កើតអាស្រូវផ្ទួនៗ ម្ចាស់ភាគហ៊ុន Facebook ស្នើឲ្យដក Mark ពីតំណែង

2018-10-18 06:53:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ភាគហ៊ុនធំៗចំនួន៤ របស់ Facebook នៅសហរដ្ឋអាមេរិក កាលពីថ្ងៃទី១៧ ខែតុលា ឆ្នាំ២០១៨ បានដាក់សំណើដើម្បីសុំឲ្យមានផ្លាស់ប្ដូរថ្នាក់ដឹកនាំកំពូលរបស់ Facebook គឺលោក Mark Zuckerberg នាយកប្រតិបត្តិក្រុមហ៊ុន បន្ទាប់ពីលេចរឿងអាស្រូវមួយចំនួនរបស់ក្រុមហ៊ុនបណ្ដាញទំនាក់ទំនងសង្គមមួយនេះ។

អ្នកនាំពាក្យ Facebook បានបដិសេធ ក្នុងការបំភ្លឺជុំវិញបញ្ហានេះ។ ម្ចាស់ភាគហ៊ុនដែលបានដាក់សំណើសុំផ្លាស់ប្ដូរនាយកប្រតិបត្តិ Facebook មានប្រភពពីរដ្ឋ Illinois, រដ្ឋ Rhode Island, រដ្ឋ Pennsylvania និងក្រុង New York ដែលមានសមត្ថកិច្ចគ្រប់គ្រងលើហិរញ្ញវត្ថុ។

បញ្ជាក់ថា នេះមិនមែនជាលើកទីមួយទេ ដែលម្ចាស់ភាគហ៊ុន Facebook ស្នើឲ្យមានការដកលោក Mark Zuckerberg ។ កាលពីឆ្នាំ២០១៧ សំណើដកនាយកប្រតិបត្តិដូចគ្នានេះ ត្រូវបានបដិសេធ។

រឿងអាស្រូវចុងក្រោយរបស់ Facebook មានជាប់ទាក់ទងនឹងករណីគណនី Facebook ចំនួនជាង ៣០ លានត្រូវ Hacker លួចយកទិន្នន័យបាន ដែលទិន្នន័យនោះមានដូចជាឈ្មោះ និងលេខទូរសព្ទជាដើម។

ចំណែករឿងអាស្រូវមួយទៀត គណនី Facebook ប្រមាណជាង ៨៧លានគណនី ត្រូវបានប្រើប្រាស់ដោយក្រុមហ៊ុនវិភាគទិន្នន័យ Cambridge Analytica ដែលមានជាប់ទាក់ទងនឹងលោក ដូណាល់ ត្រាំ ប្រធានាធិបតីអាមេរិក អំឡុងពេលយុទ្ធនាការរកសំឡេងឆ្នោតឆ្នាំ ២០១៦។ ជុំវិញបញ្ហានេះ លោក Mark Zuckerberg ត្រូវបានសភាអាមេរិកកោះហៅដើម្បីសាកសួរផងដែរ៕

ចុចអាន៖

ប្រភព៖ Kley Kley ប្រែសម្រួល ៖ លាភ.