២០ ០០០ដុល្លារ ជួយក្មេងដាច់ស្រយាល តាមរយៈមូលនិធិក្រុមហ៊ុនធំ ២
- 2018-08-21 04:58:40
- ចំនួនមតិ 0 | ចំនួនចែករំលែក 0
២០ ០០០ដុល្លារ ជួយក្មេងដាច់ស្រយាល តាមរយៈមូលនិធិក្រុមហ៊ុនធំ ២
ចន្លោះមិនឃើញ
ក្រុមហ៊ុន Ford និងក្រុមហ៊ុន RMA Cambodia ដែលជាតំណាងនាំចូល និងចែកចាយផ្តាច់មុខនូវរថយន្ត Ford ប្រចាំប្រទេសកម្ពុជាបានផ្តល់មូលនិធិ ដែលមានទឹកប្រាក់ចំនួន ២០ ០០០ដុល្លារដល់សមាគមអតីតនិស្សិតកម្ពុជា-អេ អាយ ធី AITAACC (AIT-Alumni Association Cambodia Chapter)។
ការផ្តល់នេះគឺ ដើម្បីអនុវត្តគម្រោងចូលរួម ចំណែកជួយសង្គមនៅកម្ពុជា ដែលជាផ្នែកមួយនៃកម្មវិធី មូលនិធិអភិរក្ស និងការពារបរិស្ថានជាសកលរបស់ក្រុមហ៊ុន Ford (Ford Conservation and Environmental Grants Programme)។ គោលដៅនៃការអនុវត្តន៍គម្រោងនេះទៀតសោត គឺសាងសង់សាលាមតេយ្យសហគមន៍ចំនួន២អគារ ដែលមានទឹកស្អាតប្រើប្រាស់ និងមានអនាម័យល្អ ដែលជាតម្រូវការចាំបាច់សម្រាប់ក្មេងៗនៅតាមជនបទ។
AITAACC គឺជាអង្គការមិនយកប្រាក់ចំណេញមួយ ដែលរួមចំណែកដល់ការស្តារឡើងវិញ និងការអភិវឌ្ឍតំបន់ ដែលមិនទាន់អភិវឌ្ឍន៍មួយចំនួននៅកម្ពុជា ដោយធ្វើការដោះស្រាយបញ្ហា ដែលកំពុងប្រឈម ដូចជាផ្នែកសុខភាព ហេដ្ឋារចនាសម្ព័ន្ធ និងការអប់រំជាដើម។
លោក សេង ហុង អនុប្រធានសមាគម និងជាប្រធាននាយកដ្ឋានកិច្ចសហប្រតិបត្តិការ និង ការងារសង្គមរបស់សមាគម AITAACC បានឱ្យដឹងថា៖ "ប្រសិនបើចង់ឲ្យសហគមន៍មួយមានការរីកចម្រើន ការពង្រឹងគុណភាពការអប់រំគឺជាកត្តាចំបងបំផុត។ ខ្ញុំសប្បាយចិត្តណាស់ ដែលបានសហការជាមួយក្រុមហ៊ុន Ford និង RMA Cambodia ដើម្បីអនុវត្តគម្រោងចូលរួមចំណែកជួយសង្គមនៅកម្ពុជា ដែលជាផ្នែកមួយនៃកម្មវិធី មូលនិធិអភិរក្ស និងការពារបរិស្ថានជាសកលរបស់ក្រុមហ៊ុន Ford (Ford Conservation and Environmental Grants Programme)"។
លោក មីលី ហ្គុដមែន ប្រធានគ្រប់គ្រងផ្នែកទីផ្សាររថយន្តFord នៃក្រុមហ៊ុន RMA Cambodia បានមានប្រសាសន៍ថា៖ "ការចូលរួមចំណែកជាមួយសហគមន៍ ដែលយើងកំពុងរស់នៅ និងធ្វើការជាមួយ គឺជាកាតព្វកិច្ចដ៏ចាំបាច់ និងមានសារៈសំខាន់បំផុតសម្រាប់ក្រុមហ៊ុន Ford និង RMA Cambodia។ ម្យ៉ាងទៀតយើងពិតជាមានមោទនភាព ដែលបានចូលរួមចំណែកជាមួយសមាគមអតីតនិស្សិតកម្ពុជា-អេ អាយ ធី ក្នុងកិច្ចខិតខំប្រឹងប្រែង ដើម្បីផ្តល់អត្ថប្រយោជន៍រយៈពេលវែងដល់ប្រជាជនកម្ពុជា"។
កាលពីឆ្នាំ ២០១៧ ក្រុមហ៊ុន Ford និងក្រុមហ៊ុន RMA Cambodia បានបញ្ចប់នូវគម្រោងសាងសង់អណ្ដូងទឹកស្អាតនៅខេត្តកំពង់ស្ពឺ និងខេត្តត្បូងឃ្មុំ ដែលអាចផ្គត់ផ្គង់ទឹកស្អាតដល់ប្រជាជនដែលរស់នៅក្នុងតំបន់ជាង ១២០០នាក់៕