មេ Real បញ្ជាក់ច្បាស់ៗអំពីគោលជំហរក្លឹបក្នុងការទៅលេងនៅអាមេរិក

2018-09-24 10:50:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្លឹប Real Madrid លោក Florentino Perez កាលពីពេលថ្មីៗនេះ បានប្រកាសថា ក្លឹបនឹងមិនចូលរួមលេងប្រកួត La Liga នៅលើទឹកដីសហរដ្ឋអាមេរិក។

ក្នុងកិច្ចប្រជុំរបស់ក្លឹបដែលបានធ្វើឡើងកាលពីម្សិលមិញ លោក Perez បាននិយាយ៖ "យើង (Real Madrid) នឹងមិនទៅលេងប្រកួត La Liga នៅសហរដ្ឋអាមេរិកឡើយ។ ខ្ញុំមិនដឹងថា ការទៅលេងនៅទីនោះផ្ដល់ផលប្រយោជន៍ឡើយដល់ក្លឹប។ ដូច្នេះយើងនឹងធ្វើការបដិសេធចំពោះការប្រកួតប្រភេទហ្នឹង"។

កាលពីខែសីហាកន្លងទៅ លីគកំពូលអេស្ប៉ាញ (La Liga) បានចុះកិច្ចព្រមព្រៀងរយៈពេល ១៥ ឆ្នាំ ជាមួយក្រុមហ៊ុន Relevent ក្នុងការបើកផ្លូវឲ្យមានការរៀបចំការប្រកួតលីគមួយនេះ (យ៉ាងតិចក៏មួយប្រកួតក្នុងមួយរដូវកាល) នៅលើទឹកដីសហរដ្ឋអាមេរិក។ ទោះជាយ៉ាងណា កិច្ចព្រមព្រៀងរងការរិះគន់ជាច្រើន ពីសំណាក់កីឡាករដែលប្រកបអាជីពក្នុងលីគ La Liga។

កន្លងមកមានរបាយការណ៍ជាច្រើន ចុះផ្សាយថាការប្រកួតរវាងក្លឹប Barcelona និង Girona អាចក្លាយជាប្រកួត La Liga ទីមួយដែលនឹងត្រូវប្រព្រឹត្តទៅនៅសហរដ្ឋអាមេរិក។ ទោះជាយ៉ាងណា ភាគីពាក់ព័ន្ធកំពុងស្ថិតក្នុងដំណាក់កាលចរចាគ្នានៅឡើយ៕

ប្រភព៖ Marca ប្រែសម្រួល៖ ហ៊ីម រស្មី