ទំនើបណាស់! ចង់រកជាងសង់ផ្ទះឲ្យត្រូវចិត្ត គ្រាន់តែចុះឈ្មោះអនឡាញស្រេចបាត់

2018-08-16 07:20:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពេលនេះ ម្ចាស់លំនៅដ្ឋានដែលមានបំណងសាងសង់គម្រោងលំនៅដ្ឋាន ឬអគារផ្សេងៗ លែងពិបាកទៀតហើយក្នុងការស្វែងរកជាងសំណង់ដែលត្រូវជាមួយគម្រោងរបស់ខ្លួន តាមរយៈការចុះឈ្មោះនៅលើកម្មវិធីអនឡាញរបស់ក្រុមហ៊ុន SCG។ ក្រុមហ៊ុននឹងស្វែងរកជាងសំណង់ដែលមានជំនាញត្រឹមត្រូវ អាចបំពេញតាមលក្ខខណ្ឌរបស់ម្ចាស់គម្រោងសាងសង់គ្រប់ប្រភេទ។

សេវាកម្មផ្គូផ្គងជាងសំណង់នេះ គឺជាផ្នែក១នៃកម្មវិធីបណ្ដុះបណ្ដាលជាងសំណង់ ដែលផ្ដួចផ្ដើមបង្កើតឡើងកាលពីដើមឆ្នាំ ដោយក្រុមហ៊ុន SCG ដែលជាពហុសាជីវកម្មឈានមុខគេនៅក្នុងតំបន់អាស៊ាន ដើម្បីបណ្ដុះបណ្ដាលផ្នែកសំណង់ និងជួយលើកកម្ពស់វិស័យសំណង់នៅកម្ពុជា។

អ្នកស្រី ឃាង ចិន្ដាមុនី ម្ចាស់លំនៅដ្ឋានរស់នៅរាជធានីភ្នំពេញ និងកំពុងតែសាងសង់ផ្ទះនៅឯខេត្តព្រះសីហនុលើកឡើងថា៖ “សេវាកម្មនេះងាយស្រួល និងលឿនជាងការគិតរបស់ខ្ញុំទៅទៀត។ ខ្ញុំគ្រាន់តែដាក់ពាក្យតាមអនឡាញស្វែងរកជាងសំណង់ បន្ទាប់មក SCG ជាអ្នកជួយគ្រប់យ៉ាង។ SCG បង្ហាញបញ្ជីឈ្មោះជាងសំណង់ដែលមានសមត្ថភាពឲ្យខ្ញុំបានឃើញ ហើយបន្ទាប់មកខ្ញុំចរចាដើម្បីស្វែងរកជាងសំណង់ល្អបំផុត ដែលអាចបំពេញតាមលក្ខខណ្ឌរបស់ខ្ញុំ។ ក្រៅពីបានទទួលជាងលមានគុណភាពហើយ ខ្ញុំថែមទាំងអាចស្វែងរកសម្ភារៈសំណង់ដែលមានគុណភាព ក្នុងតម្លៃសមរម្យថែមទៀត"។

SCG បានបង្កើតកម្មវិធីបណ្ដុះបណ្ដាលជាងសំណង់កម្ពុជាកាលពីខែកុម្ភៈ ឆ្នាំនេះ ដោយសហការជាមួយវិទ្យាស្ថាន NPIC និង CTSDI ដើម្បីអភិវឌ្ឍកម្មវិធីបណ្ដុះបណ្ដាលស្ដីពីការប្រើប្រាស់ផលិតផល និងសម្ភារៈសំណង់ថ្មីៗឲ្យបានត្រឹមត្រូវ។ កម្មវិធីនេះ គឺជាផ្នែកមួយនៃការប្ដេជ្ញាចិត្តរបស់ក្រុមហ៊ុនក្នុងការជួយគាំទ្រដល់ការអភិវឌ្ឍន៍យូរអង្វែងរបស់កម្ពុជា ក៏ដូចជាលើកកម្ពស់គុណភាពជីវិតរបស់កម្មករសំណង់ផងដែរ។

លោក ពង់ថាណា ដេវីតាយ៉ាផន នាយកផ្នែកលក់ និងទីផ្សាររបស់ក្រុមហ៊ុន SCG បញ្ជាក់ថា៖ "ក្រុមហ៊ុនមានការប្ដេជ្ញាចិត្តក្នុងការលើកកម្ពស់គុណភាពជីវិតរបស់មនុស្សគ្រប់គ្នា។ យើងអាចយល់បានពីបញ្ហារបស់ម្ចាស់លំនៅដ្ឋាន ដែលគិតថាការស្វែងរកជាងសំណង់គឺជារឿងស្មុគស្មាញ ហើយពិបាកក្នុងការស្វែងរកជាងសំណង់ដែលមានគុណភាព។ ខណៈដែលជាងសំណង់ពុំមានឱកាសផ្សព្វផ្សាយអំពីខ្លួនឯង និងទទួលបានការងារឲ្យបានច្រើនដើម្បីបង្កើនប្រាក់ចំណូល។ ដូច្នេះ យើងរីករាយក្នុងការជួយដល់ជាងសំណង់ដែលមានការបណ្ដុះបណ្ដាលត្រឹមត្រូវ ឲ្យទទួលបានអតិថិជនកាន់តែច្រើនដោយផ្គូផ្គងពួកគេជាមួយនឹងម្ចាស់លំនៅដ្ឋានដែលកំពុងស្វែងរកជាងសំណង់ និងសម្ភារៈសំណង់ដែលមានគុណភាព"។