ទិញកាបូបប្រេនតាមអនឡាញ តម្លៃជាង១ពាន់ដុល្លារ ពេលឥវ៉ាន់មកដល់ សឹងដាច់ផ្ងារ (វីដេអូ)

2018-09-10 02:26:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រីម្នាក់បានដាក់ពាក្យបណ្ដឹង បន្ទាប់ពីអ្នកស្រីបានបញ្ជាទិញកាបូបប្រេន តាមរយៈអនឡាញ តែបែរជាទទួលបានរបស់ផ្សេងទៅវិញ។

អ្នកស្រី Panhathai Lertsin-udom បាននាំយកភស្តុតាងនៃការបញ្ជាទិញរបស់អ្នកស្រី រួមមានបង្កាន់ដៃផ្ទេរលុយលើអនឡាញ , ការឆាតនៅលើ Line ជាមួយអ្នកលក់ និង វីដេអូមួយខ្សែផងដែរ ទៅកាន់ប៉ុស្តិ៍ប៉ូលិស កាលពីថ្ងៃអាទិត្យ ទី០៩ ខែកញ្ញា ឆ្នាំ២០១៨ ម្សិលមិញនេះ ដើម្បីប្តឹងគណនីបណ្ដាញសង្គម Line មួយឈ្មោះថា B.PROMOTE។

ស្ត្រីជនជាតិថៃខាងលើ ប្រាប់ឲ្យដឹងថា អ្នកស្រីបានបញ្ជាទិញកាបូបដៃមួយទឹកម៉ាក Celine កាលពីថ្ងៃអង្គារសប្ដាហ៍មុន បន្ទាប់ពីទំព័រ Instagram មួយមានឈ្មោះថា brandnameby_Oa បង្ហោះលក់ ដោយអ្នកលក់ឈ្មោះ B.PROMOTE។ អ្នកស្រី Panhathai បានផ្ទេរលុយចំនួន ៣៧ ០០០បាត ឬស្មើនឹង ១ ១០០ដុល្លារ ទៅកាន់គណនីធនាគារដែល B.PROMOTE ផ្ញើឲ្យនៅក្នុងថ្ងៃតែមួយនោះ។

«ខ្ញុំបានសម្រេចចិត្តផ្ទេរលុយឲ្យគេយ៉ាងលឿន ព្រោះខ្ញុំដឹងថា អ្នកទិញជាច្រើនកំពុងចង់ទិញរបស់ប្រេនៗបែបនេះ»។ នេះបើតាមសម្ដីរបស់អ្នកស្រី Panhathai។

បន្ទាប់ពីបានផ្ទេរលុយរួច អ្នកស្រីត្រូវអ្នកលក់ប្រាប់ថា កាបូបនោះនឹងត្រូវដឹកជញ្ជូនឲ្យអ្នកស្រី តាមរយៈក្រុមហ៊ុនដឹកជញ្ជូន Kerry Express Thailand។ ផ្ទុយទៅវិញ នៅថ្ងៃបន្ទាប់ (ត្រូវនឹងថ្ងៃពុធ) គណនី Line របស់ B.PROMOTE ត្រូវបានបិទ ខណៈអ្នកស្រីក៏មិនអាចទាក់ទងជាមួយគេបានទៀត។

យ៉ាងណាមិញ នៅពេលដែលទំនិញមកដល់ អ្នកស្រី Panhathai បានឲ្យគេជួយថតវីដេអូ ខណៈអ្នកស្រីបើកកញ្ចប់នោះមើល ស្រាប់តែឃើញដបទឹក រូប Kung Fu Panda ចំនួន ២ ទៅវិញ។

កាសែតថៃ Bangkok Post បានទាក់ទងជាមួយទំព័រ Instagram ឈ្មោះ brandnameby_Oa ខាងលើ ដែលគេប្រើដើម្បីបង្ហោះលក់ផលិតផលប្រណីតមួយទឹក។ តាមការពិត ទំព័រមួយនេះគ្រាន់តែជាអ្នកស៊ីឈ្នួលបង្ហោះលក់ឲ្យគេប៉ុណ្ណោះ ដោយទទួលបានថ្លៃសេវាកម្មចំនួន ៥០បាត សម្រាប់ការបង្ហោះលក់ម្ដង។

អ្នកស្រី Panhathai បាននិយាយថា «ខ្ញុំធ្លាប់បានទិញរបស់ប្រេនៗតាមអនឡាញច្រើនដងមកហើយ។ គ្រប់ពេលខ្ញុំតែងតែឆែកមើលគ្រប់ព័ត៌មានទាំងអស់ មុនពេលបញ្ជាទិញ។ ខ្ញុំមិននឹកស្មានសោះថា នៅទីបំផុតវាបានកើតឡើងចំពោះខ្ញុំ»៕

សូមទស្សនាវីដេអូខាងក្រោម៖

ចុចអាន៖