ព្រាប សុវត្ថិ បញ្ជាក់រឿងស៊ីកម្រៃជើងសារ ពី ឡេង ណាវ៉ាត់ត្រា លើជំនួញជាង៥លានដុល្លារ

2018-08-01 04:28:21
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីប្រកាសគម្រោងពុះដីឡូត៍លក់លើផ្ទៃដីជាង១៣ហិកតា ដោយប្រើដើមទុនជាង៥លានដុល្លារ រវាងតារាចម្រៀងលោក ព្រាប សុវត្ថិ ជាមួយឧកញ៉ា វ័យក្មេងឡេង ណាវ៉ាត់ត្រា ភ្លាម មានការលើកឡើងពីមហាជនមួយចំនួនថា វត្តមានរបស់តារាចម្រៀង ព្រាប សុវត្ថិ លើជំនួញនោះ តារាចម្រៀងរូបនេះមិនមានភាគហ៊ុនឡើយ ពោលលោកគ្រាន់តែឈរឈ្មោះឲ្យ ដើម្បីទាក់ទាញអតិថិជនមកទិញដីនោះជាថ្នូរនឹងការទទួលបានកម្រៃជើងសារពីការលក់ប៉ុណ្ណោះ ប៉ុន្តែការលើកឡើងនេះ ត្រូវបានលោក ព្រាប សុវត្ថិ ច្រានចោលថា មិនមែនជាការពិតឡើយ។

លោក ព្រាប សុវត្ថិ បានបញ្ជាក់ថា ខ្លួនគឺពិតជាមានភាគហ៊ុនលើគម្រោងពុះដីឡូត៍លក់លើផ្ទៃដីជាង១៣ ហិកតា ដោយប្រើដើមទុនជាង៥លានដុល្លារ នោះពិតប្រាកដមែន មិនមែនមកឈរឈ្មោះ ដើម្បីទទួលបានកុំមីស្យុង ឬកម្រៃជើងសារដូចការលើកឡើងឡើយ ប៉ុន្តែបែបនេះក្ដី តារាចម្រៀងរូបនេះមិន បានបង្ហើបពីភាគហ៊ុនរបស់ខ្លួនមានប៉ុន្មានភាគរយឡើយ។

"ដោយសារយើងមានអារម្មណ៍ដូចគ្នា គាត់ជោគជ័យខ្លាំងលើមុខរបរនេះ យើងក៏បានជួបគ្នាពិភាក្សាគ្នា យើងយើងក៏ព្រមរកស៊ីជាមួយគ្នា មិនមែនជាការស៊ីក្បាលកាក់ ឬកុំមីស្យងឡើយ គឺយើងមានភាគហ៊ុនជាមួយគ្នា" លោក ព្រាប សុវត្ថិ ថ្លែង។

កំពូលតារាចម្រៀងល្បីឈ្មោះប្រចាំប្រទេសកម្ពុជារូបនេះបានបន្តលើកឡើងថា មុនការការសម្រេចចិត្តលោកបានសិក្សាល្អិតល្អន់ណាស់ អ្វីដែលពិសេសជាងនេះទៅទៀតនោះ លោកសម្លឹងឃើញថា ឧកញ៉ាវ័យក្មេងរូបនេះគឺជាអ្នកជំនួញម្នាក់មានបទពិសោធន៍ច្រើនក្នុងការរកស៊ី និងជាមនុស្សតែងតែចូលរួមសកម្មភាពសប្បុរសធម៌ច្រើន ដូចនេះប្រសិនបើអ្នកទាំងពីររកស៊ីជាមួយគ្នា ច្បាស់ជាជោគជ័យជាក់ជាមិនខាន។

ទោះបីជាលោកគឺជាតារាចម្រៀងដែលអាចរក្សាប្រជាប្រិយភាពរហូតដល់ទៅជាង២០ឆ្នាំហើយក្ដី ប៉ុន្តែសម្រាប់ជំនួញដីធ្លី និងសំណង់ផ្ទះល្វែងនេះលោក ព្រាប សុវត្ថិ ទទួលស្គាល់ថា ខ្លួននៅក្មេងខ្ចីខ្លាំងណាស់ ដូចនេះត្រូវទទួលការបង្ហាត់បង្រៀនពី ឧកញ៉ាឡេង ណាវ៉ាត់ត្រា បន្ថែមទៀត ដើម្បីឲ្យកាន់តែជោគជ័យថែមទៀត។

មុនការបោះទុនរួមគ្នាលើកទឹកប្រាក់ជាង៥លានដុល្លារដូចបានរៀបរាប់ខាងលើ តារាចម្រៀង ព្រាប សុវត្ថិ ធ្លាប់បានបោះទុនរកស៊ីមុខរបរនេះនៅឯផ្លូវ៥១ ជិតផ្សារបាត់ដឹងជាមួយនឹងម្ចាស់ភាគហ៊ុនផ្សេងទៀតផងដែរ ដោយដីរបស់លោកនៅទីនោះកំពុងតែបន្តដាក់លក់ ប៉ុន្តែសល់មិនសូវច្រើនឡូត៍ឡើយ។ ចំពោះការបោះទុនជាមួយ ឧកញ៉ាឡេង ណាវ៉ាត់ត្រា នេះ ក្រៅពីគម្រោងទិញដីរួមគ្នាដើម្បីពុះឡូត៍ អ្នកទាំងពីគ្រោងនឹងប្រកាសលើកិច្ចព្រមព្រៀងថាសង់បុរីរួមគ្នាបន្ថែមពីលើគម្រោងទិញដីពុះឡូត៍នៅតំបន់ផ្សេងទៀតផងដែរ៕

អត្ថបទៈ ស៊ុនហួត