Mourinho ពន្យល់ពីមូលហេតុដែលតំបន់ប្រយុទ្ធ Man Utd មិនមុតស្រួចដូច Liverpool និង Man City

2018-09-02 06:37:55
ចំនួនមតិ 0 | ចំនួនចែករំលែក 0

ចន្លោះមិនឃើញ

Jose Mourinho បានសារភាពថាក្រុម Manchester United មិនអាចធ្វើដូច Man City និង Liverpool ជាក្រុមដែលចាត់ទុកថាមានតំបន់ប្រយុទ្ធមុតស្រួចនោះទេ ពីព្រោះក្រុមលោកខ្សោយតំបន់ការពារ។ នេះបើតាម Metro។

សម្ពាធយ៉ាងខ្លាំងកំពុងដាក់បន្ទុកទៅលើលោក Mourinho ក្រោយចាញ់យ៉ាងអាម៉ាស់ក្នុងដី ០-៣ ក្រោមថ្វីជើងក្រុមមាន់ខ្នាយមាស Spursនិង ចាញ់ក្រុម Brighton ៣-២ មុនពេលលោកដឹកនាំបិសាចក្រហមទៅលេងនៅផ្ទះរបស់ Burnley រាត្រីថ្ងៃអាទិត្យនេះ។

ប្រព័ន្ធលេងរបស់គ្រូបង្វឹកសញ្ជាតិព័រទុយហ្គាល់រងការរិះគន់យ៉ាងដំណំ ប៉ុន្តែគ្រូបង្វឹកវ័យ ៥៥ ឆ្នាំជឿថា តំបន់ការពាររបស់លោកត្រូវតែពង្រឹងឲ្យល្អជាងនេះ ទើប Man Utd អាចប្រយុទ្ធបានខ្លាំង។

"ក្រុមដែលពិតជាលេងបានល្អ គឺជាក្រុមដែលមានភាពរឹងមាំខ្លាំងក្លាពីផ្នែកខាងក្រោម។ សួរថាតើ United អាចលេងដូច City ឬ Liverpool ដែរឬទេ ៖ ពួកគេលេងរបៀបដែលពួកគេលេង ហើយយើងលេងរបៀបដែលយើងលេង។ ខ្ញុំមិនចង់និយាយពីអ្វីដែលទាក់ទងនឹងរឿងនោះទេ" Mourinho បាននិយាយ។

លោកបន្ទោសថា ការលេងទល់នឹង Tottenham កំហុសឆ្គងតំបន់ការពារ២ដងក្នុងរវាង៥នាទី Man Utd ត្រូវតែចាញ់។

ការខ្វែងគំនិតគ្នារវាងគ្រូបង្វឹក និង ម្ចាស់ក្លឹប

ដោយមូលហេតុនេះហើយ ទើបកន្លងមក Jose Mourinho បានទទូចឲ្យលោក Ed Woodward អនុប្រធានប្រតិបត្តិរបស់ក្លឹបបិសាចក្រហមទិញកីឡាករបន្ថែមដើម្បីបំពេញតំបន់កណ្តាលដែលជាចំណុចចន្លោះប្រហោងរបស់ក្លឹប។ ប៉ុន្តែការបដិសេធរបស់លោក Woodward ជាអតីតគណនេយ្យករ និង វិនិយោគិន ដែលមិនចង់ចំណាយ ជាលទ្ធផល Man Utd បន្តចាញ់ដូច Mourinho បាននិយាយ។

Jose Mourinho និង លោក Ed Woodward អនុប្រធានប្រតិបត្តិរបស់ក្លឹបបិសាចក្រហម

កាលជំនាន់លោក Sir Alex Ferguson នៅដឹកនាំ គ្រូបង្វឹកដ៏ជោគជ័យបំផុតរូបនេះបាននិយាយថា ការទិញលក់កីឡាករមិនមែនជាភារកិច្ចរបស់លោកទេ តែជាការសម្រេចរបស់ក្លឹប ម្ល៉ោះហើយគេមិនដែលលឺថាលោកមានបញ្ហារកាំរកូសជាមួយ Man Utd រឿងលក់ចេញទិញចូលកីឡាករឡើយ។

ប៉ុន្តែបន្ទាប់ពី Alex Ferguson ចូលនិវត្តន៍ បន្ទាប់ពីរួមរស់ជាមួយ Man Utd (ពីខែ សីហា ១៩៩២ ដល់ ខែ ឧសភា ២០១៣ ប្រហែល ២១ឆ្នាំ) ក្លឹបបិសាចក្រហមតែងផ្លាស់ប្ដូរគ្រូបង្វឹកជាញឹកញាប់ ហើយមូលហេតុចម្បង ត្រូវបានគេមើលឃើញថាមកទស្សនវិស័យផ្ទុយគ្នារវាងគ្រូបង្វឹក និង ម្ចាស់ក្លឹបដែលតែងតែចំណេញច្រើនជាងក្លឹបណាៗមួយនេះ លើបញ្ហាទិញលក់កីឡាករ៕

ប្រភព៖ Metro ប្រែសម្រួល៖ សុខ លាងហ៊ត