Ramos៖ អត់ Ronaldo ក៏ Real នៅតែអាចឈ្នះពាន

2018-08-15 03:07:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ការចាកចេញរបស់ Cristiano Ronaldo ទៅកាន់ Juventus មិនអាចក្លាយជាឧបសគ្គក្នុងការឈ្នះពានរបស់ Real Madrid ទេ។ នេះបើតាមការអះអាងរបស់ប្រធានក្រុម Sergio Ramos។

Ronaldo បានចែកផ្លូវជាមួយក្លឹបយក្សអេស្ប៉ាញទៅកាន់ក្រុមជើងឯក Serie A ក្នុងតម្លៃ១១២លានអឺរ៉ូក្រោយចំណាយពេល៩ឆ្នាំ និងជួយក្រុមឈ្នះ Champions League ៣រដូវកាលជាប់ៗគ្នា។ ក្រោយបាត់បង់កម្លាំងសំខាន់ Real នៅមិនទាន់រកឃើញអ្នកថ្មីមកជំនួសនៅឡើយក្រោមការដឹកនាំរបស់លោក Julen Lopetegui។

Real Madrid ត្រូវលេងពាន UEFA Super Cup នៅយប់ថ្ងៃពុធនេះក្នុងនាមជាជើងឯក UEFA Champions League ដោយត្រូវប៉ះ Atletico Madrid ជាជើងឯក Europa។ នេះគឺជាប្រកួតផ្លូវការលើកដំបូងរបស់ពួកគេដែលគ្មានវត្តមានរបស់ Ronaldo។ យ៉ាងណា Ramos បានសម្លឹងពីចំណុចវិជ្ជមានក្នុងនាមជាប្រធានក្រុមដោយអះអាងថាគ្មាន Ronaldo ក៏ Real នៅតែអាចឈ្នះពាន។

“ការបាត់បង់កីឡាករសំខាន់ពិតជារឿងគួរឲ្យសោកស្ដាយ ប៉ុន្តែវាមិនអាចជាហេតុផលធ្វើឲ្យយើងលែងឈ្នះពាននោះឡើយ។ ចូរអ្នកមើលទៅអតីតកាល Real បានឆ្លងកាត់រឿងរ៉ាវលំបាកបែបនេះច្រើនរាប់មិនអស់ហើយទីបំផុតយើងនៅតែឈ្នះ។ កីឡាករទាំងអស់ត្រូវតែប្រឹងប្រែងដើម្បីក្រុមមិនថាមានរឿងអ្វីកើតឡើងទេ"។ Ramos និយាយដូច្នេះ៕