សាស្រ្តាចារ្យ ឈឿង រចនា៖ "ឲ្យតែរៀនខ្លាំង ត្រឹមឆ្នាំទីពីរទីបី ក្រុមហ៊ុនកក់យកទៅធ្វើការបាត់ហើយ"

2018-09-25 03:23:01
ចំនួនមតិ 0 | ចំនួនចែករំលែក 0

ចន្លោះមិនឃើញ

"ព័ត៌មានវិទ្យា ឬ IT" អាចចាត់ទុកជាជំនាញពិបាកមួយ ប៉ុន្តែប្រសិនបើសិស្សរៀនពូកែ អាចត្រូវក្រុមហ៊ុនរដ្ឋ និងឯកជន កក់តាំងពីឆ្នាំទី២តែម្ដង។ នេះបើតាមលើកឡើងសាស្ត្រាចារ្យ ឈឿង រចនា។

លោក ឈឿង រចនា ប្រធានផ្នែកកុំព្យូទ័រវិទ្យា នៃសាកលវិទ្យាល័យន័រតុនឲ្យដឹងថា ឲ្យតែសិស្សពូកែពិតប្រាកដ មិនខ្វះការងារនោះទេ។

លោកបានកត់សម្គាល់លើមុខជំនាញ IT ដែលលោកគ្រប់គ្រង មានក្រុមហ៊ុនមកទាក់ទងនៅពេលសិស្សរៀនត្រឹមឆ្នាំទីពីរឆ្នាំទីបី ដើម្បីយកទៅធ្វើការ។

លោកសាស្ត្រាចារ្យប្រាប់ថា ក្រុមហ៊ុនទាំងនោះបានមកវាស់សមត្ថភាពរបស់សិស្ស តាមរយៈគ្រូបន្ទុកថ្នាក់ ការធ្វើ Assignment ឬ មើលលើពិន្ទុប្រចាំឆមាសជាដើម។ ស្ថាប័នដែលរើសសិស្សទៅធ្វើការដូចជាធនាគារ ផលិតកម្ម ក្រុមហ៊ុនឌីហ្សាញ និងប្រព័ន្ធផ្សព្វផ្សាយ (វិទ្យុ ទូរទស្សន៍ គេហទំព័រ) ជាដើម។

យុវតី ស្រេន ណាស៊ីម៉ះ រៀនផ្នែក Computer Sience នៅន័រតុន

លោកបន្តថា ក្រៅពីក្រុមហ៊ុនមកស្រាវជ្រាវខ្លួនឯង ខាងសាលាក៏ជួយជ្រោមជ្រែងសម្រាប់សិស្សរៀនពូកែនៅពេលក្រុមហ៊ុនទាក់ទងមក ដោយសាកលវិទ្យាល័យនឹងចម្រាញ់យក (Short List) ពូកែៗ ហើយឱ្យសិស្សនិស្សិតដាក់ CV ទៅក្រុមហ៊ុនផ្ទាល់។ ម្យ៉ាងទៀតនៅឆ្នាំទី ៤ ឆមាសទី១ ខាងសាកលវិទ្យាល័យ តម្រូវឱ្យនិស្សិតធ្វើនិក្ខេបបទបញ្ចប់ការសិក្សា នៅតាមបណ្ដាក្រុមហ៊ុនឯកជន និងរដ្ឋ ហើយបើពួកគេអាចធ្វើការងារបានល្អ ក្រុមហ៊ុននឹងយកតែម្ដង ដោយមិនបាច់ដាក់ CV អ្វីឡើយ។

ក្នុងមុខជំនាញព័ត៌មានវិទ្យា មានជំនាញជាច្រើនត្រូវសិក្សា ហើយបើផ្អែមប្រសាសន៍របស់លោកសាស្ត្រាចារ្យ រចនា ជំនាញ Design, Multimedia, Software Development និង E-Commerce មានទីផ្សារខ្ពស់ជាងគេ។

តាមសាស្រ្តាចារ្យរូបនេះបានលើកឡើងថា ដោយធនធានមនុស្សផ្នែក IT ហាក់ខ្វះខាតច្រើ បើសិស្សចេះខ្លាំង ពួកគេងាយទទួលបានការងារល្អ ប្រាក់ខែស្តង់ដារ ហើយក៏អាចមានឱកាសទៅសិក្សានៅក្រៅប្រទេសទៀតផង។