ប្រទេស២ នៅអាស៊ានជាប់ក្នុងចំណោម ១០ប្រទេសល្អបំផុតសម្រាប់អ្នកទេសចរឯកា

2014-09-20 18:52:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ការធ្វើដំណើរកម្សាន្តមានគូ ឬធ្វើឡើងជាក្រុម ទើបមានភាពរីករាយ ប៉ុន្តែមិនមែនមនុស្សគ្រប់រូបសុទ្ធតែមានគូនោះទេ។ ប្រិយមិត្តខ្លះប្រហែលជាមានភាពឯកាខ្លាំងពេលទៅណាមកណាម្នាក់ឯង។ ទោះយ៉ាងណា ថ្ងៃចុងសប្ដាហ៍នេះ Sabay សូមនាំអារម្មណ៍លោកអ្នកទៅសាកល្បងប្រទេសសម្រាប់អ្នកទេសចរឯកាល្អដាច់គេទាំង ១០ វិញ ដែលក្នុងនោះមាន៖

១០. ប្រទេសឥណ្ឌូណេស៊ី

ឥណ្ឌូណេស៊ី គឺជាប្រទេសមួយដែលធំជាងគេនៅក្នុងតំបន់អាស៊ាន។ ប្រាង្គប្រាសាទបុរាណ ម្ហូបអាហារថោកៗ ការសំដិលថ្ងៃក្រោមកាំរស្មីព្រះអាទិត្យដ៏រ៉ូមែនទិក និងការម៉ាស្សាដោយនារីស្អាតៗ ពិតជាស័ក្ដិសមបំផុតសម្រាប់អ្នកគ្មានស្នេហាជ្រើសរើសជាទីកម្សាន្ត។ ប្រសិនបើអ្នកចង់បានភាពស្ងប់ស្ងាត់ អាចធ្វើដំណើរទៅកាន់កោះបាលី ដែលនឹងនាំអារម្មណ៍អ្នកអណ្ដែតអណ្ដូងទៅកាន់សម័យដើមនាទសវត្សរ៍ ១៩៧០។

៩. ប្រទេសស៊ុយអែត

ប្រទេសនៅទ្វីបអឺរ៉ុបមួយនេះ ពិតជាមានភាពទាក់ទាញបំផុតចំពោះអ្នកធ្វើដំណើរកម្សាន្តបែបឯកា ដោយសារមានទីក្រុងជាច្រើនហ៊ុមព័ទ្ធដោយទឹក។ សួនច្បារនានាប្របមាត់ទឹក អាចជាកន្លែងល្អឥតខ្ចោះចំពោះការជិះកង់ និងដើរកម្សាន្តក្នុងអារម្មណ៍លន្លង់លន្លោចម្នាក់ឯង។

៨. ប្រទេសជប៉ុន

បន្ទាប់ពីដើរមើលទីក្រុងតូក្យូដ៏ទំនើបហើយ លោកអ្នកអាចសាកល្បងជិះរថភ្លើងល្បឿនលឿនដូចគ្រាប់កាំភ្លើងកាត់ភ្នំហ្វូជីទៅកាន់ទីក្រុងចំណាស់ក្យូដូ ដើម្បីស្រូបយកខ្យល់អាកាសបែបធម្មជាតិ។ ក្រៅពីនេះ អ្នកអាចស្រង់បទពិសោធន៍ត្រាំទឹកក្ដៅនាពេលនិទាឃៈរដូវក្នុងតំបន់ និងភ្លក់រសជាតិអាហារប្រពៃណីស៊ូស៊ីរបស់ប្រជាជនជប៉ុន។

៧. ប្រទេសស៊ីលី

ប្រជាជនស៊ីលី មានភាពស្និទ្ធស្នាល និងភាពរួសរាយរាក់ទាក់យ៉ាងខ្លាំងចំពោះអ្នកទេសចរ។ លោកអ្នកអាចធ្វើដំណើរបែបផ្សងព្រេងលើរយៈចម្ងាយជិត ៥០០០ គីឡូម៉ែត្រ កាត់វាលខ្សាច់ កំពូលភ្នំ ជ្រលងដងអូរ និងបញ្ចប់បេសកកម្មនៅឆ្នេរសមុទ្រដ៏ស្រស់ស្អាត។

៦. ប្រទេសវៀតណាម

ផ្សារទំនិញដ៏សំបូរបែប ភ្នំជាច្រើន គឺកន្លែងដ៏ប្រសើរសម្រាប់អ្នកទេសចរណ៍ដែលចង់ដកពិសោធន៍ ក្នុងដំណើរកម្សាន្តតែម្នាក់ឯង។ កន្លែងដែលអស្ចារ្យបំផុតនោះ គឺកោះត្រល់ ដែលលោកអ្នកអាចភ្លក់រសជាតិនៃអារម្មណ៍វិលទៅរកអតីតកាលបែបធម្មជាតិពិតៗ ធ្វើឲ្យអារម្មណ៍រសាយអស់ទុក្ខកង្វល់។

៥. ប្រទេសអូទ្រីស

សាលតន្ត្រី សារមន្ទីរ និងហាងកាហ្វេតាមផ្លូវ ក្នុងប្រទេសអូទ្រីស ពិតជាអាចបម្រើអារម្មណ៍លោកអ្នក មិនឲ្យមានភាពឯកាឡើយ។

៤. ប្រទេសកូស្តារីកា

កូស្តារីកា គឺជាប្រទេសដែលមានភាពរីករាយបំផុតក្នុងលោក។ ឆ្នេរមហាសមុទ្រប៉ាស៊ីហ្វិកនៃប្រទេសតំបន់អាមេរិកកណ្ដាលនេះ នឹងធ្វើឲ្យលោកអ្នកមានអារម្មណ៍ស្រស់ស្រាយ។ លើសពីនេះ លោកអ្នកអាចកក់ដំណើរកម្សាន្តទៅព្រៃកប់ពពកដ៏អស្ចារ្យ។

៣. ប្រទេសស្វីស

ស្វីសគឺជាប្រទេសអព្យាក្រឹត ដែលមិនចូលបក្សសម្ព័ន្ធក្នុងនយោបាយអន្តរជាតិឡើយ ដូចនេះហើយទើបប្រទេសនេះក្លាយជាកន្លែងមួយដែលមានសុវត្ថិភាព និងស័ក្ដិសមបំផុតសម្រាប់អ្នកទេសចរទោល។ ដំណើរកម្សាន្តក្នុងពេលរាត្រី សារមន្ទីរ សុទ្ធតែអាចធ្វើឲ្យលោកអ្នកមានរសាយអស់ទុក្ខកង្វល់។

២. ន័រវែស

បទពិសោធន៍ដ៏អស្ចារ្យបំផុត សម្រាប់អ្នកទេសចរណ៍ទោលនៅប្រទេសនេះ គឺការធ្វើដំណើរផ្សងព្រេងក្នុងរយៈចម្ងាយជាង ១៦០០ គីឡូម៉ែត្រ ឆ្លងកាត់តំបន់ទេសភាពស្អាតៗជាច្រើនកន្លែង។

១. នូវែលហ្សេឡង់

លោកអ្នកអាចនឹងមានអារម្មណ៍ប្លែក ក្នុងដំណើរកម្សាន្តលើផ្ទាំងទឹកកកធំៗ ការត្រាច់ចរផ្សងព្រេងក្នុងព្រៃរងទឹកភ្លៀងជាដើម។ លើសពីនេះ ការលោតទម្លាក់ពីលើទីខ្ពស់ ជិះអូប័រ និងឡើងភ្នំ ពិតជាធ្វើឲ្យលោកអ្នករីករាយ គ្មានអារម្មណ៍ថាខ្លួនឯងឯកាឡើយ។

ប្រែសម្រួល៖ គង់ វិសាល

ប្រភព៖ business insider