ឭពាក្យចចាមអារ៉ាមច្រើនពេកទាក់ទងនឹង Juventus កីឡាករ Marcelo ចេញមុខបកស្រាយ
- 2018-09-06 11:04:37
- ចំនួនមតិ 0 | ចំនួនចែករំលែក 0
ឭពាក្យចចាមអារ៉ាមច្រើនពេកទាក់ទងនឹង Juventus កីឡាករ Marcelo ចេញមុខបកស្រាយ
ចន្លោះមិនឃើញ
ខ្សែការពារស្លាប Marcelo ក្នុងថ្ងៃនេះ បាននិយាយថា ខ្លួននឹងបន្តលេងឲ្យ Real Madrid ដល់ទីបញ្ចប់។
កីឡាករប្រេស៊ីល បាននិយាយប្រាប់ទូរទស្សន៍ Real Madrid ថា៖ "ខ្ញុំសប្បាយចិត្តណាស់ជាមួយ Real Madrid។ ក្លឹបគឺជាផ្ទះរបស់ខ្ញុំ ហើយកុងត្រាខ្ញុំនៅសល់ពេលជាច្រើនឆ្នាំទៀត។ ខ្ញុំគិតថា វាជារឿងល្អដែលខ្ញុំត្រូវនិយាយឲ្យច្បាស់ៗអ៊ីចឹង ព្រោះកន្លងមកមានពាក្យចចាមអារ៉ាមជាច្រើន។ ខ្ញុំតែងតែប្រឹងប្រែងអស់ពីសមត្ថភាពពេលលេងឲ្យក្លឹបមួយនេះ"។
Marcelo បានបន្តទៀតថា ខ្លួននៅតែមានភាពសប្បាយរីករាយបន្តលេងឲ្យក្លឹបយក្សអេស្ប៉ាញ ហើយបញ្ជាក់ម្ដងទៀតថា ខ្លួនចង់បន្តលេងឲ្យក្លឹបជាច្រើនឆ្នាំទៀត។ កីឡាករថា៖ "ខ្ញុំនៅតែមានចិត្តចង់ឈ្នះដូចកាលដែលខ្ញុំមកលេងនៅក្លឹបនេះ កាលពីអាយុ ១៨ ឆ្នាំអ៊ីចឹង។ ខ្ញុំនឹងបន្តលេងឲ្យក្លឹបរហូតដល់ទីបញ្ចប់"។
ចាប់តាំងពីខែកក្កដាកន្លងទៅ ពោលគឺនៅពេល Cristiano Ronaldo បានធ្វើការចាកចេញពីក្លឹប Real Madrid ទៅ Juventus មានពាក្យចចាមអារ៉ាមជាច្រើនដែលថា ខ្សែប្រយុទ្ធព័រទុយហ្គាល់បានព្យាយាមទាក់ទាញមិត្តសម្លាញ់ Marcelo ឲ្យមកចូលរួមជាមួយខ្លួននៅក្លឹបអ៊ីតាលី។
Marcelo បានចូលរួមជាមួយ Real Madrid កាលពីឆ្នាំ ២០០៧។ ក្នុងរយៈពេលជាង ១០ ឆ្នាំរួមរស់ជាមួយក្លឹប កីឡាករប្រេស៊ីលលេងបាន ៤៥៦ ប្រកួត និងស៊ុតចូល ៣៣ គ្រាប់៕