ក្រោយសំងំលាក់ខ្លួនជាយូរ ពេលនេះ Fan Bingbing ចេញសារសុំទោសជាលើកដំបូងចំពោះករណីពន្ធ

2018-10-04 02:21:13
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងរ៉ាវស្មុគស្មាញទាក់ទងករណីពន្ធរបស់ តារាសម្ដែងចិន Fan Bingbing បានបង្កឲ្យមហាជនមិនអស់ចម្ងល់ទាល់តែសោះ ពិសេសពេលនាងអវត្តមានពីភ្នែកសាធារណជនរយៈពេលជាង ៣ខែ ប៉ុន្តែពេលនេះ Binbing បានចេញមុខសុំទោសហើយ។

អ្នកគាំទ្រ ក៏ដូចជាសារព័ត៌មានទាំងក្នុង និងក្រៅប្រទេសបានផ្ដោតការតាមដានចំពោះការបាត់ខ្លួនដ៏អាថ៌កំបាំងរបស់ Fan Bingbing រយៈពេល ៣ខែនេះគ្រប់គ្នា មានន័យថាតាំងពីថ្ងៃទី ០១ ខែកក្កដាមកម្ល៉េះ។ ស្របពេលជាមួយគ្នានោះ ក៏មានមជ្ឈដ្ឋានមួយចំនួន លើកឡើងថា តារាស្រីរូបនេះកំពុងស្ថិតក្រោមការចាប់ខ្លួនរបស់មន្ត្រីមានសមត្ថកិច្ចរបស់ចិន ក្រោយជាប់ពាក់ព័ន្ធរឿងកុងត្រាភាពយន្តដែលខុសច្បាប់ ព្រមទាំងករណីគេចពន្ធផង។

ដោយឡែក ក្រោយមានការព្រួយបារម្ភសុខទុក្ខរបស់តារាសំណព្វចិត្តរបស់ខ្លួន ពេលនេះអ្នកគាំទ្រទាំងអស់បានរសាយវិញហើយ នៅពេល Fan Bingbing ចេញមុខសុំទោសជាលើកដំបូង កាលពីថ្ងៃទី ០៣ ខែតុលា ដោយមានសេចក្ដីថា៖ «មួយរយៈនេះ ខ្ញុំរស់ទ្រាំនឹងរឿងឈឺចាប់ដែលមិនធ្លាប់បានជួបប្រទះពីមុន ព្រមទាំងព្យាយាមរៀនសូត្រពីខ្លួនឯងកាន់តែស៊ីជម្រៅ។ ខ្ញុំពិតជាខ្មាស និងមានអារម្មណ៍ថាខុសឆ្គងបំផុតចំពោះអ្វីដែលខ្ញុំបានធ្វើកន្លងមក ហើយខ្ញុំក៏សុំទោសដោយស្មោះអស់ពីចិត្តចំពោះអ្នកគ្រប់គ្នា»។

ក្នុងសារនោះដែរ តារាចិនរូបនេះ ក៏បានបញ្ជាក់ដែរថា អស់រយៈពេលជាយូរ នាងខ្វះទំនួលខុសត្រូវ និងមិនសូវអើពើនឹងប្រទេសជាតិ ហើយបែរជាគិតតែប្រយោជន៍ផ្ទាល់ខ្លួនទៅវិញ។ Fan Binbing ថែមទាំងទទួលស្គាល់ថា ខ្លួនពិតជាអាម៉ាស់នឹងទង្វើដែលបានប្រព្រឹត្តិណាស់ ហើយនេះក៏ជាមេរៀនធំក្នុងជីវិតនាងដែរ ព្រមទាំងប្ដេជ្ញាគោរពច្បាប់ប្រទេសឲ្យបានខ្ចាប់ខ្ជួនបំផុត។ មួយវិញទៀត នាងក៏ទទួលស្គាល់ថា ពិតជាខ្វះសមត្ថភាពក្នុងការប្រឈមមុខនឹងបញ្ហាទាំងនេះ រហូតនាំខ្លួនឯងល្មើសនឹងច្បាប់របស់ប្រទេស។