Facebook អាចត្រូវពិន័យ ១,៦៣ ពាន់លានដុល្លារ រឿងអ្នកប្រើ ៥០ លាននាក់រងគ្រោះពី Hacker

2018-10-02 03:30:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសាររឿងរ៉ាវគណនីចំនួន ៥០ លានត្រូវរងគ្រោះពីសំណាក់ Hacker កាលពីថ្មីៗនេះ បណ្ដាញសង្គមយក្ស Facebook អាចត្រូវរងពិន័យ ១,៦៣ ពាន់លានដុល្លារពីក្រុមឃ្លាំមើលសិទ្ធឯកជនរបស់សហភាពអឺរ៉ុប។

ផ្អែកតាមការចុះផ្សាយរបស់សារព័ត៌មាន The Wall Street Journal បានឲ្យដឹងថា Data Protection Commission ដែលឃ្លាំមើល Facebook យ៉ាងសកម្មនៅអឺរ៉ុបបានសុំឲ្យ Facebook ផ្ដល់ព័ត៌មានបន្ថែមទាក់ទងនឹងរឿងរ៉ាវដែលគណនីជាង ៥០ លានត្រូវគេ Hack បានសម្រេចតាមរយៈ Access Token។

DPC បាននិយាយថា ៖ "យើងបារម្ភថាបញ្ហានេះត្រូវបានគេរកឃើញកាលពីថ្ងៃអង្គារ (សប្ដាហ៍មុន) ហើយបានប៉ះពាល់អ្នកប្រើប្រាស់រាប់លាននាក់ ប៉ុន្តែមកទល់ពេលនេះ Facebook នៅមិនទាន់អាចរកហេតុផលជាក់លាក់នាំឲ្យកើតមានបញ្ហានេះ និងមិនបានប្រាប់ផលប៉ះពាល់លើអ្នកប្រើប្រាស់ដែលរងគ្រោះនោះទេ”។

The Wall Street Journal បានបញ្ជាក់ថា Facebook អាចត្រូវរងការពិន័យ ១,៦៣ ពាន់លានដុល្លារ ប្រសិនបើមិនអាចផ្ដល់ព័ត៌មានបានគ្រប់គ្រាន់ដល់ DPC។ កាលពីដើមឆ្នាំ ២០១៨ បណ្ដាញសង្គមនេះបានជួបរឿងខ្វល់ចិត្តម្ដងរួចមកហើយទាក់ទងនឹងការបែកធ្លាយទិន្នន័យសម្ងាត់អ្នកប្រើចំនួន ៨៧ លានគណនី៕

ចុចអាន៖

ប្រភព៖ Economic Times ប្រែសម្រួល៖ សុខហេង