YouTuber ម្នាក់បើកកកាយចំណូលរកបានក្នុងពេល ៤ ឆ្នាំ ដែលគ្រប់គ្នាស្មានមិនដល់

2018-09-06 03:35:11
ចំនួនមតិ 0 | ចំនួនចែករំលែក 0

ចន្លោះមិនឃើញ

Caleb Marshall ជា YouTuber មួយរូបដែលបង្កើតវីដេអូបង្ហោះលើបណ្ដាញ YouTube អស់រយៈពេលប្រមាណ ៤ ឆ្នាំមកហើយ ដោយសាង Subscriber បានចំនួនជាង ១,៣ លាននាក់។

ប៉ុន្មានឆ្នាំមកនេះ Caleb ផលិតវីដេអូបាន ១៤៧ វីដេអូ ជាវីដេអូបង្ហាញពីការរាំហាត់ប្រាណ និងមានចំនួនទស្សនាសរុប ២១៦ លានដង។ មនុស្សភាគច្រើនប្រហែលជាគិតថា YouTuber រូបនេះអាចរកចំណូលបានក្រាស់ក្រែលពី Subscriber និងចំនួនទស្សនាដ៏ច្រើនលើសលប់នេះ។

ប៉ុន្តែតាមការបង្ហើបពី Caleb នៅក្នុងវីដេអូថ្មីមួយបានឲ្យដឹងថារយៈពេល ៤ ឆ្នាំកន្លងមកនេះ រូបគេអាចរកចំណូលបានត្រឹម ១៧ ៨៩៤,៧៣ ដុល្លារតែប៉ុណ្ណោះ។ ចំណូលបានតិចដល់ថ្នាក់នេះ ដោយសារក្នុងចំណោមវីដេអូទាំង ១៤៧ មានត្រឹម ១១ វីដេអូប៉ុណ្ណោះ ដែលទទួលបានការ Monetize (អាចរកចំណូល) ពី YouTube។

ពេលគិតពន្ធនៃចំណូលរួច (ពន្ធ ៣០%) និងចែកដល់ក្រុមការងារដទៃទៀតរបស់ខ្លួន ក្នុងមួយឆ្នាំ Caleb រកចំណូលបានតែ ២ ៨១៨ ដុល្លារប៉ុណ្ណោះ។

ទិន្នន័យនេះបង្ហាញឲ្យគ្រប់គ្នាដឹងថា YouTuber ដែលមាន Subscriber ច្រើន ឬ មានចំនួនទស្សនាច្រើនមិនប្រាកដថាមានចំណូលច្រើននោះទេ។ YouTuber ខ្លះត្រូវរកចំណូលតាមការលក់សម្ភារៈជាម៉ាកសញ្ញាផ្ទាល់ខ្លួន, ផ្សាយពាណិជ្ជកម្មឲ្យក្រុមហ៊ុនដទៃ និង បង្កើតកម្មវិធីផ្សេងៗ ដើម្បីបង្កើនចំណូលរបស់ខ្លួន៕

ប្រភព៖ The Verge ប្រែសម្រួល៖ សុខហេង