Smart ប្រកាសទិញភាគហ៊ុនក្រុមហ៊ុនល្បីមួយផ្នែកដឹកជញ្ជូន និងទិញអាហារ

2018-08-08 09:24:13
ចំនួនមតិ 0 | ចំនួនចែករំលែក 0

ចន្លោះមិនឃើញ

មូលនិធិសម្រាប់អាជីវកម្មបែបឌីជីថល (SADIF) របស់ក្រុមហ៊ុន Smart Axiata បានទិញហ៊ុនភាគតិចរបស់ Nham24 កាលពីម្សិលមិញ ដែលជាក្រុមហ៊ុនផ្ដល់សេវាដឹកជញ្ជូន និងបញ្ជាទិញម្ហូបអាហារតាម Online ធំមួយ នៅកម្ពុជា។

លោក ចាន់ បូរីម៉ា ស្ថាបនិក និងជានាយកប្រតិបត្តិ Nham24 បាននិយាយថា ជាមួយនឹងការបញ្ចូលមូលនិធិ និងផ្ដល់យុទ្ធសាស្ត្រពីវិនិយោគិន លោកនឹងបន្តផ្ដោតការយកចិត្តទុកដាក់ក្នុងការផ្ដល់សេវាឲ្យបានប្រសើរបំផុតតាមដែលអាចធ្វើបាន ដល់អតិថិជន ក៏ដូចជាភោជនីយដ្ឋានដែលជាដៃគូ។

ការវិនិយោគរបស់ SADIF ជាទូទៅ មានទំហំទឹកប្រាក់ចន្លោះពី ២៥០០០ ទៅ ៥០០ ០០០ ដុល្លារ អាស្រ័យទៅតាមដំណាក់កាលនៃអាជីវកម្ម លក្ខខណ្ឌតម្រូវផ្នែកឧស្សាហកម្ម និងលក្ខខណ្ឌហិរញ្ញវត្ថុរបស់ក្រុមហ៊ុនអ្នកទទួលទុនវិនិយោគទាំងនោះ។

លោក ថូម៉ាស ហ៊ុន នាយកប្រតិបត្តិ Smart Axiata បានលើកឡើងថា៖ “ការលូតលាស់យ៉ាងលឿនរបស់ក្រុមហ៊ុន Nham24 ក៏ដូចជាគោលបំណងរបស់ក្រុមហ៊ុនដែលចង់អភិវឌ្ឍន៍សេវាដឹកជញ្ជូន និងបញ្ជាទិញម្ហូបអាហារ ជាកត្តាដែលធ្វើឲ្យខ្ញុំរំភើបចិត្ត ហើយខ្ញុំនឹងរង់ចាំមើលការលេចចេញជារូបរាងនូវការវិនិយោគរបស់មូលនិធិ SADIF ក្នុងក្រុមហ៊ុន Nham24"។

មូលនិធិសម្រាប់អាជីវកម្មបែបឌីជីថល SADIF មានថវិកាសរុប ៥ លានដុល្លារ បានបង្កើតឡើងកាលពីខែមីនា ២០១៧ ហើយគ្រប់គ្រងដោយក្រុមហ៊ុនផ្ដល់ប្រឹក្សា និងវិនិយោគ ដែលមានឈ្មោះថា Mekong Strategic Partner (MSP) ដោយពេលនេះ បានវិនិយោគទៅលើក្រុមហ៊ុន ៤ គឺ ក្រុមហ៊ុនផ្ដល់សេវាធានារ៉ាប់រង Forte ក្រុមហ៊ុនដឹកជញ្ជូន “ជូនអ្នក” Joonaak Delivery Co., Ltd ក្រុមហ៊ុន Morakot Technology និងចុងក្រោយ Nham24។

Nham24 បានបង្កើតឡើងនៅឆ្នាំ ២០១៦ និងបានក្លាយជាក្រុមហ៊ុនផ្ដល់សេវាដឹកជញ្ជូនម្ហូបអាហារធំមួយនៅកម្ពុជា ដែលបច្ចុប្បន្នប្រតិបត្តិការនៅភ្នំពេញ និងសៀមរាប ដោយសហការជាមួយភោជនីយដ្ឋានជាង ៥៥០ កន្លែង ហើយថ្មីៗនេះ ក្រុមហ៊ុនបញ្ចេញកម្មវិធី Nham24 Fresh ដែលអាចបញ្ជាទិញគ្រឿងទេសគ្រប់មុខ និងដឹកជញ្ជូនដល់កន្លែងក្នុងពេល ២ ម៉ោងប៉ុណ្ណោះ។

សម្រាប់ព័ត៌មានបន្ថែម និងព័ត៌មានថ្មីៗពីមូលនិធិសម្រាប់អាជីវកម្មបែបឌីជីថល (SADIF) ចូលទៅផេកហ្វេសប៊ុក Smart for Cambodia ឬវិបសាយ www.sadif.com.kh ៕

អត្ថបទ៖ វិទូ