ពិព័រណ៍ទេសចរណ៍កម្ពុជាឆ្នាំនេះសម្រេចគោលដៅខ្លួនចង់បានបើទោះអ្នកចូលរួមតិចជាងឆ្នាំទៅ
- 2018-10-19 10:29:55
- ចំនួនមតិ 0 | ចំនួនចែករំលែក 0
ពិព័រណ៍ទេសចរណ៍កម្ពុជាឆ្នាំនេះសម្រេចគោលដៅខ្លួនចង់បានបើទោះអ្នកចូលរួមតិចជាងឆ្នាំទៅ
ចន្លោះមិនឃើញ
បន្ទាប់ពីបញ្ចប់បេសកកម្មខ្លួនកាលថ្ងៃទី ១១ ១២ និង ១៣ តុលាកន្លងទៅនេះ នៅកោះពេជ្យ ពិព័រណ៍ទេសចរណ៍កម្ពុជាអន្តរជាតិ ២០១៨ (Cambodia Travel Mart 2018) ដែលជាពិព័រណ៍ទេសចរណ៍ធំបំផុតនៅកម្ពុជា បានបង្ហើបឲ្យដឹងថាមានចំនួនអ្នកចូលរួមសរុបរយៈពេលបីថ្ងៃនេះដល់ទៅ ២០០០នាក់ ដែលក្នុងនោះមានចំនួនអ្នកភ្ញៀវកិត្តិយស អ្នកទិញ និងអ្នកសារព័ត៌មានចូលរួមជាតិ និងអន្តរជាតិ ១៣០នាក់។
តំណាងអ្នករៀបចំ Cambodia Travel Mart 2018 បានប្រាប់ Sabay ថា៖ «យើងពេញចិត្តចំពោះ លទ្ធផលនេះ បើទោះជាជាក់ស្តែងចំនួនអ្នកចូលរួមតិចជាងឆ្នាំទៅដោយសារកម្មវិធីជាប់ឈប់សម្រាលបុណ្យភ្ជុំពេក។ តែយ៉ាងណាក៏ដោយយើងឃើញមានការពេញចិត្តច្រើនពីខាងអតិថិជន ភ្ញៀវកិត្តិយសដែលត្រូវបានអញ្ជើញចូលរួម និងសាធារណៈជនចូលរួមនៅថ្ងៃចុងក្រោយ។ សម្រាប់ភ្ញៀវ VIP ដែលធ្វើការក្នុងវិស័យនេះត្រូវបានអញ្ជើញចូលរួមទាំងអស់ បានបង្ហាញការពេញចិត្តចំពោះការបង្កើតទំនាក់ទំនងអាជីវកម្ម និងឱកាសជំនួញជាច្រើនក្នុងវិស័យទេសចរណ៍នៅកម្ពុជា និងបណ្តាលប្រទេសជាច្រើនទៀត»។
«ចំនួនអ្នកចូលរួមទស្សនា ២០០០នាក់នេះ គឺពិតជាច្រើន ព្រោះពិព័រណ៍យើងគឺជាកម្មវិធីបិទសម្រាប់តែភ្ញៀវដែលត្រូវបានអញ្ជើញចូលរួមប៉ុណ្ណោះ រយៈ២ថ្ងៃដំបូង ហើយមានតែថ្ងៃចុងក្រោយប៉ុណ្ណោះដែលយើងបើកទូលាយឲ្យសាធារណជនចូលរួមសេរី។ យើងចាត់ទុកថានេះគឺជាព្រឹត្តិការណ៍សំខាន់មួយដែលយើងរួមគ្នាសម្រេចបាន ហើយយើងប្រឹងប្រែងធ្វើឲ្យកាន់តែល្អប្រសើរនៅកម្មវិធីលើកក្រោយ»។
សម្រាប់ឆ្នាំនេះ CTM 2018 ទទួលបានក្រុមហ៊ុនចូលរួមតាំងពិព័រណ៍ចំនួន ៥០០ក្រុមហ៊ុន មានស្តង់សរុបចំនួន ១៧៣ស្តង់ មកពី៨០ប្រទេស ដោយក្នុងនោះមានស្ថាប័នទេសចរណ៍ជាតិមកពីតំបន់អាស៊ាន អាស៊ាន+៣ និងតំបន់អាស៊ីប៉ាស៊ីហ្វិក សណ្ឋាគារ ទីភ្នាក់ងារទេសចរណ៍ ប្រតិបត្តិករទេសចរណ៍ ក្រុមហ៊ុនអាកាសចរណ៍ និងសហគមន៍ទេសចរណ៍។
ពិព័រណ៍ទេសចរណ៍នេះរៀបចំឡើងក្នុងគោលបំណងដើម្បីជាការណាត់ជួបរវាងក្រុមហ៊ុនទេសចរណ៍ក្នុងស្រុក និងក្រុមហ៊ុនទេសចរណ៍អន្តរជាតិ ដែលជាប្រភពទីផ្សារគោលដៅទេសចរណ៍ដ៏សំខាន់សម្រាប់កម្ពុជារួមមានអ្នក ទិញ (Buyers) ជាតិ និង អន្តរជាតិ ពាណិជ្ជករជាអ្នកផ្តល់ សេវាកម្មជាតិ និងអន្តរជាតិ (Seller ) ដើម្បីបង្កើតឱកាសចាប់ដៃគូអាជីវកម្ម។ ក្រៅពីនេះក៏មានការចូលរួមស្ថាប័នទេសចរណ៍ជាតិនានារបស់ប្រទេសអាស៊ាន ដើម្បីទិញលក់កញ្ចប់ទស្សនកិច្ច នៃសេវាកម្មទេសចរណ៍ ផ្លាស់ប្តូរ ចែករំលែកបទពិសោធន៍ និងបង្កើតភាពជាដៃគូក្នុងធុរកិច្ចជាមួយគ្នា សំដៅអភិវឌ្ឍវិស័យទសកម្ពុជាឲ្យកាន់តែប្រសើរឡើងមួយកម្រិតទៀត៕