គ្រាន់តែ Apple ហាមាត់ Facebook លុបចេញភ្លាម!
- 2018-08-23 07:23:21
- ចំនួនមតិ 0 | ចំនួនចែករំលែក 0
គ្រាន់តែ Apple ហាមាត់ Facebook លុបចេញភ្លាម!
ចន្លោះមិនឃើញ
Apple បានកំណត់ថាកម្មវិធី Onavo Protect ជាកម្មវិធីសុវត្ថិភាពកាន់កាប់ដោយ Facebook គឺបានល្មើសច្បាប់របស់ Apple និងបានសុំឲ្យបណ្ដាញសង្គមយក្សលុបកម្មវិធីនេះចោលផងដែរ។ Facebook ក៏បានឆ្លើយតបភ្លាមៗ ដោយបានលុបកម្មវិធីតាមដែល Apple បានស្នើ។
ខណៈពេលនេះកម្មវិធី Onavo Protect លែងមាននៅលើ App Store របស់ Apple តទៀតហើយ ប៉ុន្តែលើ Play Store របស់ Google នៅឃើញមានដដែល។
Onavo Protect ជាកម្មវិធីដែលផ្ដល់ជូនមុខងារការពារជាច្រើន។ ប៉ុន្តែវាក៏តាមដាននូវរាល់កម្មវិធីដែលអ្នកប្រើប្រាស់ ប្រើ និងបញ្ជូនទិន្នន័យទៅឲ្យទីស្នាក់ការ Facebook។ នេះជាវិធីសាស្ត្រមួយរបស់ Facebook ដើម្បីសិក្សាពីគូប្រជែងរបស់ខ្លួន។
Apple បានសម្រេចថាកម្មវិធីនេះបានល្មើសនឹងច្បាប់របស់ខ្លួន ត្រង់ចំណុចប្រមូលយកទិន្នន័យអ្នកប្រើប្រាស់ និងបានប្រាប់ដល់ Facebook ពីបញ្ហានេះកាលពីដើមខែសីហា។ រហូតដល់ព្រឹកថ្ងៃទី ២៣ ខែសីហានេះ Facebook ក៏បានសម្រេចដកកម្មវិធីនេះចេញពី App Store។
Facebook បានលើកឡើងដូចនេះថា ៖ "យើងតែងបានបញ្ជាក់ប្រាប់នៅពេលគ្រប់គ្នាទាញយកកម្មវិធី Onavo អំពីទិន្នន័យដែលកម្មវិធីនេះប្រមូលយក និងយកទិន្នន័យនេះទៅធ្វើអ្វីខ្លះ។ ក្នុងនាមជា Developer មួយលើ Platform របស់ Apple យើងយល់ព្រមអនុវត្តន៍តាមច្បាប់ដែល Apple បានកំណត់ឡើង”។
អ្នកប្រើប្រាស់ឧបករណ៍ Apple ដែលមានបានកម្មវិធីនេះ នៅតែអាចប្រើប្រាស់កម្មវិធីនេះបានតទៀត គ្រាន់តែមិនទទួលបានការអាប់ដេតអ្វីថ្មីៗនោះទេ៕