ក្ដៅ! នឹងមានវត្តមានប្រកួត La Liga នៅលើទឹកដីសហរដ្ឋអាមេរិក ចាប់ពីរដូវកាលនេះតទៅ

2018-08-16 11:27:04
ចំនួនមតិ 0 | ចំនួនចែករំលែក 0

ចន្លោះមិនឃើញ

អម្បាញ់មិញនេះ លីគ La Liga និង ក្រុមហ៊ុនកីឡា និងកម្សាន្តឈ្មោះ Relevent បានចុះកុងត្រារយៈ ១៥ ឆ្នាំ ដើម្បីបើកផ្លូវឲ្យមានការលេងប្រកួតលីគកំពូលអេស្ប៉ាញនៅលើទឹកដីសហរដ្ឋអាមេរិក។

កុងត្រាបានបញ្ជាក់អំពីគម្រោងក្នុងការលេងយ៉ាងហោចណាស់ចំនួន ១ ប្រកួត La Liga នៅសហរដ្ឋអាមេរិក ចាប់ពីរដូវកាល ២០១៨/១៩ តទៅ។

លោក Charlie Stillitano ប្រធាននាយកប្រតិបត្តិនៃក្រុមហ៊ុន Relevent ដែលជាក្រុមហ៊ុនតែងរៀបចំកម្មវិធីប្រកួតបាល់ទាត់ International Champions Cup បានឲ្យដឹងថា បច្ចុប្បន្នភាគីពាក់ព័ន្ធកំពុងចាប់ផ្ដើមការពិភាក្សាគ្នារឿងការរៀបចំឲ្យការប្រកួតលីគកំពូលអេស្ប៉ាញចំនួន ១ ប្រកួត នៅលើទឹកដីសហរដ្ឋអាមេរិក។

លោក Stillitano បានបង្ហើបទៀត ការប្រកួតលីគនោះ អាចត្រូវបានធ្វើឡើង ក្រោយថ្ងៃទី ១ មករា ឆ្នាំ ២០១៩ នៅទីក្រុង Miami រដ្ឋ Florida សហរដ្ឋអាមេរិក។ បើតាមលោកដដែល ដើម្បីបំពេញតម្រូវការទីផ្សារ ក្លឹបដែលចូលរួមលេងប្រកួតលីគមួយនោះ ត្រូវតែជាក្លឹប Real Madrid, Barcelona ឬ Atletico Madrid។ ទោះជាយ៉ាងណា ក្លឹប Sevilla និង Valencia ក៏ស្ថិតក្នុងចំណោមបេក្ខភាពដែលក្រុមហ៊ុន Relevent ចង់ឃើញមកលេងប្រកួតនៅសហរដ្ឋអាមេរិកផងដែរ។

ទាក់ទងនឹងការចុះកុងត្រា ១៥ ឆ្នាំ ប្រធានអភិវឌ្ឍអន្តរជាតិនៃលីគ La Liga លោក Oscar Mayo បាននិយាយថា៖ "ការសហការជាមួយក្រុមហ៊ុន Relevent គឺជាជោគជ័យមួយដ៏ធំសម្រាប់លីគក្នុងផែនការយុទ្ធសាស្ត្រពង្រីងរបស់ខ្លួន"៕

ប្រភព៖ Washingtonpost | Financial Time ប្រែសម្រួល៖ ហ៊ីម រស្មី