យុវជនឥណ្ឌូណេស៊ីឈ្នះមេដាយមាសកីឡា E-Sports ដំបូងពី Asian Games

2018-08-28 09:58:53
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករអេឡិចត្រូនិកជម្រើសជាតិរបស់ប្រទេសឥណ្ឌួណេស៊ីអាយុ១៦ឆ្នាំ Ridel Yesaya Sumarandak បានក្លាយជាអត្តពលិក E-Sports ដំបូងគេឈ្នះមេដាយមាសក្នុងព្រឹត្តិការណ៍កីឡាទ្វីបអាស៊ី Asian Games 2018 បើទោះជាកីឡាសម័យទំនើបនេះបង្ហាញខ្លួនក្នុងនាមជាកីឡាប្រកួតសម្តែង។

កីឡាករវៀត (ឆ្វេង) ឥណ្ឌូណេស៊ី (កណ្តាល) និងចិន (ឆ្តាំ) រូបថត៖ Asian Games

យុវជន Ridel Yesaya Sumarandak ទទួលបានមេដាយមាសនេះ បន្ទាប់ពីប្រកួតក្នុងវគ្គផ្តាច់ព្រ័ត្រយកឈ្នះកីឡាករចិន Huang Henghui លើវិញ្ញាសាប្រយុទ្ធ Clash Royale។ កីឡាករចិនរូបនេះទទួលបានមេដាយប្រាក់ និងកីឡាករវៀតណាម Huynh Duc Huyi ទទួលបានមេដាយសំរឹទ្ធ។

ទោះបីជាយ៉ាងណា មេដាយកីឡាអេឡិចត្រូនិកនេះមិនត្រូវបានគណៈកម្មការរៀបចំការប្រកួតរាប់បញ្ជូលជាផ្លូវការក្នុងតារាងមេដាយឡើយ ពីព្រោះនេះជាលើកដំបូងរបស់កីឡា E-Sports បង្ហាញខ្លួនក្នុងព្រឹត្តិការណ៍ធំក្នុងនាមជាកីឡាប្រកួតសម្តែងតែប៉ុណ្ណោះ។

ប៉ុន្តែប្រទេសចិនដែលបានទទួលភារកិច្ចធ្វើម្ចាស់ផ្ទះកីឡាទ្វីបអាស៊ី Asian Games នៅ៤ឆ្នាំបន្ទាប់ពោលគឺឆ្នាំ២០២២ ចិននឹងដាក់កីឡាប្រភេទនេះប្រកួតផ្លូវការដណ្តើមមេដាយដូចកីឡាផ្សេងៗទៀតដែរ។ មិនត្រឹមតែប៉ុណ្ណោះសហព័ន្ធកីឡាអេឡិចត្រូនិកអន្តរជាតិ និងក្រុមប្រឹក្សាអូឡាំពិកអន្តរជាតិ កំពុងខ្នះខ្វែងដាក់បញ្ចូលកីឡាសម័យទំនើបនេះក្នុងព្រឹត្តិការណ៍កីឡាអូឡាំពិកនាពេលខាងមុខ៕

អត្ថបទ៖ ជាន ចាន់រ៉ា