លោក John McCain ព្រឹទ្ធសមាជិកអាមេរិក បានទទួលមរណភាពហើយ

2018-08-26 02:53:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹទ្ធសមាជិកអាមេរិក លោក John McCain បានទទួលមរណភាពហើយនៅថ្ងៃទី២៦សីហានេះ ក្នុងអាយុ ៨១ឆ្នាំ ដោយសារជំងឺមហារីកខួរក្បាល ដែលកើតឡើងលើរូបលោកចាប់តាំងពីឆ្នាំ២០១៧មក។ លោកបានស្លាប់នៅក្នុងទីក្រុង Sedona រដ្ឋ Arizona។ នេះបើតាមសេចក្តីថ្លែងការណ៍ចេញពីការិយាល័យរបស់លោក។

លោក John McCain ព្រឹទ្ធសមាជិកអាមេរិក ប្រចាំរដ្ឋ Arizona

ក្នុងសេចក្តីថ្លែងការណ៍នោះបានលើកឡើងថា៖ «លោក John McCain បានបម្រើសហរដ្ឋអាមេរិក យ៉ាងស្មោះស្ម័គ្រក្នុងរយៈពេល ៦០ឆ្នាំ»។

ក្រោយមរណភាពរបស់លោក John McCain នេះ ប្រធានាធិបតីអាមេរិក លោក ដូណាល់ ត្រាំ ក៏បានបង្ហាញភាពសោកស្តាយនៅលើបណ្តាញ Twitter ផងដែរ។

លោក John McCain គឺជាសមាជិកព្រឹទ្ធសភាប្រចាំរដ្ឋ Arizona ចាប់តាំងពីខែមករា ឆ្នាំ១៩៨៧មក ដោយលោកមកពីគណបក្សសាធារណរដ្ឋ។ លោកក៏ធ្លាប់ជាបេក្ខភាពប្រធានាធិបតី ក្នុងការបោះឆ្នោតឆ្នាំ២០០៨ផងដែរ ប៉ុន្តែពេលនោះលោកបានចាញ់ លោក បារ៉ាក់ អូបាម៉ា ដែលមកពីគណបក្សប្រជាធិបតេយ្យ។

លោកកើតនៅថ្ងៃទី២៩ ខែសីហា ឆ្នាំ១៩៣៦ នៅមូលដ្ឋានទ័ពជើងទឹក Coco Solo នៃតំបន់ Panama Canal។ លោកបានបញ្ចប់ការសិក្សាពីបណ្ឌិត្យសភាទ័ពជើងទឹកអាមេរិក ក្នុងឆ្នាំ១៩៥៨។ បន្ទាប់មកលោកបានក្លាយជាអ្នកបើកយន្តហោះចម្បាំង ដែលប្រតិបត្តិការនៅលើនាវាផ្ទុកយន្តហោះ។

លោក John McCain ព្រឹទ្ធសមាជិកអាមេរិក ប្រចាំរដ្ឋ Arizona

លោក John McCain ក៏បានចូលរួមនៅក្នុងសង្គ្រាមវៀតណាមផងដែរ។ ក្នុងអំឡុងពេលប្រតិបត្តិការទម្លាក់គ្រាប់បែកមួយ នៅខែតុលា ឆ្នាំ១៩៦៧ យន្តហោះរបស់លោកត្រូវបានបាញ់ទម្លាក់ដោយមីស៊ីលរបស់កងទ័ពកុម្មុយនិស្តវៀតណាម។ ទោះជាយ៉ាងណា លោកមិនបានបាត់បង់ជីវិតក្នុងហេតុការណ៍នេះឡើយ ប៉ុន្តែលោកបានរងរបួសធ្ងន់ ហើយត្រូវបានកងទ័ពវៀតណាម ចាប់ដាក់ពន្ធនាគារនៅក្រុងហាណូយ រហូតដល់ឆ្នាំ១៩៧៣៕

ប្រភព៖ Kley Kley ប្រែសម្រួល៖ សំភី