ឆាប់ៗនេះនឹងមានការប្រកួត Robot ដំបូងបង្អស់នៅកម្ពុជា អ្នកចេះធ្វើRobot ជិតបានបញ្ចេញស្នាដៃហើយ

2018-08-15 05:30:11
ចំនួនមតិ 0 | ចំនួនចែករំលែក 0

ចន្លោះមិនឃើញ

អង្គការពិព័រណ៍វិទ្យាសាស្ត្រកម្ពុជានឹងរៀបចំព្រឹត្តិការណ៍ប្រកួតប្រជែងរ៉ូបូតដំបូងបង្អស់នៅកម្ពុជា រ៉ូបូតអូឡាំព្យាដពិភពលោក (World Robot Olympiad) នៅថ្ងៃសោរ៍ ទី២២ កញ្ញា ២០១៨ នេះ នៅសាកលវិទ្យាល័យហ្សាម៉ាន់ ដើម្បីផ្តល់ឱកាសដល់យុវជនខ្មែរដែលមានចំណង់ចំណូលចិត្ត និងទេពកោសល្យខាងផ្នែកវិទ្យាសាស្ត្រ បានបង្ហាញស្នាដៃ និងចាប់ឱកាសទៅប្រកួតក្នុងឆាកអន្តរជាតិជាច្រើនទៀត។ យុវជនដែលជោគជ័យក្នុងការប្រកួតនេះនឹងមានសិទ្ធិឡើងទៅប្រកួតបន្តក្នុងវគ្គផ្ដាច់ព្រ័ត្រនៅថៃ នៅខែវិច្ឆិកាខាងមុខនេះ។

បេក្ខជនត្រូវកំណត់ឲ្យប្រកួតជាក្រុម ដោយមានសមាជិកចំនួន២ ឬ ៣នាក់ក្នុងក្រុមនីមួយៗ និងមានគ្រូដឹកនាំម្នាក់ ដោយពួកគេត្រូវមាន Robot ដោយខ្លួនឯង។ ការប្រកួតប្រជែងនេះត្រូវបានបែងចែកជាពីរវិញ្ញាសា ៖ (១) វិញ្ញាសាសម្រាប់កុមារអាយុចាប់ពី១៣ ដល់១៥ឆ្នាំ និង (២) សម្រាប់មនុស្សធំអាយុចាប់ពី១៦ ដល់១៩ឆ្នាំ។

សម្រាប់ការប្រកួតក្នុងខែកញ្ញា ២០១៨នេះ បេក្ខជនប្រកួតត្រូវយក LEGO Mindstorms Robot Kit របស់ខ្លួន ចូលក្នុងកម្មវិធីជួបជុំបេក្ខជនដែលមានចំណាប់អារម្មណ៍ប្រកួត ហើយព័ត៌មានបន្ថែមពីព្រឹត្តិការណ៍នេះ រួមទាំងការចុះឈ្មោះផងដែរ មាននៅលើទំព័រវិបសាយ www.stemcambodia.ngo។

ការប្រកួតប្រជែងរ៉ូបូតអូឡាំព្យាដពិភពលោកត្រូវបានបង្កើតក្នុងឆ្នាំ ២០០៤ ដោយបានផ្តល់នូវបរិយាកាសប្រកួតប្រជែងអន្តរជាតិមួយយ៉ាងពិតប្រាកដដល់យុវជនដែលមានចំណូលចិត្តលើបច្ចេកវិទ្យាថ្មីៗ។ ជុំប្រកួតជាច្រើនត្រូវបានរៀបចំឡើងនៅជាង ៦០ប្រទេសទូទាំងពិភពលោក ដើម្បីធានាថាការប្រកួតវគ្គផ្ដាច់ព្រ័ត្រប្រចាំឆ្នាំមានការចូលរួមពីអ្នកដែលឆ្លាតវៃបំផុត។

ព័ត៌មានបន្ថែមអំពីការប្រកួតប្រជែងរ៉ូបូតអូឡាំព្យាដពិភពលោក សម្រាប់ជុំប្រកួតនៅកម្ពុជា សូមទាក់ទងមកកាន់ អង្គការពិព័រណ៍វិទ្យាសាស្រ្តកម្ពុជា អ៊ីមែល wro@stemcambodia.ngo ឬ លេខទូរស័ព្ទ ០២៣ ៧២ ៧២ ៦២៕