Ramos ទិតៀនធ្ងន់ៗទៅលើ Griezmann រឿងនិយាយថាមានកម្រិតស្មើ Ronaldo-Messi

2018-09-18 13:56:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារ Sergio Ramos បានធ្វើការទិតៀនទៅលើ Antoine Griezmann ក្រោយកីឡាករបារាំងបាននិយាយកាលពីម្សិលមិញថា ខ្លួនមានកម្រិតលេងស្មើ Cristiano Ronaldo និង Lionel Messi។

Ramos បានថ្លែងក្នុងសន្និសីទសារព័ត៌មានមុនប្រកួត Champions League ថា៖ "ភាពល្ងង់ខ្លៅពិតជាធ្វើឲ្យមនុស្សយើងនិយាយយ៉ាងកម្រោល។ នៅពេលដែលខ្ញុំឮ Griezamann និយាយបែបនេះ ខ្ញុំបានគិតទៅដល់ ខ្សែប្រយុទ្ធ Totti, អ្នកចាំទី Buffon, Iker Casillas, ខ្សែប្រយុទ្ធ Raul, ខ្សែបម្រើ Andres Iniesta និង Xavi ដែលសុទ្ធសឹងជាបណ្ដាកីឡាករដែលបានឈ្នះពានជាច្រើន ប៉ុន្តែមិនបានឈ្នះ Ballon D'or"។

ខ្សែការពារអេស្ប៉ាញ បានបន្ត៖ "នរណាក៏ដោយមានសិទ្ធិបញ្ចេញមតិយោបល់របស់ខ្លួន ប៉ុន្តែខ្ញុំគិតថា លោក Diego Simeone និង ប្រធានក្រុមកីឡាករ Diego Godin គួរតែផ្ដល់ការប្រឹក្សាខ្លះដល់ Griezmannដើម្បីឲ្យស្គាល់អំពីតម្លៃខ្លួនសមស្របរបស់គេ"។

ទោះជាវាយប្រហារពាក្យសំដីបែបនេះក្ដី Ramos ក៏បានធ្វើការសរសើរ Griezmann ហើយហៅកីឡាករបារាំងគឺជា "កីឡាករអស្ចារ្យ" មួយរូប។

សូមបញ្ជាក់ផងដែរថា ឆ្នាំ ២០១៨ អាចចាត់ទុកបានជាឆ្នាំជោគជ័យមួយសម្រាប់អាជីពបាល់ទាត់របស់ Griezmann។ កីឡាករបានឈ្នះពាន Europa League, World Cup និង UEFA Super Cup។ កាលពីអំឡុងពេលប្រកាសបេក្ខភាពកំពូលប្រជែងពានកីឡាករល្អបំផុតនៅអឺរ៉ុបកាលពីពេលថ្មីៗកន្លងទៅ ខ្សែប្រយុទ្ធបារាំងបានដាក់ចម្ងល់ថា ម៉េចបានជាមិនមានកីឡាករសញ្ជាតិបារាំងស្ថិតក្នុងចំណោមបេក្ខភាពទាំង ៣ នោះ៕

ប្រភព៖ Dailymail | ESPN FC ប្រែសម្រួល៖ ហ៊ីម រស្មី