Server របស់ Apple ត្រូវយុវជន ១៦ ឆ្នាំ Hack ចូលបានសម្រេច

2018-08-17 07:09:03
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនវ័យ ១៦ ឆ្នាំសញ្ជាតិអូស្ត្រាលីមួយរូប បាន Hack ចូល Server (ទីតាំងរក្សាទុកទិន្នន័យ) របស់ក្រុមហ៊ុនអាមេរិក ដោយបានទាញយកឯកសារសំខាន់បាន ៩០ GB ឯណោះ។

សារព័ត៌មាន The Age របស់ប្រទេសអូស្ត្រាលីបានចុះផ្សាយថា យុវជនខាងលើដែលគេមិនបញ្ចេញឈ្មោះដោយសារហេតុផលច្បាប់នោះ បានព្យាយាម Hack ចូល Server ជាច្រើនលើកមកហើយ និងបានចូលទៅក្នុងគណនីអតិថិជនមួយចំនួនផងដែរ។

រូបតំណាង

យ៉ាងណាក្ដី Apple បានដឹងពីការលួចចូលនេះ និងបានរាយការណ៍ទៅភ្នាក់ងារស៊ើបអង្កេត FBI។ គេបានដឹងថាដាននៃ Hacker គឺមានប្រភពចេញពីប្រទេសអូស្ត្រាលី ហើយសមត្ថកិច្ចប្រទេសអូស្ត្រាលីក៏បានចូលរួមលើការស៊ើបអង្កេតលក្ខណៈអន្តរជាតិនេះដែរ។

យុវជនដែលល្បីឈ្មោះក្នុងសហគមន៍ Hack រូបនេះ បានប្រើប្រាស់ VPN និងឧបករណ៍ដទៃទៀតដើម្បីកុំឲ្យគេចាប់ដានបាន ប៉ុន្តែប្រព័ន្ធរបស់ Apple អាចដឹងពី Serial Number នៃ MacBook ដែលប្រើសម្រាប់ Hack នេះ ទើបទីបំផុតគេដឹងថាវាមានប្រភពចេញពីប្រទេសអូស្ត្រាលី។

រូបតំណាង

ចុងក្រោយយុវជនរូបនេះបានសារភាពទោសកំហុស និងត្រូវកាត់ទោសនៅខែក្រោយនេះ។ មេធាវីរបស់យុវជនរូបនេះបានឲ្យដឹងថា ការ Hack នេះធ្វើឡើងដោយសារតែរូបគេអ្នកគាំទ្ររបស់ក្រុមហ៊ុន Apple និងសង្ឃឹមថាបានចូលធ្វើការក្នុងក្រុមហ៊ុននេះ។

ទាក់ទងនឹងបញ្ហានេះ Apple ក៏បានចេញសេចក្ដីប្រកាសឲ្យអ្នកប្រើប្រាស់ទាំងឡាយ កុំមានការព្រួយបារម្ភពីសុវត្ថិភាពទិន្នន័យរបស់ខ្លួន ដោយសារនេះមិនមែនជាករណីលេចធ្លាយទិន្នន័យសម្ងាត់នោះទេ៕

ប្រភព៖ 9to5Mac ប្រែសម្រួល៖ សុខហេង