បើចែកផ្លូវជាមួយ Man Utd លោក Mourinho អាចមានកន្លែង៣ចាំទទួល

2018-08-29 04:52:07
ចំនួនមតិ 0 | ចំនួនចែករំលែក 0

ចន្លោះមិនឃើញ

“The Special One” គឺជារហស្សនាមដ៏ល្បីឈ្មោះដែល Jose Mourinho បានហៅខ្លួនឯងបញ្ជាក់ថាលោកគឺជា អ្នកចូលចិត្តជ័យជម្នះ។ មិនខុសពីឈ្មោះនេះបុរសសញ្ជាតិព័រទុយហ្គាល់បានឈ្នះពាន២៥ហើយនៅក្នុងអាជីពជាអ្នកចាត់ការទូទៅពីប្រទេស៤ផ្សេងគ្នាមាន អង់គ្លេស, អេស្ប៉ាញ, អ៊ីតាលី និងព័រទុយហ្គាល់។

ទោះមានអាជីពជោគជ័យ Mourinho ក៏ភ្លក់រសជាតិការបណ្ដេញចេញមិនតិចដងដែរដូចជាកាលដឹកនាំនៅ Chelsea លើកទីមួយ, នៅ Real Madrid និងនៅ Chelsea លើកទីពីរជាដើម។ បច្ចុប្បន្នអ្នកចាត់ការវ័យ៥៥ឆ្នាំកំពុងដឹកនាំនៅក្លឹបធំអង់គ្លេស Manchester United។ នៅទីនោះសម្រាប់២រដូវកាលដំបូងអាចរាប់ថាជាជោគជ័យរបស់លោកដោយបានឈ្នះពាន League Cup និង Europa League ប៉ុន្តែបច្ចុប្បន្នកៅអីរបស់ Mourinho មិនសូវស្រួលប៉ុន្មានទេក្រោយដឹកនាំក្រុមចាញ់២ប្រកួតជាប់គ្នា និងក្រោមក្លឹបកំពូលតារាងរហូត៦ពិន្ទុ។ បើមានការបញ្ឈប់ពីតួនាទីមុនអស់កុងត្រាមែន Mourinho អាចទៅកន្លែង៣ដែលកំពុងបើកទ្វាររង់ចាំ៖

#១ Inter Milan

Jose Mourinho មានអនុស្សាវរីយ៍ល្អជាមួយ Inter Milan ដោយធ្លាប់ដឹកនាំក្រុមឈានដល់ចំណុចកំពូលពិសេសគឺការឈ្នះ Champions League ក្នុងឆ្នាំ២០១០។ យ៉ាងណាក្រោយការចាកចេញរបស់ Mourinho កាលពី៨ឆ្នាំមុន ក្រុមរហស្សនាមថា Nerazzurri ធ្លាប់បានកៅអី Champions League តែ២ដងប៉ុណ្ណោះ និងមិនដែលឈ្នះពានធំអ្វីសោះចាប់តាំងពីពេលនោះមក។

ទោះក្រោមការដឹកនាំរបស់ Luciano Spalletti ធ្វើឲ្យ Inter មានកៅអី Champions League រដូវកាលនេះប៉ុន្តែពួកគេចាប់ផ្ដើមរដូវកាលនៅ Serie A មិនល្អសោះដោយលេង២ប្រកួតស្មើ១ ចាញ់១ ទល់នឹង Torino និង Sassuolo ដូច្នេះបើលទ្ធផលបែបនេះនៅតែបន្ត ដំណែងអ្នកចាត់ការពួកគេអាចនឹងរង្គើ ហើយបើ Mourinho ចាកចេញពី United ទៀតនោះលទ្ធភាពទៅដឹកនាំ Inter ម្ដងទៀតពិតជាអាចកើតមានព្រោះ Mourinho ស្គាល់បាល់ទាត់អ៊ីតាលីច្បាស់ណាស់។

#២ Chinese Super League

Chinese Super League ឬលីគបាល់ទាត់កំពូលរបស់ប្រទេសចិនកំពុងមានភាពល្បាញល្បីនាពេលបច្ចុប្បន្ន។ ក្រៅពីកីឡាករល្បីៗកំពុងលេងដូចជា Hulk, Oscar, Alex Witsel និង Paulinho ក៏មានដែរនូវអ្នកចាត់ការកំពូលៗកំពុងដឹកនាំនៅទីនោះដូចជាលោក Manuel Pellegrini, Fabio Capello, Marcello Lippi និង Felipe Scolari។ សម្រាប់ Mourinho លោកបានឈ្នះពានជាច្រើនរួចមកហើយនៅអឺរ៉ុបដូច្នេះថាមិនត្រូវ លោកអាចប្ដូរបទពិសោធន៍ទៅដឹកនាំនៅអាស៊ីម្ដង ហើយណាមួយលីគចិនហ៊ានចាយលុយលើប្រាក់ពលកម្មរបស់អ្នកចាត់ការល្បីៗដោយមិនញញើតដៃ។

#១ ក្រុមជម្រើសជាតិព័រទុយហ្គាល់

គ្មានអាថ៌កំបាំងនោះទេចំពោះរឿងដែលថា Mourinho នឹងដឹកនាំក្រុមជម្រើសជាតិព័រទុយហ្គាល់នៅថ្ងៃណាមួយ ព្រោះរូបលោកផ្ទាល់ធ្លាប់ផ្ដល់កិច្ចសម្ភាសន៍ជាមួយ Yahoo កាលពីពេលមុន។ ទោះជាគ្រូបង្វឹកសព្វថ្ងៃFernando Santos ធ្លាប់មានគុណបំណាច់នាំក្រុមឈ្នះ Euro ២០១៦ តែការពិតមិនអាចប្រកែកបានគឺលោកMourinho គឺជាអ្នកចាត់ការជនជាតិព័រទុយហ្គាល់ដ៏ល្អបំផុតនាពេលបច្ចុប្បន្ន។ Mourinho មិនធ្លាប់ដឹកនាំនៅក្រុមជម្រើសជាតិណាមួយទេ ដូច្នេះការដឹកនាំព័រទុយហ្គាល់នឹងក្លាយជាបទពិសោធន៍ថ្មីមួយសម្រាប់លោក៕