ទម្លាយឲ្យដឹងពីទម្លាប់ IT អាយុ ១៤ ឆ្នាំម្នាក់សរសេរកូដស៊ីផុយ សិស្សច្បងល្មមៗសុំចាញ់(វីដេអូ)

2018-08-28 03:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការសរសេរកូដ មិនមែនជារឿងងាយស្រួលប៉ុន្មាននោះទេ សូម្បីតែនិស្សិតថ្នាក់មហាវិទ្យាល័យក៏ត្អូញដែរ ដោយសារជាការងារស្មុគស្មាញត្រូវការការគិត រកដំណោះស្រាយច្រើនណាស់។ តែបញ្ហាទាំងនោះបានក្លាយជាងាយស្រួលទៅវិញសម្រាប់ គង់ ប៊ុនថុង ដែលជាក្មេងប្រុសម្នាក់រៀនត្រឹមទី៧។

ប៊ុនថុង បានឲ្យដឹងថា ទម្លាប់របស់គេគឺចូលចិត្តលេងហ្គេម។ ក្រោយពេលទំនេរពីការរៀនសាលាចំណេះដឹងទូទៅ សិស្សថ្នាក់ទី ៧ រូបនេះតែងតែចំណាយពេលលេងហ្គេមជាច្រើនម៉ោងនៅថ្ងៃសៅរ៍-អាទិត្យ។

ប៊ុនថុង បានបន្ថែមថា៖ "ប៉ា! គាត់ឃើញខ្ញុំលេងតែហ្គេម គាត់ក៏ហាមកុំលេងច្រើនពេក តែមកពីខ្ញុំចូលចិត្តកុំព្យូទ័រ គាត់ក៏មកចុះឈ្មោះឲ្យរៀនថ្នាក់សៅរ៍-អាទិត្យមួយទៀតកុំឲ្យទំនេរលេងហ្គេម"។

ដោយសារចំណូលចិត្តនៅជាមួយកុំព្យូទ័រនេះឯង ដែលធ្វើឲ្យ ប៊ុន ថុង វិវឌ្ឍន៍ខ្លួនពីក្មេងវក់នឹងហ្គេម ទៅជាជើងខ្លាំងខាងសរសេរកូដវិបសាយ ដែលមានសមត្ថភាពអាចចាប់បាន យល់ពីមូលដ្ឋានគ្រឹះភាសាកូដវិបសាយដល់ទៅ ៣ ទៅ ៤ ភាសាក្នុងពេលតំណាលគ្នា(HTML, CSS, Javascript)។

ទម្លាប់មួយទៀតដែលប៊ុនថុង តែងធ្វើគឺ ចូលចិត្តសួរ ចូលចិត្តឆ្ងល់ កន្លែងណាដែលមិនចេះ គេសួរ YouTube ឬ Google។ បើគាំងមែនទែន សួរសិស្សច្បងដែលរៀនជាមួយ ឲ្យគេជួយប្រាប់។

មិនត្រឹមតែអាចរៀនជាមួយនិស្សិតបាននោះទេ ថែមទាំងជាសិស្សលេចធ្លោម្នាក់នៅក្នុងថ្នាក់ផងដែរ រាល់កិច្ចការដែលគ្រូដាក់ឲ្យ ប៊ុនថុង តែងធ្វើរួចមុនកំណត់ទៅទៀត។

ប៊ុនថុង ចំណាយពេលតែ ១ ឆ្នាំផ្លោះចូលថ្នាក់ Senior មកទល់ពេលនេះ គេចេះសរសេរកូដវិបសាយនិងចេះបង្កើតវិបសាយ ដោយមិនសរសេរកូដបានមួយចំនួនផងដែរដូចជា វិបសាយស្វែងរកកន្លែងញ៉ាំអីនៅភ្នំពេញ និងវិបសាយអ្នកគាំទ្រក្លឹបបាល់ទាត់ Real Madrid មួយទៀត។

ក្រៅពីនេះ រូបគេក៏អាចបង្កើតបានហ្គេមមួយ សម្រាប់លេងម្នាក់ឯងលើអនឡាញ ពេលអផ្សុកទៀតផង។

ទៅថ្ងៃអនាគត ប៊ុនថុង ចង់ក្លាយទៅជាអ្នកអភិវឌ្ឍន៍វិបសាយ(Web Developer) ហ្គេម និងវិបសាយទិញ-លក់ឥវ៉ាន់អនឡាញ។ ជាងនេះទៀត ដោយសារតែឪពុកគេ ជាអ្នករកស៊ីទិញ-លក់ម៉ូតូ រូបគេចង់បង្កើតជាទីផ្សារអនឡាញមួយ ដើម្បីជួយសម្រួលការងារទាំងនោះ៕

អត្ថបទ៖ រក្សា