បើអ្នកភូមិដឹងពិតជារំភើបមិនស្ទើរ ស្រុកមួយនៅតាកែវត្រូវជ្រើសរើសសម្រាប់គម្រោងភូមិឌិជីថល

2018-08-07 03:20:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រភពពីក្រសួងព័ត៌មានឲ្យដឹងថាកម្ពុជា និងភាគីឥណ្ឌាបានសម្រេចជ្រើសយកស្រុកមួយក្នុងខេត្តតាកែវដើម្បីសាកល្បងភូមិឌីអីថល ក្នុងក្រមខណ្ឌកិច្ចសហប្រតិបត្តិការលើវិស័យប្រៃសណីយ៍ ទូរគមនាគមន៍ និងវិស័យបច្ចេកវិទ្យាគមនាគមន៍ និងព័ត៌មាននៃប្រទេសទាំងពីរ។

(ភូមិឌីជីថលនឹងអាចផ្តល់ព័ត៌មានច្រើនពីការងារកសិកម្ម តម្លៃកសិផល បច្ចេកទេសផលិតដល់កសិករតាមរយៈព័ត៌មានៅលើអ៊ីនធឺណេត)

បើតាមប្រភពក្រសួងព័ត៌មាន កាលពីម្សិលមិញភាគីកម្ពុជា ឯកឧត្ដម ត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងលោកស្រីManika Jain ឯកអគ្គរដ្ឋទូតនៃសាធារណរដ្ឋឥណ្ឌា ប្រចាំនៅព្រះរាជាណាចក្រកម្ពុជា បានជួបពិភាក្សាគ្នាពីគម្រោងភូមិឌីជីថលនេះ។

បើតាមពិតទៅក្រុមការងារជំនាញទាំងពីរភាគីបានជួបគ្នារួចម្តងហើយកាលពីចុងខែកក្កដា កន្លងទៅ និងបានជ្រើសរើសយកស្រុកទ្រាំង ខេត្តតកែវ សម្រាប់សាកល្បងគម្រោងភូមិឌីជីថលនេះ។ នេះបើតាមប្រភពដដែល។

អ្វីទៅជាភូមិឌីជីថល?

ភូមិឌីជីថល គឺជាគំនិតមួយផ្តួចផ្តើមឡើងនៅប្រទេសឥណ្ឌា សំដៅដល់ការភ្ជាប់បណ្តាញទូរគមនាគមន៍ ដល់តំបន់ជនបទ ដើម្បីឲ្យអ្នកភូមិអាចមានប្រព័ន្ធអ៊ីនធឺណេត និងសេវ៉ាទូរសព្ធជាដើមសម្រាប់ប្រើប្រាស់។ នេះបើតាមឯកសារមួយនិយាយពីភូមិឌីជីថលរបស់ប្រទេសឥណ្ឌា។

តើធ្វើនេះដើម្បីអ្វី?

បើតាមឯកសារដដែលអ្នកភូមិជនបទដែលអាចភ្ជាប់ប្រព័ន្ធ អ៊ីនធឺណេតបាន គឺអ្នកទាំងនោះនឹងអាចទទួលបានព័ត៌មានច្រើនពីការងារកសិកម្ម តម្លៃកសិផល បច្ចេកទេសផលិត ជាដើម តាមរយៈព័ត៌មានដែលមាននៅលើប្រព័ន្ធអ៊ីនធឺណេត។ លើសពីនេះអ្នកទាំងនោះអាចស្វែងរកព័ត៌មានទាក់ទងនឹងសេវាហិរញ្ញវត្ថុបានកាន់តែទូលាយជាងមុន។

ក្រៅផលប្រយោជន៍ដល់វិស័យកសិកម្ម ក៏មានដែរផលប្រយោជន៍ក្នុងវិស័យអប់រំ បានន័យថាកូនចៅអ្នកភូមិអាចរកមេរៀន ឬឯកសាររៀនបានច្រើនតាមប្រព័ន្ធអនឡាញ និងអាចធ្វើតេស្តសមត្ថភាពបានតាមប្រព័ន្ធអនឡាញទៀតផង។ ក្រៅពីនេះទៀត អ្នកភូមិជនបទ ក៏អាចតាមដានព័ត៌មានទាក់ទងនឹងសង្គម អភិបាលកិច្ច និងសុខភាពផងដែរ។ នេះបើតាមឯកសារដដែល។

បើតាមក្រសួងព័ត៌មាន កិច្ចសហប្រតិបត្តិការនេះនឹងជំរុញ ការអភិវឌ្ឍវិស័យបច្ចេកវិទ្យាគមនាគមន៍និងព័ត៌មានសម្រាប់ជនបទនៅកម្ពុជា៕

អត្ថបទ៖ ទូច សុខា