ពិតទេ ដែលថាខ្សែការពារឆ្នើម Godin ចុះកុងត្រាថ្មីជាមួយ Atletico?
- 2018-08-15 11:00:20
- ចំនួនមតិ 0 | ចំនួនចែករំលែក 0
ពិតទេ ដែលថាខ្សែការពារឆ្នើម Godin ចុះកុងត្រាថ្មីជាមួយ Atletico?
ចន្លោះមិនឃើញ
ខ្សែការពារ Diego Godin ក្នុងថ្ងៃនេះ បានចេញមុខបដិសេធរបាយការណ៍ដែលថា ខ្លួនបានចុះកុងត្រាថ្មីជាមួយក្លឹប Atletico Madrid។
ថ្លែងមុនជំនួបដណ្ដើមពាន UEFA Super Cup ខ្សែការពារ Godin បាននិយាយថា៖ "ខ្ញុំមិនបានចុះកុងត្រាថ្មីនោះទេ។ ខ្ញុំទទួលបានសំណើជាច្រើនពីក្លឹបដទៃ។ បើទោះជាខ្ញុំសម្រេចចិត្តបន្តនៅក្លឹបនេះមែនដោយហេតុផលផ្ទាល់ខ្លួនមួយចំនួន នៅពេលនេះ អ្វីដែលខ្ញុំគិតជាងគេ គឺការប្រកួតខាងមុខប៉ុណ្ណោះ"។
កីឡាករអ៊ុយរុយហ្គាយបានបន្ត៖ "ខ្ញុំសូមបញ្ជាក់ម្ដងទៀតថា ខ្ញុំមិនបានចុះកុងត្រាថ្មីទេ។ ខ្ញុំឮដំណឹងនេះចេញពីសារព័ត៌មាន ប៉ុន្តែមិនដឹងថាដំណឹងហ្នឹងចេញពីណាមកនោះទេ"។
សូមបញ្ជាក់ផងដែរថា កាលពីដើមខែនេះ មានលេចចេញនូវរបាយការណ៍ជាច្រើន ដែលថា Godin បានបដិសេធទៅនឹងការចូលរួមជាមួយក្លឹប Manchester United ហើយបានចុះកុងត្រាថ្មីជាមួយ Atletico Madrid។
ខ្សែការពារវ័យ ៣២ ឆ្នាំ Godin ត្រូវបានមជ្ឈដ្ឋានបាល់ទាត់ជាច្រើន ចាត់ទុកថា គឺជាកីឡាករបង្គោលមួយរូប សម្រាប់ក្លឹប Atletico Madrid និងក្រុមជម្រើសជាតិអ៊ុយរុយហ្គាយ។ តាំងពីចូលរួមជាមួយក្លឹបអេស្ប៉ាញកាលពីឆ្នាំ ២០១០ ខ្សែការពារបានលេងឲ្យក្លឹបសរុបបាន ៣៥០ ប្រកួត និងស៊ុតចូល ២៣ គ្រាប់។
ចំពោះក្រុមជម្រើសជាតិវិញ Godin គិតមកទល់ពេលនេះ បានបង្ហាញខ្លួនចំនួន ១២២ លើក និងរកបានគ្រាប់បាល់ចំនួន ៨ គ្រាប់៕