រ៉ាវុធ យុវជនខ្មែរច្នៃមិនទំនេរដៃ អស់ពីម៉ាស៊ីនមួយចូលមួយទៀតគួរឲ្យស្ងើចសរសើរ!(វីដេអូ)

2018-08-06 04:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជន សង រ៉ាវុធ ដែលប្រិយមិត្តខ្លះប្រហែលជាបានស្គាល់ហើយតាមរយៈស្នាដៃបង្កើតថ្មី ដោយប្រើប្រាស់សម្ភារៈចាស់ៗមកច្នៃចេញជា ម៉ាស៊ីនបាញ់សម្លាប់សត្វល្អិតដែលតែងតែបំផ្លាញដំណាំស្រូវ ដំឡូវ ឬស្វាយ ដោយប្រើតេឡេបញ្ជាពីចម្ងាយនិងដំណើរការស្វ័យប្រវត្តិទៀតផង។

ម៉ាស៊ីនថ្មីបាញ់លើដំណាំស្វាយចន្ទី

កាលពីពេលថ្មីៗ យុវជនមានស្រុកកំណើតនៅចុងកាល់ខេត្តឧត្តរមានជ័យរូបនេះ ទើបនឹងបង្កើតបានម៉ាស៊ីនបាញ់ថ្នាំស្រូវមួយទៀត ដែលមានរូបរាងប្លែកជាងមុន និងសមត្ថភាពអាចជួយកសិករបានច្រើនមែនទែន ពោលគឺក្នុងមួយហិតតា ចំណាយពេលបាញ់តែជាង ៣០ នាទីប៉ុណ្ណោះ។ ម៉ាស៊ីនថ្មី ច្នៃដោយកង់ដាក់ដុំមិនឲ្យជាប់ស្មៅ អាចផ្ទុកធុងថ្នាំបាន ១០០ លីត្រ អាចបាញ់លើដំណាំស្វាយចន្ទី ទុរេន និងស្វាយ ដែលមានដើមខ្ពស់ៗជាដើម។

រ៉ាវុធ បានលើកឡើងពីអត្ថប្រយោជន៍ពីម៉ាស៊ីនបាញ់ថ្នាំ អាចជួយសម្រាលបន្ទុកការងារ ជៀសផុតពីសត្វអសិរិពិសនានា និងជៀសផុតពីការពុលថ្នាំបាញ់ជាដើម។

បើនិយាយពីតម្លៃជួលគេបាញ់ថ្នាំ មួយហិចតាតម្លៃ ១៥ ដុល្លារ។ ជាមួយម៉ាស៊ីននេះ ក្រៅពីទុកប្រើប្រាស់ខ្លួនឯង កសិករអាចយកទៅស៊ីឈ្នួលឲ្យអ្នកផ្សេងទៀតក្នុងមូលដ្ឋានបានផងដែរ។

ពីមុនការដើរស្ពាយបំពង់ថ្នាំបាញ់លើខ្នង ប្រឈមនឹងការប៉ះពាល់សារធាតុគីមីរហូតដល់ ៩០% ឯណោះ។ ដោយឡែកចំពោះម៉ាស៊ីននេះ អាចឲ្យអ្នកជៀសផុតពីសារធាតុគីមីបានដល់ ៩០% វិញ។

រ៉ាវុធ អង្គុយលើម៉ាស៊ីនបាញ់ថ្នាំរបស់គេ

គិតមកដល់ឥឡូវ ស្នាដៃបង្កើតថ្មីរបស់យុវជនខ្មែររូបនេះមានចំនួន ៣ ផ្សេងៗគ្នាហើយ ដែលសុទ្ធតែជាម៉ាស៊ីនសម្រាប់បម្រើឲ្យកសិករក្នុងការធ្វើចម្ការនានា ក្នុងនោះដែរ ក៏មានតម្លៃរៀងៗដូចជា ម៉ាស៊ីនបាញ់ម៉ាស៊ីនបាញ់ថ្នាំស្រូវ តម្លៃ ៨៥០ ដុល្លារ ឯម៉ាស៊ីនបាញ់ថ្នាំស្រូវនិងដំឡូង ផ្ទុកធុងថ្នាំបាន ២០០ លីត្រតម្លៃ ១៣៥០ ដុល្លារ។ ចំណែកគោយន្តប្រើតេឡេបញ្ជា និងម៉ាស៊ីនថ្មីមិនទាន់បញ្ចេញតម្លៃនៅឡើយទេ។

ចំពោះប្រិយមិត្តដែលមានបំណងវិនិយោគ ឬផ្តល់ជំនួយសម្ភារៈនានា ដល់យុវជនបង្កើតឧបករណ៍ដ៏ពិសេសនេះ អាចទាក់ទងតាមលេខ 098 248 058៕

ទស្សនាវីដេអូខាងក្រោម៖