ទៅលេងនូវែលហ្សេឡង់ អត់ដឹងច្បាប់ថ្មីប្រយ័ត្នត្រូវពិន័យអស់ ៣ ៣០០ ដុល្លារឥតអំពើ

2018-10-03 11:59:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ភ្ញៀវទេសចរដែលហោះចូលមកដល់ប្រទេសនូវែលហ្សេឡង់នឹងតម្រូវឲ្យបើកបង្ហាញរាល់គ្រប់ប្រភេទកូដសម្ងាត់ (Password) លើឧបករណ៍អេឡិចត្រូនិក បើពុំដូច្នោះទេនឹងត្រូវមន្រ្តីគយធ្វើការផាកពិន័យនូវទំហំសាច់ប្រាក់ប្រមាណ ៣ ៣០០ ដុល្លារ ។

ច្បាប់បញ្ញត្តិថ្មីបានប្រកាសជាធរមានកាលពីថ្ងៃចន្ទ ទី ១ តុលា ជាផ្នែកបន្ថែមដល់មន្រ្តីគយរបស់នូវែលហ្សេឡង់ក្នុងការស៊ើបអង្កេតទៅលើប្រព័ន្ធឌីជីថល ប្រសិនរកឃើញនូវករណីសង្ស័យលើបទល្មើសឬកំហុសឆ្គងណាមួយ។

យោងតាមច្បាប់ដូចបានកំណត់សម្រាប់ឆ្នាំ ២០១៨ រាល់អ្នកធ្វើដំណើរត្រូវប្រគល់ព័ត៌មានទាក់ទងនឹងកូដសម្ងាត់ឧបករណ៍អេឡិចត្រូនិករាប់បញ្ចូលទាំង PIN Code, Password, Encryption Key ឬ Fingerprint ដោយគយក៏នឹងអនុញ្ញាតឲ្យថតចម្លង ត្រួតពិនិត្យ និងវាយតម្លៃទៅលើឧបករណ៍ដែលបានឆែកឆេរ។

អ្នកនាំពាក្យលោក *Terry Brown មានប្រសាសន៍ថា៖ "វាជាដំណើរការ file-by-file ស្វែងរកលើទូរសព្ទ ដោយពុំចូលដល់ទិន្នន័យ Cloud នោះទេ ហើយការត្រួតពិនិត្យនឹងធ្វើឡើងអំឡុងពេលឧបករណ៍ជាប់ Flight Mode”។ បើនរណាមិនព្រមសហការជាមួយក្រុមត្រួតពិនិត្យ នោះនឹងពិន័យយ៉ាងតិច ៣ ៣០០ ដុល្លារ រហូតឈានដល់ការរឹបអូសឧបករណ៍នោះទុកថែមទៀតផង។

រដ្ឋមន្ត្រីគយលោក Kris Faafoi ក៏បានសង្កត់ធ្ងន់កាលពីសប្តាហ៍មុនថាច្បាប់នេះពិតជាមានសារៈសំខាន់សម្រាប់សន្តិសុខតាមព្រំដែន ការធ្វើពាណិជ្ជកម្ម និងការធ្វើដំណើរ។ នេះពុំមែនជាប្រទេសដំបូងដែលបើកការស្រាវជ្រាវតាមប្រព័ន្ធឌីជីថលបែបនេះឡើយ ក្រឡេកទៅមើលសហរដ្ឋអាមេរិកគិតបញ្ចប់ត្រឹមខែកញ្ញា ឆ្នាំ ២០១៧ ករណីត្រួតពិនិត្យដូចគ្នានេះក៏សម្រេចលើ ៣០ ២០០ ឧបករណ៍រួចមកហើយ ពោលមានការកើនឡើងពី ១៩ ០៥១ ធៀបនឹងឆ្នាំចាស់៕