ពិសេសណាស់! កូនខ្មែរជាង១០០នាក់ នឹងបង្ហាញរបាំប្រពៃណីច្រើនទម្រង់នៅថ្ងៃស្អែកនេះ
- 2018-08-08 06:57:46
- ចំនួនមតិ 0 | ចំនួនចែករំលែក 0
ពិសេសណាស់! កូនខ្មែរជាង១០០នាក់ នឹងបង្ហាញរបាំប្រពៃណីច្រើនទម្រង់នៅថ្ងៃស្អែកនេះ
ចន្លោះមិនឃើញ
នៅព្រឹកមិញនេះសាលាមធ្យមសិក្សាវិចិត្រសិល្បៈបានរៀបចំហាត់សមរបាំច្រើនទម្រង់ទៅលើសិស្សប្រុសស្រីជាង១០០នាក់ មុនថ្ងៃប្រឡងឯកទេសជំនាញបញ្ចប់សញ្ញាប័ត្រសិល្បៈ និងស្មាតកបត្រសិល្បៈ នៅភូមិបឹងសំយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
អ្នកស្រី កែម សនសាងាំ នាយិកាសាលាមធ្យមសិក្សាវិចិត្រសិល្បៈ មានប្រសាសន៍ថា ប្រឡងឯកទេសជំនាញបញ្ចប់សញ្ញាប័ត្រសិល្បៈ និងស្មាតកបត្រសិល្បៈ នឹងប្រព្រឹត្តិទៅនៅថ្ងៃទី៩ ខែសីហា ឆ្នាំ ២០១៨ ស្អែកនេះ មានបក្ខជនប្រឡងជាង១០០ នាក់។
ការប្រឡងនៅថ្ងៃស្អែកនេះសិស្សទាំងអស់បានយករបាំប្រពៃណីខ្មែរមួយចំនួនមកបង្ហាញមានដូចជា របាំបុរាណ" ឈួយឆាយបួងសួង" របាំប្រពៃណី"ល្បុក្កតោ" ល្ខោនយីកេ"មាយើង" សៀក" មហិទ្ធិឫទ្ធិនាគរាជ" ល្ខោននិយាយ "កំពង់ធំជំរុំចិត្ត" និងល្ខោនបាសាក់ "មរណមាតា" ជាដើម។
“កន្លងមកគឺយើងតែងតែធ្វើរៀងរាល់ឆ្នាំ ព្រោះសិស្សមានប្រឡងចេញ និងចូល។ ចំពោះការប្រឡងចេញនេះមានពីរទី១គឺខាងសញ្ញាប័ត្រឌីប្លូម និងទី២គឺសញ្ញាប័ត្របាក់ឌុប ហើយពួកគាត់បញ្ចេញស្នាដៃទៅតាមចំណេះជំនាញដែលបានរៀនកន្លងមក"។នេះបើតាមអ្នកស្រី នាយិកាខាងលើបន្ថែម។
ថ្លែងក្នុងពិធីខាងលើលោក វិន ឡៃជូ អគ្គនាយករងបច្ចេកទេសវប្បធម៌ និងជានាយកស្ដីទីសាលាមធ្យមសិក្សាវិចិត្រសិល្បៈបានមានប្រសាសន៍ថា ក្រោយពីសិស្សបញ្ចប់ការសិក្សាសញ្ញាប័ត្របាក់ឌុប ពួកគេទាំងអស់មានចំណេះជំនាញឯកទេសរៀងខ្លួនអាចយកទៅប្រកបរបរចិញ្ចឹមជីវិតបាន។ កន្លងមកមានសិស្សមួយចំនួនមានឱកាសបានចេញទៅធ្វើការនៅក្រៅប្រទេសទៀតផង។
ឆ្លៀតក្នុងឱកាសនេះលោកនាយកស្ដីទី ក៏សូមអំពាវនាវដល់ទ្រង់ឯកឧត្ដម លោកជំទាវអ្នកនាងកញ្ញា និងពុកម៉ែបងប្អូនទៅចូលរួមទស្សនាឲ្យបានច្រើនកុះករ ចំពោះការប្រឡងឯកទេសជំនាញបញ្ចប់សញ្ញាប័ត្រសិល្បៈ និងស្មាតកបត្រសិល្បៈ នៅថ្ងៃស្អែកនេះ។ ដើម្បីលើកស្ទួយសិល្បៈវប្បធម៌ដ៏ស្រស់ផូរផង់ប្រពៃណីខ្មែរនៅលើឆាកអន្តរជាតិ។
ជាចុងក្រោយលោក សុំអំពាវនាវដល់ប្អូនៗមួយចំនួនប្រសិនបើចង់សិក្សានៅ សាលាមធ្យមសិក្សាវិចិត្រសិល្បៈអាចមកចុះឈ្មោះបាន ព្រោះសាលានឹងបើកទទួលសិស្សថ្មីនៅខែក្រោយនេះហើយ។