ្ចប់កំណត់ត្រាមិនដែលចាញ់របស់ City ដោយយកឈ្នះ ៤-៣ នៅ Anfield រួចបន្តយកឈ្នះនៅ Champions League ទៀតសរុបទាំង២ជើង ៥ទល់នឹង១។ បើសិន Liverpool អាចរក្សាការលេងល្អទល់ក្រុមខ្លាំង និងលេងកុំឲ្យភ្លាត់ទល់ក្រុមតូចៗដូច្នេះពួកគេពិតជាមានសង្ឃឹមដើម្បីលើកពាន Premier League។

#ក្រុមប្រយុទ្ធ៣រូបដ៏មានឥទ្ធិពល

ទោះមានខ្សែការពារទន់ តែ Liverpool គឺជាក្រុមមានប្រព័ន្ធប្រយុទ្ធខ្លាំងមួយនៅលើពិភពលោកពិសេសគឺ៣រូបខាងលើមាន Mohamed Salah, Mane និង Firmino។ Salah ជាម្ចាស់ស្បែកជើងមាសនៅ Premier League និងស៊ុតបញ្ចូលទីសរុប ៤៤គ្រាប់គិតលើគ្រប់កម្មវិធីកាលពីរដូវកាលមុន។ ខ្សែប្រយុទ្ធសញ្ជាតិអេហ្ស៊ីបក្ដោបពានជាច្រើនទៀតដូចជាកីឡាករល្អប្រចាំសប្ដាហ៍ និងកីឡាករល្អប្រចាំរដូវកាល។ ងាកទៅ Firmino និង Mane វិញក៏មិនធម្មតាដូចគ្នា ត្បិតពួកគេមានគ្រាប់បាល់តិចជាង តែកីឡាករទាំងពីរគឺជាកម្លាំងសំខាន់ជួយជ្រោមជ្រែង Salah នៅតំបន់ប្រយុទ្ធដោយមិនអាចខ្វះនរណាម្នាក់បាន។ កីឡាករទាំង៣រកគ្រាប់សរុបជិត១០០គ្រាប់ (៩១គ្រាប់) ឲ្យ Liverpool នៅរដូវកាល២០១៧/១៨៕